មន្ត្រី​អង្គការ​សង្គម​ស៊ីវិល​មួយ​រូប លោក ឆាយ ធី ដែល​ជា​ប្រធាន​សមាគម​ការពារ​សិទ្ធិ​មនុស្ស អាដហុក ប្រចាំ​ខេត្ត​រតនៈគីរី បាន​បង្ហើប​ប្រាប់​ទស្សនាវដ្តី​មនោរម្យ.អាំងហ្វូ នា​រសៀល​ថ្ងៃ​ទី​២៩ ខែ​មករា នេះ​ថា លោក​មិន​ទាន់​មាន​ជំនឿ​ថា ការ​ស្លាប់​នេះ បណ្តាល​មក​ពី​ការ​ឆ្លង​ចរន្ត​អគ្គិសនី ហើយ​ឆេះ​ស្លាប់​នោះ​ឡើយ។ ព្រោះ​ថា​ប្រភេទ​ផ្ទះ​សំណាក់​នេះ ខ្សែរ​ភ្លើង​ទាំង​អស់ ត្រូវ​បាន​បង្កប់​ក្នុង​ជញ្ជាំង​ថ្ម ឬ​លាក់​ក្នុង​ពិដាន​ទាំង​អស់។

លោក​បាន​ពន្យល់​ថា៖ «ការ​ស្លាប់​ដោយ​សារ​ទុស្សេ​ខ្សែរ​ភ្លើង​ឆេះ​ស្លាប់ វា​មិន​ទំនង​សោះ។ ឯ​សភាព​សាក​សព ភ្លើង​នោះ​មិន​បាន​ឆេះ​ដល់​ពូក ភួយ ខ្នើយ ឬ​សម្លៀក​បំពាក់ សម្ភារៈ​ក្នុង​បន្ទប់ ក្រៅ​ពី​ឃើញ​មាន​ការ​ឆេះ​រោល​ជា​ផ្សែង នៅ​លើ​ពិដាន​ប៉ុណ្ណោះ។ (…) ខ្សែរ​ភ្លើង​នៅ​ផ្ទះ​សំណាក់ ដាក់​ដោយ​មាន​សុវត្តិភាព មិន​ដូច​នៅ​ទី​សាធារណៈ​ទេ។ នេះ​ហើយ ដែល​នាំ​ឲ្យ​មាន​ការ​សង្ស័យ។ (…) បើ​តាម​ការ​ឆេះ មិន​អាច​ដល់​ថ្នាក់ នាំ​ឲ្យ​មាន​មនុស្ស​ស្លាប់​នោះ​ឡើយ ហើយ​មនុស្ស​អាច​រត់​គេច​ខ្លួន​បាន។»

យ៉ាងណាក៏ដោយ មន្រ្តីអាដហុករូបនេះ មិនអាចបញ្ជាក់ថា តើនឹងមានហេតុការណ៍អ្វីក្រៅពីនោះឡើយ។ លោកគ្រាន់តែដាក់ការសង្ស័យថា អាចនឹងមានរឿងហេតុកើតឡើង ក្រៅពីករណីភ្លើងឆេះ ដោយឆ្លងចរន្ត​អគ្គីសនី។ ហេតុការណ៍ភ្លើងឆេះនេះ កើតឡើងនាវេលាម៉ោង៦និង៣០ នាទីព្រឹកថ្ងៃទី២៩ ខែមករា ឆ្នាំ២០១៥ ស្ថិតនៅភូមិជ័យជំនះ សង្កាត់ឡាបានសៀក ក្រុងបានលុង ខេត្តរតនគីរី។

ស្រ្តីម្នាក់ជាអ្នកបំរើការ នៅហាងការ៉ាអូខេមួយ នាក្រុងបានលុង ឈ្មោះ លី លី អាយុ ២១ឆ្នាំ ជនជាតិខ្មែរ មក​ពីខេត្តតាកែវ។ នាងជាភ្ញៀវស្នាក់នៅផ្ទះសំណាក់ ឈ្មោះ ឆាយ វ៉ាង ក្នុងក្រុងបានលុង ខេត្តរតនគិរី ត្រូវបាន​ភ្លើងឆេះស្លាប់ភ្លាមៗក្នុងដំណេក នៅបន្តប់លេខ៣២ នៃផ្ទះសំណាក់ ឆាយ វ៉ាង។ ឯបុរសម្នាក់ ជាប្រុសស្នេហ៍​របស់នាង ដែលបានស្នាក់នៅជាមួយនោះ ឈ្មោះ កុល រិទ្ធី អាយុ២៧ឆ្នាំ មកពីខេត្តព្រៃវែង រងរបួសធ្ងន់លើ​ដៃ​ម្ខាង ដោយសាររលាកភ្លើង។

