ជម្លោះ​រវាង​អាជីវករ​លក់​ដូរ​បន្លែ និង​សន្តិសុខ​ពេទ្យ​កាល​ពី​ព្រឹក​ថ្ងៃ​ទី​២៣ ខែ​មករា​នេះ នៅ​មិន​ទាន់​អាច​សម្រួល​គ្នា​បាន​នៅ​ឡើយ រហូត​មក​ដល់​ម៉ោង​នេះ។ ស្ត្រី​ជា​ជន​រង​គ្រោះ មិន​ព្រម​ទទួល​សំណង​ដែល​ម្ចាស់​មន្ទីរ​ពេទ្យ ជួស​មុខ​ឲ្យ​សន្តិសុខ​បង្ក​របួស​ស្នាម បាន​បង់​ថ្លៃជំ​ងឺ​ចិត្ត​ឲ្យ​គាត់​នោះ​ទេ។

បន្ទាប់​ពី​មាន​ការ​ប្រតាយ​ប្រតប់​គ្នា ជា​មួយ​សន្តិសុខ​ពេទ្យ​ខាង​លើ​នេះ​រួច អ្នកស្រី សុផល ជា​ជន​រង​គ្រោះ​បាន​ទៅ​ប្តឹង​ប៉ូលីស នៅ​ប៉ុស្តិ៍​ផ្សារ​ដើម​គរ ដើម្បី​ធ្វើការ​ដោះ​ស្រាយ​ចំពោះ​ការ​បង្ក​របួស​ស្នាម​ដល់​អ្នកស្រី។ ស្ត្រី​រង​គ្រោះ បាន​ទាមទារ​សំណង​ដែល​សន្តិសុខ​របស់​ពេទ្យ បាន​ប្រើ​អំពើ​ហឹង្សា​មក​លើ​គាត់ ចំនួន ៥០០ដុល្លា​ពី​ម្ចាស់​មន្ទីរពេទ្យ ព្រោះ​ក្រោយ​ពី​សន្តិសុខ វាយ​ស្ត្រី​ជន​រង​គ្រោះ​នេះ​រួច ក៍​បាន​រត់​គេច​ខ្លួន​បាត់។

ការទាមទារសំណងចំនួន ៥០០ដុល្លា របស់អ្នកស្រី សុផល ត្រូវបានម្ចាស់មន្ទីរពេទ្យបដិសេធ មិនព្រម​ផ្តល់​ជូន​គាត់នោះទេ ដោយម្ចាស់មន្ទីរពេទ្យសុំជូនសំណងត្រឹមតែ ១រយដុល្លាប៉ុណ្ណោះ។

អ្នកស្រី សុផល បានប្រាប់ទស្សនាវដ្តី​មនោរម្យ.​អាំងហ្វូ​យ៉ាងដូច្នេះថា គាត់មិនព្រមទទួលថ្លៃសងជំងឺចិត្តត្រឹម ១០០ដុល្លានោះទេ ហើយគាត់សុខចិត្តឲ្យសមត្ថកិច្ចបញ្ជូនសំណុំរឿងនេះ ទៅថ្នាក់លើបន្តទៀត។

រឿងហេតុនេះ បានកើតឡើងនៅច្រកចូលទៅក្នុងផ្សារដើមគ សង្កាត់ផ្សារដើមគ ខ័ណ្ឌទួលគោក រាជធានី​ភ្នំពេញ។ អ្នកស្រីអាជីវករ បានរៀបរាប់ពីដំណើររឿងថា រូបគាត់បានលក់បន្លែនៅជាប់នឹងមន្ទីរពេទ្យ លឹម ស៊ីវុតថា ហើយថ្ងៃនេះ សន្តិសុខបានដេញពួកគាត់ មិនឲ្យលក់នៅជិតមន្ទីរពេទ្យនោះទេ ដោយសារគេ​ត្រូវការ​កន្លែងទុកដាក់ម៉ូតូរវិញ។ នៅពេលសន្តិសុខដែលបានវាយអ្នកស្រី មកបណ្តេញក្រុមអាជីវករចេញ​នៅព្រឹក​នេះ អ្នកស្រីនិយាយថា អ្នកស្រីជាប់ដៃលក់បន្លែឲ្យមូយរបស់គាត់ពីរបីនាក់ ដោយមិនបានឆ្លើយតប និងរើ​អីវ៉ាន់ចេញភ្លាមៗ ដូចបំណងរបស់សន្តិសុខនោះទេ។

ខណៈនោះ ក៍ស្រាប់តែសន្តិសុខពេទ្យនោះ ក៍ចាប់ផ្តើមជេប្រមាថម៉ាក់ងាយដល់គាត់ ស្ត្រីរងគ្រោះរូប​នេះបាន​ជេរប្រទេចមកលើសន្តិសុខនោះវិញ បណ្តាលឲ្យជំលោះនេះកាន់តែធំ រហូតដល់មានការវាយប្រតប់គ្នា មាន​របួសស្នាមដូច្នេះ។ អ្នកស្រី សុផល បានរងរបួសនៅត្រង់សៀតផ្កា ដោយការវាយរបស់សន្តិសុខពេទ្យនោះ មួយទំហឹងដៃ។

រីឯលោក ហែម សុវណ្ណរិទ្ធ មេប៉ុស្តិ៍នគបាលផ្សារដើមគរវិញ មិនអាចធ្វើការបញ្ជាក់​អំពីករណីនេះ​បាននៅ​ឡើយ ដោយលោកឆ្លើយតបថា កំពុងមានកិច្ចការរវល់នៅខេត្ត។

អ្នកស្រី ឡាយ ណាវី ដែលជាអ្នកលក់បន្លែនៅផ្សារដើមគរដូចគ្នានោះដែរ បាននិយាយថា មូលហេតុដែល​សន្តិសុខមន្ទីរពេទ្យវាយជាមួយនឹងអ្នកស្រី សុផល គឺដោយសារសន្តិសុខបង្ករឿងនោះ បានមកសុំឲ្យអ្នកស្រី សុផល រើអីវ៉ាន់ចេញ ដើម្បីយកកន្លែងដាក់ម៉ូតូរ៉ឺមកអ្នកជំងឺមកចតនៅចំណុចនោះ ប៉ុន្តែជនរងគ្រោះមិន​ព្រម​រើចេញ ក៍ផ្ទុះជម្លោះតែម្តង៕