លោក ព្រាប កុល នាយកប្រតិបត្តិ អង្គការតម្លាភាពកម្ពុជា បានបង្ហាញជំហរ យ៉ាងមុតមាំថា តំបន់អារ៉ែង អាចជាព្រៃឈើ ដែលកម្រចុងក្រោយ នៅប្រទេសកម្ពុជា។ ដូចច្នេះលោកចង់ ឲ្យកូនខ្មែរជំនាន់ក្រោយ យល់ដឹងឲ្យបានច្បាស់ ពីការ​ការពារ​ព្រៃដ៏កម្រមួយនេះ ជាពិសេសផ្តិតជារូបភាព សម្រាប់ទុកឲ្យអ្នកជំនាន់ក្រោយ បានដឹង។ នេះជាគោលបំណងមួយ ដែល​ធ្វើ​ឲ្យ​គម្រោង នៃការចុះទៅកាន់តំបន់នោះ ត្រូវបានលោករៀបចំធ្វើឡើង នៅក្នុងពេលខាងមុខនេះ។

ចំពោះពេលវេលា នៃការចុះទៅនោះ លោក ព្រាប កុល បានថ្លែងប្រាប់ទស្សនាវដ្តីមនោរម្យ.អាំងហ្វូ ឲ្យដឹងនៅថា នឹង​ធ្វើ​ឡើង នៅមុនចូលឆ្នាំខ្មែរខាងមុខ។ បន្ទាប់ពីកិច្ចសម្ភាស ជាមួយទស្សនាវដ្ដីក្រោយមក លោកបានសរសេរ នៅក្នុងទំព័រ​ហ្វេសប៊ុកផ្លូវការរបស់លោកថា គម្រោងនេះ នឹងធ្វើឡើង នៅថ្ងៃទី១៤ ទៅថ្ងៃទី១៥ ខែមិនា ឆ្នាំ២០១៥នេះ។

ប៉ុន្តែអ្វីដែលលោក មិនទាន់ច្បាស់នោះ គឺការអញ្ជើញតារាចម្រៀងមួយរូប គឺកញ្ញា មាស សុខសោភា ឲ្យចូលរួមក្នុង​ដំណើរ​នេះដែរ តែកញ្ញា នៅមិនទាន់មានការឆ្លើយតប ណាមួយនៅឡើយ។ លោកថា នៅក្នុងគម្រោងនេះ មានអ្នក​ចូល​រួម ប្រមាណ​ជាង២០០នាក់ ហើយមានការស្នាក់នៅ តំបន់អារ៉ែងនោះ មួយយប់។

នាយកប្រតិបត្តិ អង្គការតម្លាភាពកម្ពុជា បានបញ្ជាក់ទៀតថា លោកគាំទ្រ នូវការយកចិត្តទុកដាក់ ពីបញ្ហាព្រៃឈើរបស់​កញ្ញា មាស សុខសោភា ទើបលោកអញ្ជើញ ដោយរួមមានអ្នកគាំទ្រតំបន់អារ៉ែង មួយចំនួនទៀត ក៏ដូចជាអង្គការ​សង្គម​ស៊ីវិលផងដែរ។

ចំពោះការប្រកាសរបស់រដ្ឋាភិបាល ក្នុងការមិនឲ្យអភិវឌ្ឍន៍តំបន់អារ៉ែង ត្រូវបានលោក ព្រាប កុល សម្ដែងការ​អបអរ​សាទរ ប្រសិនបើការប្រកាសនេះ មានលក្ខណៈជាផ្លូវការ។ លោកបានពន្យល់ថា វាជារឿងត្រិមត្រូវ ដែលអ្នកដឹងនាំ ចង់​ការពារ​សម្បត្តិធម្មជាតិនោះ។ តែបើនៅបន្តអភិវឌ្ឍន៍តំបន់នេះទៀត លោកថា វានឹងបាត់បង់ព្រៃអារ៉ែងដ៏កម្រ ហើយ​ប៉ះ​ពាល់ធ្ងន់ធ្ងរដល់សត្វព្រៃ។ លោកបានបញ្ជាក់ថា ដំណើរទស្សនៈកិច្ចនេះ មិនមែនមានលក្ខណៈ ជាអង្គការណាមួយនោះទេ គឺក្នុងលក្ខណៈជាកូនខ្មែរ ដែលចង់ឃើញពីទិដ្ឋភាព ជាក់ស្តែងនៅតំបន់អារ៉ែង។ លោកលើកឡើងថា៖ «ខ្ញុំទៅនេះ ក្នុង​នាម​ជាពលរដ្ឋខ្មែរ មិនមែនជាអង្គការនោះទេ»។

កាលពីថ្ងៃទី២៤ ខែកុម្ភៈ ឆ្នាំ២០១៥ម្សិលម៉ិញនេះ លោកបានប្រាប់អ្នកសារព័ត៍មាន នៅក្នុងរដ្ឋសភាថា កំពុងតែទាក់ទងទៅកាន់អ្នកសិល្បៈ សង្គមស៊ីវិល យុវជន ព្រះសង្ឃ ដែលស្រឡាញ់ធនធានធម្មជាតិ ដើម្បីទស្សនាព្រៃអារ៉ែង។ លោកថែមទាំង បានថ្លែងអំណគុណ ដល់ស្ថាបនិកអង្គការ«មាតាធម្មជាតិ» លោក អាឡិច ដែលជាអ្នកបំផុស ទឹកចិត្តកូនខ្មែរមួយចំនួន ឲ្យស្រឡាញ់បរិស្ថានធម្មជាតិ ហើយលោកបានស្គាល់តំបន់អារ៉ែង តាមរយៈអង្គការនេះដែរ៕