បន្ទាយមានជ័យ៖ ពលរដ្ឋថាមន្រ្តីថ្នាក់ខេត្ត ចុះទៅវាស់ដីអត់ប្រាប់ដំណឹង
- ដោយ: ក. សោភណ្ឌ អត្ថបទ៖ ក.សោភ័ណ្ឌ ([email protected]) - យកការណ៍៖ ហេង វុទ្ធី - ភ្នំពេញថ្ងៃទី២៩ មករា ២០១៥
- កែប្រែចុងក្រោយ: January 30, 2015
- ប្រធានបទ: ដីធ្លី
- អត្ថបទ: មានបញ្ហា?
- មតិ-យោបល់
-
ជម្លោះដីធ្លី ជាបញ្ហាដ៏ស្មុគស្មាញ ជាពិសេសវាជារឿងមួយ ដែលបង្កឲ្យមានរឿងរ៉ាវមិនចេះចប់ រវាងភាគីដែលមានទំនាស់។ ហើយជម្លោះដីធ្លី នៅឃុំអូបីជាន់ ស្រុកអូជ្រៅ ខេត្តបន្ទាយមានជ័យ ក៏បានបង្កឲ្យមានបញ្ហាចាក់ស្រេះ ពិបាកក្នុងការដោះស្រាយនោះដែរ បើទោះជាមានការសន្យាជាច្រើន ពីមន្ត្រីសាធារណៈ ថានឹងជួយដោះស្រាយឲ្យប្រជាពលរដ្ឋក៏ដោយ តែការសន្យាទាំងនោះ ហាក់គ្រាន់តែជាខ្យល់បក់ផាត់ចោលប៉ុណ្ណោះ។ ផ្ទុយទៅវិញ គេបែរជាឃើញមន្ត្រីថ្នាក់ខេត្តនាំគ្នាមកវាស់វែងដី ដោយមិនបានជូនដំណឹងជាមុន នោះថែមទៀត។ នេះបើតាមការអះអាងរបស់ពលរដ្ឋ ដែលរងគ្រោះនឹងបញ្ហាដីធ្លី នៅតំបន់នោះ។
អ្នកស្រី ឡុង សុគន្ធី ជាតំណាងពលរដ្ឋទាំ៣១០គ្រួសារ ដែលមានបញ្ហានៅលើដីនេះ បាននិយាយនៅថ្ងៃទី២៩ ខែមករា ឆ្នាំ២០១៥នេះថា គាត់និងអ្នកភូមិមិនសុខចិត្តទេ ព្រោះថាអ្នកចុះមកធ្វើការវាស់វែង មិនផ្តល់ដំណឹងមុន។ មិនតែប៉ុណ្ណោះ មានការរំកិលតាមផែនទីចាស់ទៀត ធ្វើឲ្យអ្នកភូមិគាត់មិនយល់ស្រប តាមការវាស់វែងនេះទេ។ អ្នកស្រីបន្តថា ការកាត់ដីមិនប្រក្រតី ក្រុមពលរដ្ឋមិនព្រម ព្រោះកាត់ដីពីភូមិថ្នល់បត់ ទៅភូមិបឹងស្នោទៅវិញ។
ការថ្លែងរបស់តំណាងពលរដ្ឋរូបនេះ បានធ្វើឡើងបន្ទាប់ពីក្រុមការងារមួយក្រុម ដឹកនាំដោយលោក ចុង ផែន អភិបាលរងខេត្តបន្ទាយមានជ័យ បានចុះទៅកាន់តំបន់នោះកាលពីរសៀលម៉ោង២ ថ្ងៃទី២៨ ខែមករា ឆ្នាំ២០១៥នេះ ហើយបានធ្វើការដៅ និងបោះបង្គោល នៅលើដីដែលកំពុងមានបញ្ហានោះ។
អ្នកស្រី សុគន្ធី បានបញ្ជាក់បន្តថា នៅមិនទាន់មានអ្នកណាមួយ ជួយធ្វើអន្តរាគមន៍នោះទេ ហើយអ្នកភូមិបានដាក់ពាក្យបណ្តឹងនេះ ទៅឃុំអូបីជាន់ហើយ ក្នុងការដែលមានរឿងវាស់ដីតាមផែនទី ដោយមិនមានភាពប្រក្រតីនេះ តែមេឃុំមិនទាន់ហៅពួកគាត់ ទៅប្រជុំនៅឡើយ។
ផ្ទុយទៅវិញ អ្នកដែលចូលរួមក្នុងសកម្មភាពខាងលើនេះ លោក ចុង ផែន អភិបាលរងខេត្តបន្ទាយមានជ័យ បានបដិសេធន៍ទាំងស្រុងទៅនឹងអ្វីដែល ប្រជាពលរដ្ឋបានលើកឡើង។ លោកថា លោកមិនបានចុះទៅវាស់ដីនោះទេ គឺលោកចុះទៅពិនិត្យព្រំប្រទល់ដី រវាងស្រុកពីរ គឺស្រុកអូជ្រៅ និងស្រុកស្វាយចេក។ លោកអះអាងទៀតថា លោកត្រឹមជាអភិបាលរងខេត្ត គ្មានសិទ្ធអីទៅវាស់ដីឲ្យពលរដ្ឋនោះទេ។ លោកបានថ្លែងឲ្យដឹងថា៖ «ខ្ញុំគ្រាន់តែចុះទៅពិនិត្យព្រំប្រទល់ដីប៉ុណ្ណោះ ខ្ញុំគ្មានសិទ្ធអីទៅវាស់ដីឲ្យអ្នកស្រុកនោះទេ!»។
អភិបាលរងរូបនេះ បានរៀបរាប់ថា ការដែលលោកចុះទៅនេះ គឺដោយសាមានសំបុត្រពីក្រសួងមហាផ្ទៃ ដែលចេញឲ្យកំណត់ព្រំប្រទល់ដី។ ដូច្នេះ លោកគ្រាន់តែធ្វើតាមអ្វី ដែលជាផែនទីរបស់ក្រសួងមហាផ្ទៃប៉ុណ្ណោះ។ លោកបញ្ជាក់ថា ការចុះធ្វើនេះ មានការចូលរួមពីមន្រ្តីមូលដ្ឋានផងដែរ និងមានការដឹងលឺពីអភិបាលខេត្តទៀតផង។
សូមរំលឹកដែរថា កាលពីព្រឹកថ្ងៃទី២៣ ខែមករា ឆ្នាំ២០១៥ កន្លងមកនេះ មានផ្ទុះការតវ៉ាមួយឡើង របស់ប្រជាពលរដ្ឋដែលមានបញ្ហាដីធ្លី នៅក្នុងស្រុកអូជ្រៅ ខេត្តបន្ទាយមានជ័យ នៅដើម្បីសុំឲ្យមន្រ្តីដែលជាប់ពាក់ព័ន្ធ ជាពិសេសអភិបាលខេត្តបន្ទាយមានជ័យ ឲ្យជួយអន្តរាគមន៍ក្នុងការធ្វើប្លង់កម្មសិទ្ធិឲ្យប្រជាពលរដ្ឋទាំង១៥៦ គ្រួសារ នៅលើទំហំដី ៧៨០ហិចតា មានដីជាប់គ្នាពីរភូមិគឺភូមិ ថ្នល់បត់ និងភូមិ បឹងស្នោ៕
» សូមអានអត្ថបទដែលទាក់ទង ដោយចុចនៅលើទីនេះ។