វាសនា កុមារលួចដួងរងការព្រមាន«បញ្ចប់ជំនួយ»
- ដោយ: ប្រាថ្នា អត្ថបទ និងយកការណ៍៖ ប្រាថ្នា ([email protected]) - ភ្នំពេញ ថ្ងៃទី១៣ មករា ២០១៥
- កែប្រែចុងក្រោយ: January 13, 2015
- ប្រធានបទ: អប់រំ
- អត្ថបទ: មានបញ្ហា?
- មតិ-យោបល់
-
ក្រោយពីផ្ទុះរឿងអាស្រូវ នៃការធ្វើទារុណកម្មចាប់ជ្រមុជក្នុងពាងទឹកស្អុយ ស្ទើរស្លាប់ស្ទើរស់ កាលពីថ្ងៃទី ២៨ ខែសីហា ឆ្នាំ២០១៤នោះមក កុមារ ម៉ុន វាសនា ដែលជាជនរងគ្រោះនៅក្នុងរឿងនេះ និងកើតក្នុងគ្រួសារក្រីក្រ មានបងប្អូន ៦នាក់ និងមានឪពុកម្តាយ ជាអ្នកផ្ទុកមេរោគអេដស៍ទៀតផងនោះ ត្រូវបាននាយកសាលាអន្តរជាតិ ហ្វ្រេដហ្វត ជួយឧបត្ថម្ភ និងនាំក្មេងប្រុសម្នាក់នេះ មករៀននៅរាជធានីភ្នំពេញ និងថែមទាំងមានបំណង ចង់ឱ្យទៅបន្តការសិក្សាជំនាញវិស្វករគ្រឿងម៉ាស៊ីន នៅប្រទេសចិន និងជប៉ុនទៀត។
ប៉ុន្តែក្តីបំណងរបស់ម្ចាស់ជំនួយ និងការរំពឹងទុករបស់មហាជនហាក់ខកបំណង ដោយសារតែកុមារាដែលមានស្រុកកំណើតនៅស្រុកពារាំង ខេត្តព្រៃវែងរូបនេះ មិនអាចទទួលយកការរស់នៅបែបថ្មី និងការសិក្សាដែលម្ចាស់ជំនួយបានរៀបចំទុកឱ្យបាន។
បើតាមសេចក្តីជូនដំណឹងរបស់សាលាអន្តរជាតិ ហ្វ្រេដហ្វត បានឲ្យដឹងថា ក្រោយពីបានចិញ្ចឹមថែទាំ និងផ្ដល់ការអប់រំដល់ក្មេងប្រុស ម៉ុន វាសនា ដែលត្រូវបានបុរសពីរនាក់ជាបងប្អូនធ្វើទារុណកម្ម យ៉ាងព្រៃផ្សៃ ដោយសារតែបានលួចដូង៤ផ្លែ បានប្រមាណ ៤ ខែមក ម្ចាស់ជំនួយលោក មុំ វ៉ារិន ជានាយកសាលា បានសម្គាល់ថាកុមារា ម៉ុន វាសនា មិនអាចទទួលយកការសិក្សា ដែលលោកបានផ្តល់ឱ្យនោះទេ។
លោក មុំ វ៉ារិន បានសម្រេចចិត្តបញ្ជូនកុមារា ម៉ុន វាសនា ឱ្យទៅរៀនជំនាញដំឡើង ម៉ាស៊ីនចាក់សាំង ម៉ាស៊ីនចាក់ហ្គាស និងតំឡើងប្រព័ន្ធហ្គាសតាមស្ថានីយ នៅរាជធានីភ្នំពេញ និងនៅតាមបណ្តាខេត្តចាប់ពីថ្ងៃទី ១៩ ខែ មករា ឆ្នាំ ២០១៥ នេះតទៅ បន្ទាប់ពីបានពិភាក្សា ជាមួយលោក ទុយ ម៉ុន ជាឪពុករបស់កុមារ ម៉ុន វាសនា និងកុមារ ម៉ុន វាសនា រួចមក ។
សេចក្តីជូនរបស់សាលាអន្តរជាតិ ហ្វ្រេដហ្វត បានបន្តថា៖ «ហើយនេះជាការផ្តល់ឱកាសចុងក្រោយសម្រាប់កុមារ ម៉ុន វាសនា និងក្រុមគ្រួសារគាត់ ប៉ុន្តែប្រសិនជានៅមិនទទួលបានលទ្ធផល ហើយកុមារ ម៉ុន វាសនា នៅតែមិនស្តាប់តាមការណែនាំ ចំពោះការបង្ហាត់បង្រៀនដូចពេលកន្លងមក នោះគម្រោងជួយសង្រ្គោះគាត់ នឹងត្រូវបញ្ចប់ជាស្ថាពរ»។
គេមិនទាន់ដឹងឲ្យច្បាស់ថា តើស្ថិតក្នុងសភាពបែបណា ដែលកុមារា ម៉ុន វាសនា មិនស្ដាប់តាមការណែនាំ ចំពោះការបង្ហាត់បង្រៀន និងរហូតដល់កម្រិតមួយ ដែលម្ចាស់ជំនួយលោក មុំ វ៉ារិន សម្រេចចិត្តឈប់ជួយឧបត្ថម្ភនោះឡើយ។
លោក មុំ វ៉ារិន ដែលតែងនាំក្មេងប្រុស ម៉ុន វាសនា រួមដំណើរជាមួយក្រុមគ្រួសាររបស់លោក ទៅដើរលេងកម្សាន្ត ទទួលទានអាហារជុំគ្នា និងទៅលេងស្រុកជុំបងប្អូនឪពុកម្តាយ។ សព្វថ្ងៃ លោក មុំ វ៉ារិន និងភរិយាបានជួយជ្រោមជ្រែងចំពោះគ្រួសារកុមារ ម៉ុន វាសនា ដោយផ្តល់ទុន និងសម្ភារះ អោយម្តាយសម្រាប់ការប្រកបអាជីវកម្មនៅស្រុកកំណើត ដើម្បីទប់ទល់ការចាយវាយប្រចាំថ្ងៃក្នុងក្រុមគ្រួសារ ការផ្តល់ការងារអោយឪពុក មកធ្វើការងារនៅភ្នំពេញដោយផ្តល់កម្រៃ ១០ដុល្លាក្នុងមួយថ្ងៃ និងផ្តល់ការសិក្សាដល់កុមារ ម៉ុន វាសនា ការហូបចុក និងការចំណាយផ្សេងៗក្នុងមួយខែ ប្រមាណ ៤០០ដុល្លា សម្រាប់កុមារ ម៉ុន វាសនា៕