បន្ទាប់​ពី​រក​អន្តរាគមន៍ ពី​ក្រសួង​អប់រំ​យុវជន និង​កីឡា និង​ក្រសួង​សុខាភិបាល មិន​បាន​លទ្ធផល​រួច​មក  នៅ​ព្រឹក​ថ្ងៃ​ទី២៨ ខែ​មករា​នេះ ក្រុម​និស្សិត​នៃ​វិទ្យាស្ថាន​វិទ្យាសាស្រ្ត​អន្តរជាតិ ប្រមាណ​ជា​៦០​នាក់ បាន​នាំ​គ្នា​ធ្វើការ​តវ៉ា​នៅ​មុខ​រដ្ឋសភា​ជាតិ ដើម្បី​ស្នើ​សុំ​ឲ្យ​ស្ថាប័ន​ជាតិ​មួយ​នេះ ស្វែង​រក​ដំណោះ​ស្រាយ​បញ្ហា​ដ៏​ចម្រូង​ចម្រាស​របស់​ពួក​គេ។ រឿង​ដែល​ដោះ​ស្រាយ​មិន​ចេះ​ចប់ និង​ធ្វើ​ឲ្យ​ដំណើរ​ការ​តវ៉ា ឡើង​មក​ដល់​រដ្ឋសភា​នោះ ត្រូវបា​ន​ពួក​គេ​លើក​មក​បរិហា​ថា នោះ​ដោយ​សារ​តែ​នាយក​វិទ្យាស្ថាន​វិទ្យាសាស្ត្រ​អន្តរជាតិ បាន​បោក​ប្រាស់​ពួក​គេ​យ៉ាង​​ចាស់ដៃ។

តំណាងនិស្សិតផ្នែកគិលានុប្បដ្ឋាកម្នាក់ យុវជន ថន រដ្ឋា បានរៀបរាប់ថា ពួកគេសុទ្ធតែជានិស្សិតក្រីក្រ គ្រួសារ​របស់​ពួកគេបានលក់គោលក់ក្របី និងមួយចំនួនទៀតយកទ្រព្យសម្បត្តិទៅបញ្ចាំធនាគារ ដើម្បី​យក​លុយ​មក​បង់​ឱ្យ​សាលា ឱ្យកូនបានរៀន ដោយសង្ឃឹមថាជីវភាពនឹងបានធូធារ លើកស្ទួយជីវភាព​គ្រួសារឱ្យ​កាន់​តែ​ប្រសើរ​ឡើង។ ប៉ុន្តែផ្ទុយទៅវិញ អ្វីដែលពួកគាត់សង្ឃឹមទុក បានបរាជ័យ ដោយសារតែត្រូវបាន​នាយក​វិទ្យាស្ថាន​វិទ្យាសាស្រ្តអន្តរជាតិ បោកប្រាស់និស្សិត។ លោកបន្តថា កន្លងមកនាយកសាលាតែង​ដើរ​ប្រាប់​អ្នក​ដទៃ​ថា សិស្ស​ដែល​ធ្វើការតវ៉ាទាំងនោះ ជាសិស្សអាហារូបករណ៍ដែលគេរើសយកមករៀន ក្នុង​ពេល​យុទ្ធនាការ​ឃោសនា​បោះ​ឆ្នោត ប៉ុន្តែពួកលោកគឺជាសិស្សដែលបង់ថ្លៃដើម្បីរៀន ដែលបង់ថ្លៃ​៥០០​ដុល្លារ​ក្នុង​មួយ​ឆ្នាំ។

«ហើយរយៈពេលនៃការរៀននេះ រៀនរយៈពេលបីឆ្នាំហើយ អញ្ចឹងគាត់អស់ទុន ដើម្បីឱ្យកូនមកបន្តការ​សិក្សា​ហើយ ពួកខ្ញុំមានតែប្តេជ្ញាចិត្ត ដើម្បីទាមទារតវ៉ានូវយុត្តិធម៌ជូនគាត់ដើម្បីជាការសងនូវជម្ងឺចិត្តផ្សេងៗ ចំពោះ​វិទ្យាស្ថានវិទ្យាសាស្រ្តអន្តរជាតិ ដែលបានបោកនិស្សិតនាពេលកន្លងមកនេះ» នេះជាការអះអាងរបស់​និស្សិត​ខាងលើ ដែលបានអះអាងថា ខ្លួនជាជនរងគ្រោះ។

យុវជនិស្សិតបានលើកយមកមូលហេតុ ដែលលោកសម្អាងថា សាលាបាកប្រាស់ពួកលោកនោះ គឺដោយ​សាលា​បានយកលុយពីនិស្សិតចំនួន៦០ដុលា្លរ ដើម្បីសម្របសម្រួលនិស្សិតចុះកម្មសិក្សា នៅតាមមន្ទីពេទ្យ។ ប៉ុន្តែផ្ទុយទៅវិញ សាលានេះមិនបានឱ្យនិស្សិតចុះកម្មសិក្សា នៅតាមមន្ទីពេទ្យ ដូចដែលនាយក​សាលាបាន​សន្យាឡើយ។ និស្សិតបាននិយាយទៀតថា ដោយសារវិទ្យាស្ថានមួយនេះ គ្មានអាជ្ញាប័ណ្ណពីរដ្ឋាភិបាល ទើប​ក្រសួងមិនអនុញ្ញតឱ្យធ្វើការចុះកម្មសិក្សា។