មកទល់ពេលនេះ បុរសជាសង្សារបស់ស្រ្តីរងគ្រោះ ដោយភ្លើងឆេះស្លាប់នោះ បានរួចជិវិតពីភ្លើង ហើយក៏​កំពុង​ស្នាក់នៅព្យាបាល ក្នុងមន្ទីរពេទ្យបង្អែកខេត្តដែរ ក្រោមការឃ្លាំមើលរបស់សមត្ថកិច្ច។ បុរសម្នាក់នេះ នៅមិនទាន់មានការសាកសួរណាមួយ ពីសមត្ថកិច្ចនៅឡើយ។ ប្រុសស្នេហ៍រូបនេះ នឹងផ្តល់ចម្លើយ​ជុំវិញ​ករណីភ្លើងឆេះ ដល់សមត្ថកិច្ចជំនាញនារសៀលថ្ងៃទី២៩ ខែមករានេះ។ នេះបើតាមការបញ្ជាក់របល់លោក ឆាយ ធី។

យ៉ាងណាមកទល់ព្រឹកថ្ងៃទី៣០ ខែមករានេះ ទស្សនាវដ្តីមនោរម្យ.អាំងហ្វូ មិនទាន់មានការបញ្ជាក់ជាថ្មី​នៃ​ការ​ស្លាប់របស់ស្រ្តី និងការសួរនាំលើបុរសរងគ្រោះនោះ នៅឡើយដែរ។ តែក្រោយហេតុការណ៍ឆេះ និងពន្លត់​ភ្លើង​រួចរាល់ សមត្ថកិច្ចដែលបានចុះអន្តរាគមន៍ បានត្រឹមតែបង្ហាញថា ជាករណីទុស្សេខ្សែរភ្លើង ព្រោះក្រោយ​ការ​ពិនិត្យឃើញភ្លាមៗ ឃើញថា ភ្លើងចាប់ផ្តើមឆេះពិដាន និងកង្ហារខ្ទេចខាងលើអស់។ ហើយភ្លើងនេះ ផ្តើម​ចេញពីបន្ទប់លេខ៣២ នេះតែម្តង។

រីឯម្ចាស់ផ្ទះសំណាក់ ឈ្មោះ ឆាយ វ៉ាង មិនបានបំភ្លឺហេតុការណ៍ជុំវិញនៃការស្លាប់នោះឡើយ។ តាមការ​ស្រង់​សំដីដោយលោក ឆាយ ធី បានបញ្ជាក់ថា ម្ចាស់ផ្ទះសំណាក់នោះ មិនបាននិយាយអ្វីផ្សេង ក្រៅពីការភ័យ​និង​ឆោឡោជាមួយនឹងភ្លើងឆេះនេះ។ ម្ចាស់ផ្ទះគ្រាន់តែបង្ហើបថា មុនពេលកើតហេតុ ឃើញមានផ្សែងហុយ នា​ផ្នែក​ខាងក្រោយជាន់ទីពីរ។ ផ្សែងកាន់តែខ្លាំងឡើង ក៏មានការផ្អើលឆោឡោឡើង និងបានហៅរថយន្តពន្លត់​អគ្គិភ័យជួយបាញ់ទឹកពន្លត់។

មន្រ្តីសិទ្ធិមនុស្សអាដហុកដដែល បានបន្ថែមថា ក្រោយការពិនិត្យលើសាកសពរួច មន្ត្រីបច្ចេកទេស និង​កោសល្យវិច្ឆ័យ របស់អធិការដ្ឋានព្រហ្មទណ្ឌកំរិតធ្ងន់ នៃស្នងការនគរបាលខេត្តរតនគីរី មិនបានបង្ហាញនូវ​របាយការណ៍លំអិតនៅឡើយ។ ឯសពស្រ្តីរងគ្រោះ បានយកទៅតំកល់នៅក្នុងវត្តភូមិថ្មី រងចាំសាច់ញាតិ មក​ទទួលយកទៅធ្វើបុណ្យ។ លោកនឹងតាមដានករណីនេះជាបន្តទៀត នូវភាពមិនប្រក្រតីនេះ។ ហើយភាព​អាថ៌កំបាំងនេះ ក៏ត្រូវបានក្រុមសមត្ថកិច្ច រួមនឹងសាធារណៈជនផង ដាក់ការសង្ស័យដូចគ្នាដែរ៕