មកដល់ពេលនេះ ការបាត់ខ្លួនរបស់យន្ដហោះ ប៊ូអីង (Boeing 777) មានរយៈពេលជិត១ឆ្នាំហើយ ប៉ុន្តែនៅតែគ្មាន​ពន្លឺណា​មួយ បង្ហាញថាយន្ដហោះ នៅទីណា ធ្លាក់ ឬផ្ទុះនៅលើអាកាសនោះដែរ។ សំនួរសួរថា តើយន្ដហោះដែលភ្ជាប់​ជើង​ហោះ​ហើរ MH370 ពីរដ្ឋធានី គូឡាឡំពួរ ប្រទេសម៉ាឡេស៊ី ឆ្ពោះទៅកាន់រដ្ឋធានីប៉េកាំង ប្រទេសចិន កាលពីថ្ងៃទី៨ ខែមិនា ឆ្នាំ​២០១៤ ជាមួយនឹងមនុស្ស២៣៩នាក់នោះ បានក្លាយជាអ្វីទៅហើយ?

បើតាមអ្នកជំនាញច្រើននាក់ ដែលបានធ្វើការវិភាគ ទៅលើទិន្និន័យផ្កាយរណប ថតពីដំណើរហោះហើរចុងក្រោយ របស់​យន្ដហោះ MH370 ចំណុចជាច្រើន បានដាក់ការសង្ស័យកាន់តែខ្លាំងឡើងៗ ថាយន្ដហោះរបស់ក្រុមហ៊ុនអាកាសចរណ៍ ម៉ាឡេស៊ីអ៊ែរឡាញមួយនេះ ប្រាកដជាត្រូវបាននរណាម្នាក់ នៅក្នុងបន្ទប់បើកយន្ដហោះ ចាប់ពង្រត់ទៅកាន់ទ្វីបទឹកកក អង់តាទីក។ ចំណុចសង្ស័យទាំងនេះ ត្រូវបានស្ថានីយទូរទស្សន៍ National Geographic របស់អាមេរិក យកមក​លំអិត នៅ​ក្នុង​ឯកសារមួយរបស់ខ្លួន ដែលនឹងត្រៀមបញ្ចាំងនាពេលខាងមុខ។

ដោយសារទិន្និន័យទាំងនោះ បានធ្វើឲ្យក្រុមអ្នកជំនាញខាងការស៊ើបអង្កេត ផ្នែកគ្រោះថ្នាក់យន្ដហោះ គិតថា យន្ដហោះ​បានបន្តផ្លូវហោះហើររបស់ខ្លួន ជាច្រើនម៉ោង បន្ទាប់ពីបានទាក់ទង លើកចុង​ក្រោយ​បង្អស់ មកការិយាល័យត្រួតពិនិត្យ​ដែន​អាកាស របស់ប្រទេសម៉ាឡេស៊ី។ ចេញពីចំណុចទាក់ទងចុងក្រោយនេះ យន្ដហោះបានបត់ឆ្វេងចំនួន៣ដង រហូត​ដល់​​ទិសដៅ​​របស់យន្ដហោះ ហោះឆ្ពោះទៅកាន់ទ្វីបទឹកកក អង់តាទីក។

ចលនាទាំងនេះ បានធ្វើឲ្យគេយល់ថា យន្ដហោះ MH370 ត្រូវបានចាប់​ពង្រត់យ៉ាង​ច្បាស់ ដោយនរណាម្នាក់ ដែលនៅ​ក្នុង​បន្ទប់បើកយន្ដហោះ។ លោក ម៉ាលកូម ប្រឺន័រ (Malcolm Brenner) អ្នកជំនាញ​អាមេរិកាំង​មួយរូប បានអះអាងថា យន្ដហោះនឹងមិនហោះរបៀបនេះទេ បើ​គ្មាន​នរណាម្នាក់បញ្ជា ឬប្រាប់ឲ្យអ្នក​បើក​យន្ដហោះ បញ្ជាវា។ រីឯទិសដៅ​ចុង​ក្រោយ របស់យន្ដហោះ ត្រូវបានអ្នកជំនាញ​បញ្ជាក់ថា ជាការហោះហើរឆ្ពោះទៅកាន់ ទ្វីបទឹកកក អង់តាទីក បើទោះជា​បរិមាណប្រេងសាំង នៅលើយន្ដហោះ មាន​លក្ខណៈប្រផិតប្រផើយក៏ដោយ។ សម្រាប់​អ្នកជំនាញ ការសង្ស័យនេះ នឹង​មានកាន់តែច្រើនទៀត  រហូតលុះត្រាតួ​យន្ដហោះ ត្រូវបានរកឃើញ។

ឯកសាររបស់ទូរទស្សន៍ National Geographic ជុំវិញការបាត់ខ្លួន យ៉ាងអាថ៌កំបាំងរបស់យន្ដហោះ MH370 នឹងត្រូវចាក់​ផ្សាយ នៅថ្ងៃ​ទី៨ ខែមិនាខាងមុខ សម្រាប់ការផ្សាយរបស់ខ្លួន នៅ​ក្នុងប្រទេសអង់គ្លេស។

កាលពីចុងខែមករាកន្លងទៅ ប្រទេសម៉ាឡេស៊ី បានប្រកាសជាផ្លូវការថា ករណីរបស់យន្ដហោះនេះ ជា«គ្រោះថ្នាក់» ហើយ​​មនុស្សនៅលើយន្ដហោះ ទាំង២៣៩នាក់ ត្រូវបានចាត់ទុកថា បានស្លាប់ទាំងអស់។ តែការរុករកតួយន្ដហោះ នៅតែ​បន្ត​ធ្វើ​​នៅ​ឡើយ ដោយនាវាសមុទ្រចំនួនបួន នៅលើផ្ទៃក្រឡារុករក ប្រមាណជាជាង២០០ ០០០​គីឡូម៉ែត្រ​ការ៉េ។ អាជ្ញាធរ​អូស្ត្រាលី ដែលទទួល​បន្ទុក​ខាងរុករកនេះ បានថ្លែងថា ការរុករកនៅក្នុងសមុទ្រឥណ្ឌាខាងត្បូង នឹងបិទ​បញ្ចប់​នៅ​ខែ​ឧសភា​ខាងមុខ ហើយ​របាយ​ការណ៍​ជំហានដំបូងមួយ ពីការរុករុកកន្លងមក នឹងត្រូវផ្សាយឲ្យដឹង នៅថ្ងៃទី៧ ខែមិនា​៕