ថន រដ្ឋា បញ្ជាក់បន្តថា វិទ្យាស្ថានវិទ្យាសាស្រ្តអន្តរជាតិ បានប្តូឈ្មោះបីលើក និងបីទីតាំងមកហើយ។ ដំបូង​មានទីតាំង នៅក្នុងមន្ទីពេទ្យព្រះកេតុមាលា ដែលមានឈ្មោះថាវិទ្យាស្ថានឯកទេសវិជ្ជសាស្រ្ត។ បន្ទាប់មក​បានដូរទីតាំងមកភូមិសាគ្គី សង្កាត់ឬស្សីកែវ ខណ្ឌឬស្សីកែង មានឈ្មោះថាវិទ្យាស្ថានវេជ្ជសាស្រ្តពេទ្យ និង​បច្ចុប្បន្ន បានប្តូរមកជាវិទ្យាស្ថានវិទ្យាសាស្រ្តអន្តរជាតិ ដែលមានទីនៅខណ្ឌទួលគោក ដែលមានលោក ហាក់ ចន្នី ជានាយកដដែល។

បើតាមការបញ្ជាក់របស់ យុវនិស្សិតដដែល បានឲ្យដឹងទៀតថា នាយកវិទ្យាស្ថានលោក ហាក់ ចន្នី បានកុហក ព្រោះបានសន្យា ជាមួយឪពុកម្តាយពួកគេថា នឹងរៀនបណ្ដើរ អាចចុះកម្មសិក្សានៅតាមមន្ទីរពេទ្យបណ្តើរ ហើយក្រោយពេលរៀន និងចុះទៅធ្វើការតាមសហគមន៍។ ហើយនាយកសាលាថែមទាំងសន្យាថា នឹង​បញ្ជូន​ពួកគេទៅធ្វើកម្មសិក្សា នៅក្រៅប្រទេស ដូចជាប្រទេសវៀតណាមនោះទៀតផង។

នៅក្នុងការតវ៉ារបស់ក្រុមនិស្សិតនៅព្រឹកថ្ងៃទី២៨ ខែមករានេះ ពួកគេបានស្នើឱ្យរដ្ឋសភា៖

ទី១) កោះហៅរដ្ឋមន្ត្រីក្រសួងអប់រំ យុវជន និងកីឡា និងក្រសួងសុខាភិបាល ឲ្យមកធ្វើការស្រាយបំភ្លឺ​ទាក់​ទង​នឹងបញ្ហា សាលាអត់មានអាជ្ញាប័ណ្ណបីឆ្នាំហើយ ប៉ុន្តែនៅតែអាចបើកបាន។

ទី២) ជួយជម្រុញឱ្យក្រសួងអប់រំ យុវជននិងកីឡា ចុះឈ្មោះនិស្សិត ដែលបញ្ចប់ការសិក្សាឆ្នាំទី៣ នៅវិទ្យា​ស្ថាន​វិទ្យាអន្តរជាតិ ឱ្យមាននៅក្នុងមុខវិជ្ជាគិលាននុប្បដ្ឋាក ដូចសាលាពេទ្យដទៃ និងទទួលស្គាល់និស្សិត​ទាំងអស់នេះ ថាបានទទួលបានបណ្តុះបណ្តាលជំនាញនេះផងដែរ។

ទី៣) ជម្រុញឱ្យក្រសួងអប់រំយុវជន និងកីឡា និងក្រសួងសុខាភិបាល ផ្ទេរនិស្សិតក្រីក្រដែលរងគ្រោះទាំង​នេះ ទៅរៀននៅសាលាមួយទៀតក្នុងឆ្នាំទី៣ ដោយឥតបង់ថ្លៃ និងចំនុចទី៤ជម្រុញឱ្យក្រសួង ដែលពាក់ព័ន្ធ​ទាំង​អស់ចុះទៅអន្តរាគមន៍ នៅវិទ្យាស្ថានវិទ្យាសាស្រ្តអន្តជាតិ ដើម្បីផ្តល់សំណង់ជម្ងឺចិត្តជូននិស្សិត។

ចំណែកនិស្សិតផ្នែកគិលានុប្បដ្ឋាកម្នាក់ទៀត កញ្ញា នេ ម៉ាលី បានបង្ហាញពីកង្វក់របស់ខ្លួនដែរថា ប្រសិនបើ​រដ្ឋសភាមិនធ្វើការដោះស្រាយឱ្យគេទេ នោះអនាគតរបស់ពួកគេ នឹងចប់ហើយ ព្រោះឪពុកមា្តយ​ពួកគេ​គ្មាន​លទ្ធភាព ក្នុងការផ្តល់ថវិកាឱ្យបន្តការសិក្សា នៅសាលាណាផ្សេងទៀតនោះទេ បន្ទាប់ពីពួកគាត់បាន​យក​លក់​ដីស្រែ មកបង់ថ្លៃសាលាអស់រយៈពេលបីឆ្នាំមកហើយ។ កញ្ញាបន្តថា កញ្ញាពិតជាមានការព្រួយបារម្ភណ៍​ខ្លាច​គ្មានការងារធ្វើ ព្រោះនាងរៀនមុខវិទ្យាពេទ្យហើយ ទៅធ្វើការងារផ្សេងក៏គ្មានអ្នកណាទទួលដែរ។

នាយកវិទ្យាស្ថានវិទ្យាសាស្រ្តអន្តរជាតិ លោក ហាក់ ចន្នី មិនអាចទំនាក់ទំនាង ដើម្បីសុំការបកស្រាយ ពីការ​ចោទប្រកាន់ខាងលើបានទេ នៅថ្ងៃនេះ៕