រដ្ឋាភិបាល​ជប៉ុន បាន​ស្ថិត​នៅ​ក្នុង​គំនាប​ដ៏​ខ្លាំង​មួយ នៅ​យប់​ថ្ងៃ​ព្រហស្បត្ត៍​នេះ ២៤​ម៉ោង មុន​ការ​បញ្ចប់​ឱសានវាទ កំហិត​ដោយ​ក្រុម​សមាជិក​រដ្ឋ​អ៊ីស្លាម​និយម​តឹង ដែល​គម្រាម​ថា​នឹង​សម្លាប់​ចំណាប់​ខ្មាំង​ជាតិ​ជប៉ុន​ទាំង​ពីរ​នាក់ ប្រសិន​បើ​ប្រទេស​មហា​អំណាច​សេដ្ឋកិច្ច​មួយ​នេះ មិន​បង់​ប្រាក់​ថ្នូរប្រមាណ​ជា​២០០​លាន​ដុល្លារ​នោះ​ទេ។

នាយករដ្ឋមន្ត្រី លោក សីនហ្សូ អាប៉េ (Shinzo Abe) និង​រដ្ឋ​មន្ត្រី​ការ​បរទេស​ជប៉ុន លោក ហ្វូមីអូ គីស៊ីដា (Fumio Kishida) បាន​បង្កើន​សកម្មភាព​ខាង​ការ​ទូត​របស់​ខ្លួន​ខុស​ពី​រាល់​ដង ជា​មួយ​នឹង​ប្រទេស​ពាក់​ព័ន្ធ​សឹង​តែ​ទាំង​អស់ ដើម្បី​អាច​ស្វែង​រក​ការ​ដោះ​លែង​ចំណាប់​ខ្មាំង​ទាំង​ពីរ​នាក់ គឺ​លោក ហារូណា យូកាវ៉ា (Haruna Yukawa) និង​លោក កេនជី ហ្គូតូ (Kenji Goto) ដែល​ត្រូវ​បាន​ចាប់​ពង្រត់​យក​ទៅ ដោយ​ក្រុម​ស្ម័គ្រ​ប្រយុទ្ធ​របស់​ព្រះ​អាឡាហ៍ ហៅថា ជីហាដ (jihad)។

វីដេអូមួយត្រូវបានផ្សព្វផ្សាយកាលពីថ្ងៃអង្គារ បង្ហាញពីគម្រោងរបស់ពួកសមាជិករដ្ឋអ៊ីស្លាមទាំងនេះ ថានឹង​សម្លាប់ចំណាប់ខ្មាំងទាំងពីរនាក់ នៅក្នុងរវាង៧២ម៉ោងខាងមុខ។ លោក អាប៊េ ដែលកំពុងស្ថិតក្នុងតំបន់​មជ្ឈឹម​បូព៌ា បានថ្លែងពីទីនោះថា នឹងមិនបណ្ដោយទៅតាមការទាមទារ របស់ក្រុមភេវរជននោះឡើយ។

អ្នកនាំពាក្យរដ្ឋាភិបាលជប៉ុន លោក យ៉ូស៊ីហ៊ីដេ ស៊ូហ្គា (Yoshihide Suga) បានបញ្ជាក់ថា ឱសានវាទនឹងផុត​នៅម៉ោង២និង៥០រសៀល ថ្ងៃសុក្រនេះ ហើយប្រទេសជប៉ុនមិនបានដឹង ពីស្ថានភាពពិតប្រាកដ​នៃចំណាប់​ខ្មាំងទាំងពីរ ថានៅទីណា ឬយ៉ាងដូចម្ដេចនៅឡើយ ដោយហេតុថា ក្រុមអ្នកគម្រាម មិនបានបង្ហាញ​ពីការ​ទាក់​ទងពិតប្រាកដនោះទេ។

នៅក្នុងវីដេអូមួយទៀត ដែលបានថតនៅខែតុលា ឆ្នាំទៅម៉ិញ លោក កេនជី ហ្គូតូ អ្នកសារព័ត៌មាន បានថ្លែង​នៅមុនលោក ចូលទៅក្នុងតំបន់កាន់កាប់ដោយក្រុមសមាជិករដ្ឋអ៊ីស្លាម ថា៖ «បើសិនជាខ្ញុំមានរឿងអី ខ្ញុំខ្លួន​ឯងជាអ្នកទទួលខុសត្រូវទាំងស្រុង»។ អ្នកសារព័ត៌មានរូបនេះ បានចូលទៅស្វែងរកលោក ហារូណា យ៉ូកាវ៉ា ស្ថាបនិកក្រុមហ៊ុនសន្តិសុខតូចមួយ ដែលត្រូវបានចាប់ខ្លួននៅខែសីហាមុន។

អ្នកនាំផ្លូវមួយរូបរបស់លោក ហ្គូតូ បានថ្លែងនៅក្នុងកញ្ចក់ទូរទស្សន៍ជប៉ុនថា លោកបានទទួលពាក្យពឹងពាក់ ឲ្យទាក់ទងមកគ្រួសាររបស់លោក ហ្គូតូ ក្នុងករណីបើលោក ហ្គូតូ មិនឲ្យដំណឹងលើសពីមួយសប្ដាហ៍។ ភរិយា​របស់លោក ហ្គូតូ ក៏បានបញ្ជាក់ដែរថា អ្នកស្រីបានទទួលសំបុត្រជាច្រើនរបស់ក្រុមសមាជិករដ្ឋអ៊ីស្លាម បញ្ជាក់​ពីការទាមទារប្រាក់ថ្នូរ ទលនឹងស្វាមីរបស់អ្នកស្រី។

អ្នកនាំពាក្យរដ្ឋាភិបាលជប៉ុន បានបញ្ជៀសមិនឆ្លើយដោយផ្ទាល់ ទៅកាន់សំនួរ ថាតើជប៉ុននឹង​បង់ប្រាក់ថ្នូរឬ​យ៉ាងណា។ លោក យ៉ូស៊ីហ៊ីដេ ស៊ូហ្គា បាននិយាយថា៖ «ជំហររបស់យើង មិនបានផ្លាស់ប្ដូរទេ។ យើងនឹង​មិន​ក្រាបរួញខ្លួន នៅពីមុខការគម្រាមរបស់ភេវរជនឡើយ ហើយក៏គ្មានការផ្ទេរប្រាក់ថ្នូរ នោះដែរ»៕