នាំទៅសម្លាប់ក្នុងវាលកប់ខ្មោច រួចយកមកកាប់សាច់ជាដុំៗទុកចំអិន
- ដោយ: សុបិន្ដ អត្ថបទ៖ សុបិន្ត ([email protected]) - ម៉ុងរ៉េអាល់ ថ្ងៃទី១៧ មករា ២០១៥
- កែប្រែចុងក្រោយ: January 18, 2015
- ប្រធានបទ: ហួសនិស្ស័យ
- អត្ថបទ: មានបញ្ហា?
- មតិ-យោបល់
-
ហេតុការណ៍បានកើតឡើងយ៉ាងរំជួលក្រុង ដែលតូណា (Deltona) ក្នុងរដ្ឋផ្លរីដា (Floride) សហរដ្ឋអាមេរិក។ រឿងរ៉ាវបានកើតឡើង តាំងពីខែមេសាឆ្នាំ២០១៣មកម្លេះ ប៉ុន្តែសំនុំរឿងក្ដីនេះ ទើបនឹងត្រូវបានយកមកបើកសវនាការជាថ្មី និងសម្រេចក្ដី កាលពីខែមុននេះប៉ុណ្ណោះ។
លោក ជេម (James) អាយុ៣៦ឆ្នាំ មានមុខរបរជាអ្នកបើករថយន្ដឯកជន៤បាំង នៅក្នុងទីក្រុង ហើយលោកថែមទាំងមានភរិយា និងកូន៣ថែមទៀត។ លោកនិងគ្រួសារមានជីវិតសុខសប្បាយជាធម្មតា ដោយមិនមានផលរមាស់អ្វីឡើយ... មិនមានផលរមាស់ លុះត្រាមកទល់នឹងហេតុការណ៍ ដែលបង្កឡើងក្នុងថ្ងៃមួយ ដោយអ្នកជិតខាងរបស់លោក គឺអ្នកស្រី អេនជឺឡា (Angela)។
សារព័ត៌មានអង់គ្លេស មៀរ៉ូរ៍ (Mirror) បានរាយការណ៍ថា មិនត្រឹមតែជាអ្នកជិតខាងគ្នាទេ តែអ្នកស្រី អេនជឺឡា ក៏ធ្លាប់ជាអ្នករាប់អានជិតដិតម្នាក់ របស់លោកជេមនោះផងដែរ។ ឆ្លងចេញពីទំនាក់ទំនងនេះហើយ ទើបលោក ជេម បានទុកចិត្តឲ្យស្ដ្រីវ័យ៤២ឆ្នាំរូបនេះ ចាត់ចែងទៅលើលុយកាក់ចូលនិវត្តន៍របស់ខ្លួន។ ប៉ុន្តែទំនាក់ទំនងនេះ បានបង្ហាញផ្លែផ្ការបស់វា នៅថ្ងៃទី៣ ខែមេសា ឆ្នាំ២០១៣ គឺអ្នកស្រីវ័យ៤២ឆ្នាំ បានប្រព្រឹត្តិរឿងមួយដ៏សាហាវឃោឃៅ បន្ទាប់ពីលោក ជេម បានមករកខ្លួនដើម្បីសុំបង្វិលប្រាក់ចំនួន៤០០០ដុល្លា (ប្រមាណជា៣៣២១អ៊ឺរ៉ូ) មកឲ្យលោកសិន។
