«ដូងយក្ស» ប្រភេទក្ដាមធំជាងគេលើលោក បង្ហាញខ្លួននៅហាវ៉ៃ (vdo)
- ដោយ: ដារី អត្ថបទ៖ ដាវី ([email protected]) - ប៉ារីស ថ្ងៃទី២៩ មករា ២០១៥
- កែប្រែចុងក្រោយ: February 02, 2015
- ប្រធានបទ: ពីនេះពីនោះ
- អត្ថបទ: មានបញ្ហា?
- មតិ-យោបល់
-
«វាបានដើរគើមៗ ដូចគ្មានជំពាក់នរណាមួយរៀល។ ហើយមនុស្សទាំងអស់គ្នា ទាំងឡានទាំងម៉ូតូ ត្រូវតែនាំគ្នាបង្អន់ល្បឿន ដើម្បីទុកឲ្យសត្វក្ដាមមួយនេះ ធ្វើដំណើរ ដូចជាវាជាមនុស្សថ្មើរជើងអញ្ចឹង។» នេះជាការថ្លែងអះអាងរបស់លោក ហូលី កានតេរ៉េ ប្រាប់ទៅទូរទស្សន៍ក្នុងតំបន់មួយ ឈ្មោះ KHON-2។
ក្ដាម«ដូងយក្ស»ជាប្រភេទក្ដាមសមុទ្រដែលធំជាងគេ ក្នុងពិភពលោក។ ប៉ុន្តែក្ដាមដែលយើងឃើញក្នុងវីដេអូ ឬរូបថតនេះ មានទំងន់ត្រឹមតែ២គីឡូក្រាមប៉ុណ្ណោះ ខណៈប្រភេទសត្វមួយនេះ អាចមានទម្ងន់រហូតដល់៤គីឡូក្រាម មានប្រវែងពីចុងជើងទៅមួយជើងមួយទៀត ១ម៉ែត្រ និងអាចរស់បានរហូតដល់ទៅ១២០ឆ្នាំ។
នៅលើកោះហាវ៉ៃ សត្វនេះជាប់ឈ្មោះ ខាងតោងឡើងគាស់ធុងសម្រាម ចាប់សត្វឆ្មារជាចំណី និងពូកែខាងព្យួរាស់ដី (ជាពិសេសសួនច្បារ) ដោយគ្មាននរណាសុំឲ្យធ្វើ។ មានរឿងមួយ ដែលអ្នកស្រុកបានសង្ស័យតៗគ្នាថា ស្ត្រីអ្នកបើកបរយន្ដហោះ Amelia Earhart បានបាត់ខ្លួន ទំនងជាដោយសារតែសត្វក្ដាមប្រភេទនេះ ជាច្រើនក្បាល«ចាប់ស៊ី» បន្ទាប់ពីយន្ដហោះរបស់អ្នកស្រី បានធ្លាក់បោកខ្លួននៅលើកោះ តាំងពីឆ្នាំ១៩៣៧។
ឈ្មោះ«ដូងយក្ស»ដោយសារតែទំហំរបស់វា និងតង្កៀបបរបស់សត្វក្ដាមនេះ អាចកៀបបំបែកលលាដ៏ដូងមួយបាន យ៉ាងងាយស្រួលជាទីបំផុត។
បន្ទាប់ពីបានឃើញក្ដាមនេះរួច លោក ហូលី បានចាប់វាទុកដាក់ប្រអប់ដ៏ធំមួយ មុននឹងទូរស័ព្ទទៅនាយកដ្ឋានកសិកម្មរបស់កោះ ឲ្យមកយកសត្វនេះទៅថែរក្សា។ ប៉ុន្តែដំណឹងចុងក្រោយ បានឲ្យដឹងថា គេបានយកវាទៅចិញ្ចឹមនៅក្នុងសួនសត្វមួយ នៃក្រុង ហូណូលូលូ។ បើការវាយលុករបស់សត្វក្ដាមប្រភេទនេះ អាចកើតមានមែននោះ គ្រោះមហន្តរាយអាចនឹងកើតមាន ដោយហេតុថា វាអាចស៊ីនូវគ្រោះអ្វីៗ ដែលធ្លាក់ពីលើ ឬប៉ះតង្កៀបរបស់វា។ បើវាឃ្លានខ្លាំង វានឹងស៊ីនូវសត្វណាក៏ដោយ ដែលវាមើលឃើញមុនគេ រាប់ទាំងសត្វ«មនុស្ស»ផង៕