ការអនុញ្ញាតឱ្យមន្ត្រី នគរបាល យោធា តុលាការ និងមន្ត្រីរាជការស៊ីវិល អាចមានសិទ្ធិចូលរួម ឃោសនាបោះឆ្នោត និង​ហាមឃាត់ ចំពោះអង្គការសង្គមស៊ីវិល ទាំងជាតិ និងអន្តរជាតិ បាននឹងកំពុងអនុវត្តផ្ទុយ ដោយរំលោភ ទៅលើច្បាប់​រដ្ឋ​ធម្មនុញ្ញ។ នេះបើតាមការអះអាងរបស់លោក អំ សំអាត មន្រ្តីសម្របសម្រួលផ្នែកបច្ចេកទេស នៃអង្គការលីកាដូ។

លោក អំ សំអាត បានថ្លែងរៀបរាថា ប្រជាពលរដ្ឋ រួមទាំងអង្គការសង្គមស៊ីវិល ចង់ឱ្យមន្ត្រី នគរបាល យោធា តុលាការ និង​មន្ត្រីរាជការស៊ីវិល ឈរលើជំហរឯករាជ្យភាព។ គាត់អាចមានសិទ្ធិ ស្រលាញ់គណបក្សយោបាយណាមួយ ប៉ុន្តែ​ការ​បំពេញតួនាទីរបស់ពួកគាត់ ត្រូវតែអព្យាក្រិត ប្រសិនបើអនុញ្ញាតឲ្យមន្ត្រី នគរបាល យោធា តុលាការ និងមន្ត្រី​រាជការ​ស៊ីវិល អាចមានសិទ្ធិចូលរួម ឃោសនាបោះឆ្នោតបាន មានន័យថា ការបំពេញតួនាទីរបស់គាត់ លែងអព្យាក្រិត្យហើយ។ លោកបាននិយាយថា៖ «អញ្ចឹង នៅពេលដែលគណបក្ស របស់ពួកគាត់មានបញ្ហា គាត់អាចនឹងធ្វើអ្វីដើម្បីគាំទ្រ?»។

ការលើកឡើងរបស់មន្រ្តីអង្គការសង្គមស៊ីវិល បានធ្វើឡើង បន្ទាប់ពីលោក ប៊ិន ឈិន ប្រធានក្រុមចរចា របស់គណបក្ស​ប្រជាជនកម្ពុជា បានបញ្ជាក់ថា គណបក្សជាប់ឆ្នោតទាំងពីរ បានសម្រេចឯកភាពគ្នា កំណត់នៅក្នុងច្បាប់បោះឆ្នោតថ្មី អនុញ្ញាតឱ្យមន្ត្រី នគរបាល យោធា តុលាការ និងមន្ត្រីរាជការស៊ីវិល អាចមានសិទ្ធិ ចូលរួមឃោសនាបោះឆ្នោតបាន និង​ធ្វើការហាមដាច់ខាត មិនឱ្យមន្ត្រីអង្គការសង្គមស៊ីវិលទាំងអស់ ទាំងនៅក្នុងស្រុក និងនៅក្រៅស្រុក រួមទាំងជន​បរទេស​ផង ចូលរួមឃោសនាបោះឆ្នោត។

លោក អំ សំអាត យល់ថា បើបញ្ហានេះបញ្ចូលទៅក្នុងច្បាប់ អាណត្តិក្រោយ នឹងមានបញ្ហាកាន់តែធ្ងន់ធ្ងរថែមទៀត សម្រាប់​វិបត្តិនៃភាពជាប់គាំងនយោបាយ ក្រោយពេលបោះឆ្នោត។

បើតាមលោក ប៊ិន ឈិន ដែលបានថ្លែង នៅក្នុងសន្និបាតបូកសរុបការងារ របស់ក្រសួងដែនដីនគរូបនីយកម្មបានឱ្យដឹងថា មន្ត្រី នគរបាល យោធា និងតុលាការ ដែលចូលរួមឃោសនាបោះឆ្នោតនោះ ត្រូវហាមមិនឲ្យគំរាមកំហែងអ្នកដទៃ ពាក់​សក្តិ ឬយកអាវុធតាមខ្លួន ក្នុងពេលឃោសនានោះឡើយ។ ប៉ុន្តែបញ្ហានេះ ត្រូវបានលោក អំ សំអាត ពន្យល់ថា៖ «ខ្ញុំគិតថា ឥទ្ធិពលវានៅតែមាន និយាយឱ្យចំទៅ ពីព្រោះបើសិនជាកូនចៅហើយ មេជាកងកម្លាំងជានាយទាហាន កូនចៅវា​ត្រូវ​តែ​មាន​ការខ្លាច ហើយអញ្ចឹងឥទ្ធិពលវានៅតែមាន»។

ចំណែកលោក គល់ បញ្ញា នាយកប្រតិបត្តិអង្គការខមហ្វ្រេល បានលើកឡើងថា ការដាក់បញ្ចូលការហាមឃាត់ មិនឱ្យ​អង្គការ​សង្គមស៊ីវិល ចូលរួមឃោសនាបោះឆ្នោត ទៅក្នុងច្បាប់បោះឆ្នោតថ្មី គឺជាការរំលោភសិទ្ធិនយោបាយទាំងស្រុង ទៅ​លើ​អង្គការសង្គមស៊ីវិល។

លោក គល់ បញ្ញា បានថ្លែងឲ្យដឹងទៀតថា៖ «ខ្ញុំមើលទៅ គំនិតរបស់គណបក្សទាំងពីរហ្នឹង គាត់មានបញ្ហា គាត់អត់យល់​ពីស្តង់ដា សេរីភាពរបស់ប្រជាពលរដ្ឋ គាត់គិតតែពីរឿងចាញ់ឈ្នះ។ បើក្រុមនេះគាំទ្រគាត់ គាត់ឱ្យសិទ្ធ។ បើអ្នកណា​អត់​គាំទ្រគាត់ គាត់ដកចេញអញ្ចឹងទៅ។ ហើយអ្នកណាមើលទៅ គម្រាបនៅក្នុងកិច្ចការងារ នៅក្នុងនយោបាយរបស់គាត់ គាត់​ដកចេញ។ អញ្ចឹងយើងមិនអាចយកច្បាប់មួយ ទៅធ្វើអញ្ចឹងបានទេ។»។

នាយកប្រតិបត្តិអង្គការខមហ្វ្រេល បានបញ្ជាក់បន្ថែមថា ប្រសិនបើក្រុមប្រឹក្សាធម្មនុញ្ញ និងតុលាការឯករាជ្យ បញ្ហានេះ នឹង​ត្រូវបានគេបដិសេធ ចាត់ទុកជាមោឃៈ។ លោកបានឱ្យដឹងផងដែរថា អង្គការសង្គមស៊ីវិល នៅតែទាមទារ​ដាក់​អនុសាសន៍ ឱ្យដកបញ្ញតិដែលថា ឱ្យអង្គការក្រៅរដ្ឋាភិបាល ត្រូវតែមានជំហរអព្យាក្រិតឥតលម្អៀង៕