យោងតាមទំព័រហ្វេសប៊ុក របស់លិតកម្មថោន បានឱ្យដឹងថា តារាចម្រៀងសំនៀងរដឺន ចេន សាយចៃ ដែលធ្លាប់ជាដៃគូ របស់តារាចម្រៀងខ្មែរសុរិន្ទដ៏ល្បី ឈ្មោះគឺលោក សុង សែង នោះ ត្រូវបានផលិតកម្មថោនជ្រើសរើស យក​ជាតារា​ចម្រៀង​ប្រចាំផលិតកម្ម។ បទចម្រៀងរបស់នាង ត្រូវបានផលិតកម្មថោន គ្រោងនឹងឲ្យចេញជាបទកន្ទ្រីមជាច្រើនបទ ដើម្បី​អបអរសាទរពិធីបុណ្យចូលឆ្នាំខ្មែរ ខាងមុខនេះ។

នៅលើជញ្ជាំងហ្វេសប៊ុករបស់ខ្លួន ថោនបានសសរសេរថា៖ «ស្វាគមន៍វត្តមានថ្មី របស់តារាចម្រៀងខ្មែរសុរិន្ទ ចេន សាយចៃ ដោយពេលនេះ សាយចៃ ជាតារាចម្រៀងប្រចាំផលិតកម្ម ថោន សូមរង់ចាំស្តាប់បទកន្ទ្រឹម ដែលចេញ​លក់​ឆាប់ៗ​នេះ។»

រយៈពេល ២-៣ថ្ងៃចុងក្រោយនេះរ ស្របពេលដែលផលិតកម្ម បានដឹកនាំក្រុមការងារ និងតារាសិល្បះ ដ៏ចែងចាំង​ជា​ច្រើនរូប ទៅថតបទចម្រៀង ត្រៀមអបអរបុណ្យប្រពៃណីខ្មែរ នៅក្នុងភូមិវប្បធម៌ ខេត្តសៀមរាប ដែលជាតំបន់​ទេសចរណ៍​របស់ខ្មែរនោះ គេក៏ឃើញមានវត្តមាន របស់តារាចម្រៀង ខ្មែរសុរិន្ទខាងលើផងដែរ។

ក្នុងអាយុ៣៤ឆ្នាំ អ្នកនាង ចេន សាយចៃ មានសម្បុរ​សណ្តែក​​បាយ សក់​​ស្លូត និង​មាន​មាឌ​មាំ បាន​សាង​កេរ្តិ៍​ឈ្មោះ​ល្បី​ តាម​រយ:​ការ​ច្រៀង​​«កន្ទ្រឹម»​ នៅក្នុងចំណោម អ្នកចម្រៀងកន្ទ្រឹម​ជា​ច្រើន​រូប​ទៀត ​នៅ​ក្នុង​ប្រទេស​ថៃ។ មានកំណើតកើត​ និងបច្ចុប្បន្នរស់នៅក្នុងខេត្ត​សុរិន្ទ្ទ ប្រទេស​ថៃ​ អ្នកនាង​ សាយចៃ តែងបានបង្ហាញភាពល្បីល្បាញរបស់ខ្លួន នៅក្នុងពិភព​សិល្បៈ​ខ្មែរ ដោយបានចេញទៅច្រៀងនៅបរទេស តាមសហគមន៍ខ្មែរនានា និងធ្លាប់មកបញ្ចេញថ្វីមាត់ នៅតាមកញ្ចក់​ទូរទស្សន៍ ក្នុងប្រទេសកម្ពុជា ​ជាច្រើនដង៕