នៅថ្ងៃនោះ អ្នកជិតខាងទាំងពីរបានឆ្លៀតឱកាស ដើម្បីជជែកគ្នាលេងផង និងជល់កែវ ផឺកទឹកលាយមានជាតិអាល់កុលមួយប្រភេទផង។ បន្ទាប់មកទៀត លោក ជេម បានធ្លាក់ខ្លួនស្រវឹងជោគខ្លួន ព្រោះនៅក្នុងទឹកលាយនោះ មិនមានត្រឹមតែអាល់កុលនោះទេ តែស្ត្រីចំណាស់បានលួយបន្ថែមសារជាតិញៀនទៅក្នុងនោះផង។ បានឱកាសនេះ អ្នកស្រី អេនជឺឡា បាននាំលោក ជេម ចេញពីផ្ទះខ្លួន ដើរទៅកាន់ទីវាលកប់សាកសពដែលស្ថិតនៅក្បែរនោះ មុននឹងយកកាំបិតចាក់ទឹកកក មកចាក់ចំកណ្ដាលមុខរបស់បុរសវ័យក្មេង និងយកខ្សែរមករឹតក រហូតដល់ជនរងគ្រោះផុតដង្ហើម។
នៅពេលរាត្រីបានមកដល់ អ្នកស្រី អេនជឺឡា បានទៅយកសាកសពរបស់ជនរងគ្រោះ មកផ្ទះអ្នកស្រីវិញ រួចកាត់ជាដុំៗដាក់ក្នុងចានជ័រធំមួយ ដើម្បីទុកធ្វើការចំអិន។ ផ្នែកខ្លះត្រូវបានអ្នកស្រី យកមកដុតនៅក្នុងចង្ក្រានអគ្គិសនី ខណៈផ្នែកខ្លះទៀតត្រូវបានយកមកឆានៅក្នុងខ្ទះ។ ឆ្អឹងរបស់ជនរងគ្រោះ ត្រូវបានចៀរចេញយកទៅគ្រវាត់ចោលក្នុងធុងសម្រាម។ រីឯសាច់មួយចំនួនដែលបានឆេះខ្លោច ក៏ត្រូវបានអ្នកស្រីចៀរចេញយកទៅគ្រវាត់ចោលដូចគ្នា។
ហេតុការណ៍ដ៏ហួសនិស្ស័យនេះ មិនអាចលាក់កំបាំងពីភ្នែកអ្នកដទៃបានឡើយ ជាពិសេសទៅទៀតនោះ គឺប្អូនស្រីរបស់អ្នកស្រីតែម្ដង ដែលបានរាយការណ៍រឿងរ៉ាវ ប្រាប់នគរបាល។ នៅចំពោះមុខអ្នកស៊ើបអង្កេត អ្នកស្រី អេនជឺឡា បានបង្វិលសាច់រឿងជាច្រើនយ៉ាង ក្នុងនោះមានដូចជាថា អ្នកស្រីមានអារម្មណ៍ភ័យភិតនឹងលោក ជេម ខ្លាំងពេក មុននឹងឈានទៅដល់រឿងឃាតកម្មនេះ។ នៅក្នុងសវនាការកាលពីខែកញ្ញា មេធាវីរបស់អ្នកស្រីបានអះអាងបន្ថែមទៀតថា អ្នកស្រីត្រូវបានលោក ជេម រំលោភបំពានលើរាងកាយ នៅក្នុងរថយន្ដ ដែលធ្វើឲ្យអ្នកស្រីភ័យភិត ដល់សុវត្ថិភាពផ្ទាល់ខ្លួន និងកូនរបស់អ្នកស្រី។
យ៉ាងណាក៏ដោយ តុលាការក្រុង វ៉ូលូស្យ៉ា (Volusia) បានរកឃើញពីទោសកំហុសរបស់អ្នកស្រី ហើយបានដាក់ទោសអ្នកស្រី ពីបទមនុស្សឃាត នៅក្នុងសវនាការជាថ្មី ក្នុងខែធ្នូកន្លងទៅ។ បើគិតមកទល់នឹងថ្ងៃសម្រេចក្ដីសាលក្រម សំនុំរឿងនេះមានរយៈពេល១ឆ្នាំកន្លះទៅហើយ តែក្រុមគ្រួសារជនរងគ្រោះ និងបណ្ដាអ្នករស់នៅក្បែរខាង នៅតែមានអារម្មណ៍រន្ធត់ញាប់ញ័រនៅឡើយ ពីទង្វើឧក្រិដ្ឋដ៏ព្រៃផ្សៃរបស់អ្នកស្រី អេនជឺឡា៕