កុមារីមានជំងឺចំលែក ព្រោះនាងមានសាច់«សាហាវ»?
- ដោយ: ក. វិច្ចនី អត្ថបទ៖ក. វិច្ចនី ([email protected]) - យកការណ៍៖ ហេង វុទ្ធី - ភ្នំពេញ ថ្ងៃទី ២៩ មករា ២០១៥
- កែប្រែចុងក្រោយ: January 30, 2015
- ប្រធានបទ: រន្ធត់
- អត្ថបទ: មានបញ្ហា?
- មតិ-យោបល់
-
ទំនងជាមន្ទីរពេទ្យគន្ធបុប្ផាអស់លទ្ធភាពក្នុងការព្យាបាល កុមារី សា ណាស់ អាយុ៣ឆ្នាំ ដែលមានជំងឺហើមភ្នែកនិងថ្ពាល់មួយចំហៀង ត្រូវបានបញ្ជូនក្នុងពេលនេះ ទៅព្យាបាលនៅមន្ទីរពេទ្យមិត្តភាព កម្ពុជា-រ៉ូស្សី ក្នុងក្ដីសង្ឃឹមថានឹងអាចជួយនាងតូចបាន។ បើតាមម្ដាយកុមារី បានឲ្យដឹងថា មន្ទីរពេទ្យគន្ធបុប្ផាបានលើកឡើងថា សាច់របស់កូនស្រីអ្នកស្រី មានលក្ខណៈកាចសាហាវណាស់ ហើយមន្ទីរពេទ្យជំនាញខាងកុមារនេះ គ្មានថ្នាំសំរាប់ព្យាបាលឲ្យជំងឺរបស់នាងនោះទេ។
អ្នកស្រី សុស ម៉ារី ត្រូវជាម្តាយកុមារី សា ណាស់ បាននិយាយរៀបរាប់ប្រាប់ទស្សនាវដ្តីមនោរម្យ.អាំងហ្វូថា កូនស្រីរបស់គាត់ដំបូងឡើយមិនដែលមានជំងឺអ្វីនោះទេ។ ប៉ុន្តែក្រោយពីនាងលេងជាមួយបងស្រីរបស់នាង ហើយបានត្រូវកំប៉ុងមួយធ្លាក់ចំសៀតផ្ការបស់នាងរួចមក វាបានបណ្តាលឲ្យហើមស្បែកនៅត្រង់ចំណុចនោះ។ អ្នកស្រីថា អ្នកស្រីបានយកក្រមាស្អំលើរបួសនោះឲ្យស្រកហើម ប៉ុន្តែវាបែជាមិនស្រក វាទៅជាហើមទៅលើថ្ពាល់ធំឡើងៗ។
ជំងឺនេះបានធ្វើឲ្យនាងតូច សា ណាស់ ចេះតែហើមទៅៗពេញមួយចំហៀងថ្ពាល់ ហើយវាបានកើតឡើងមកលើរូបនាងជាង ៦ ខែមកហើយ។ ម្តាយរបស់កុមារដដែលនេះ បានបន្តថាគាត់ធ្លាប់បានយក សាណាស់ ទៅព្យាបាលនៅមន្ទីពេទ្យគន្ធបុប្ផាម្តងរួចមកហើយ និងបានទទួលការវៈកាត់ព្យបាលជាទៅហើយដែរ។ ប៉ុន្តែក្រោយពេលដែលគាត់បាននាំកូនត្រឡប់ទៅផ្ទះវិញ មិនបានប៉ុន្មានថ្ងៃផង ជំងឺក៍ចាប់ផ្តើមសើរើឡើងវិញ។
កុមារី សា ណាស់ ត្រូវបានម្តាយនាំយកមកមន្ទីរពេទ្យគន្ធបុប្ផាម្តងទៀត ប៉ុន្តែជាអកុសល មន្ទីរពេទ្យដែលធ្លាប់តែជួយស្រោចស្រង់ជីវិតក្មេងៗ នៅកម្ពុជាកន្លងមក បានប្រាប់ទៅម្តាយនាងតូចនេះថា មន្ទីរពេទ្យមិនមានថ្នាំព្យាបាលឲ្យកូនរបស់គាត់នោះទេ ព្រោះនាងមានសាច់កាចសាហាវពេក។
អ្នកស្រី សុស ម៉ារី បាននាំកូនវិលទៅផ្ទះវិញ ទាំងអស់សង្ឃឹម។ ក្រោយមកស្រាប់តែមានជនជាតិអាមេរិកាំងម្នាក់ បានទៅនាំយកក្មេងស្រី ដែលមានជំងឺចម្លែកហើមថ្ពាល់មួយចំហៀងនេះ មកព្យាលបាននៅមន្ទីរពេទ្យ រ៉ូស្សី ម្ដង។ នៅលើកនេះ ការសម្រាកព្យាបាលទាំងអស់ដែលជាបន្ទុកក្នុងការព្យាបាលជំងឺដ៏ចម្លែកនេះ ត្រូវបានឧបត្ថម្ភឲ្យទាំងស្រុង ដោយលោក ហ៊ុន ម៉ាណែត កូនប្រុសរបស់លោក ហ៊ុន សែន នាយករដ្ឋមន្ត្រីកម្ពុជា។ នេះបើតាមការអះអាងរបស់ស្ត្រីជាម្ដាយរូបនេះ។
រហូតមកទល់ពេលនេះកុមារី សា ណាស់ បានកំពុងសំរាកព្យាបាលនៅមន្ទីរពេទ្យរុស្សីបានចំនួន ៤ថ្ងៃហើយ ហើយនាងនឹងត្រូវធ្វើការវៈកាត់ម្តងទៀតបន្ទាប់ពីគ្រូពេទ្យចាក់សារធាតុគីមីនៅត្រង់ចំណុចហើមនោះរួច។ គ្រូពេទ្យបានប្រាប់ម្តាយរបស់ សា ណាស់ថាការវៈកាត់នេះមិនប្រាកដថានឹងជួយឲ្យនាងជាសះស្បើយ ១០០ភាគរយនោះទេ ប៉ុន្តែពួកគាត់នឹងព្យាយាមធ្វើយ៉ាងណាឲ្យការវៈកាត់នេះទទួលបានជោគជ័យ។
គួរបញ្ជាក់ថា ក្រៅពីទទួលការឧបត្ថម្ភសំរាប់ថ្លៃព្យាបាលពីលោក ហ៊ុន ម៉ាណែត កុមារីនេះក៍បានទទួលប្រាក់ឧបត្ថម្ភពីសម្បុរសជនទាំងក្នុង និងក្រៅស្រុងផងដែរ តាមរយៈក្រុមយុវជនមួយឈ្មោះ កម្ពុជាជាទីស្រលាញ់ (Cambodia is my love )៕
គ្រួសាររបស់ក្មេងដែលមានជំងឺចំលែកនេះ មានទីលំនៅ នៅខេត្តកោះកុង មានមុខរបរជាអ្នកនេសាទត្រី។ អ្នក ស្រី សុស ម៉ារី បាននិយាយទៀតថាគ្រួសាររបស់គាត់គ្មានមុខរបរពិតប្រាកដ ក្រៅតែប្រកបរបរជាអ្នកនេសាទត្រី រកព្រឹកហូបព្រឹក រកល្ងាចហូបល្ងាចប៉ុណ្ណោះ៕