ជាងថតរូបអាជីព លោក ម៉ាទីន លីម៉េ បានពន្យល់ប្រាប់សារព័ត៌មាន Huffington Post ចម្រុះភាសា ចេញផ្សាយ ក្នុង​ប្រទេស​អង់គ្លេសថា ឈុតឆាកដែលលោក បានប្រទះឃើញផ្ទាល់នឹងភ្នែកនេះ បានកើតឡើង ខណៈលោកកំពុង​ដើរ​កំសាន្ដ ជាមួយនឹងភរិយាលោក។ លោកចង់ឲ្យភរិយាលោកអាចមើល សត្វល្វាចេក យ៉ាងហោចណាស់ ក៏ជា​លើក​ទីមួយ​ដែរ។

លោក ម៉ាទីន បាននិយាយទៀតថា៖ «នៅពេលដែលយើងកំពុងតែដើរ យើងបានឮសម្លេងស្រែក ដ៏ស្រួយមួយឡើង ហើយ​ខ្ញុំបានមើលឃើញដំបូង តែសត្វស្លាប ពណ៌បៃតងមួយប៉ុណ្ណោះ»។

ល្វាចេក បានចុះមកលោតលេង នៅលើស្មៅ ដែលស្ថិតនៅមិនឆ្ងាយប៉ុន្មាន ពីពីរនាក់ប្ដីប្រពន្ធនេះ ដែលកំពុងមើលវា ដោយសារកែវយិត។ រំពេចនោះ ស្រាប់តែ គង់ហែន មួយក្បាលបានចេញមកសង្គ្រប់ ទៅលើ ល្វាចេក បំណងចាប់សត្វ​ស្លាបជាចំណី បង្កជាជម្លោះប្រតាយប្រតប់គ្នាឡើង ដែលធ្វើឲ្យសត្វ ល្វាចេក ចាំបាច់ត្រូវហោះដកខ្លួនចេញ។ តែដឹងអី សត្វ គង់ហែន តោងនៅពីលើខ្នង ល្វាចេក ជាប់។

ជម្លោះស្លាប់រស់

រូបថតរបស់លោក ម៉ាទីន បង្ហាញពី គង់ហែន តោងខ្នង ល្វាចេក ធ្វើដំណើរឡើងលើអាកាស ត្រូវបានបង្ហោះ ហើយបង្ក​ភាព​រញ្ជួលចិត្ត ដល់អ្នកទស្សនា ព្រោះវាមានលក្ខណៈធម្មជាតិ ដ៏គួរឲ្យស្រឡាញ់។ ប៉ុន្តែ បើគេដឹងពីការពិតវិញ វាមិន​អញ្ចឹង​ទេ តែជាជម្លោះស្លាប់រស់ រវាងសត្វទាំងពីរ។

សត្វទាំងឡាយ នៅក្នុងធម្មជាតិ (ខុសពីមនុស្ស) កម្រនឹកឃើញ ពីមនោរសញ្ចេតនាណាស់ ជាពិសេស នៅពេលដែលសត្វ​មួយ យល់ថាសត្វមួយទៀត ជាចំណីរបស់វា។ យ៉ាងណាក៏ដោយ ក៏ដំណើរឡើងលើអាកាស របស់សត្វទាំងពីរ បាន​ប្រព្រឹត្តិ​ទៅ តែមួយពព្រិចភ្នែកប៉ុណ្ណោះ ដោយទំនងជាសត្វទាំងពីរ បានដឹងថាមានមនុស្ស នៅក្បែរវា។ គង់ហែន បាន​ព្រលែង ល្វាចេក ហើយគេខ្លួនទាំងសោកស្ដាយ ចូលក្នុងគម្ពោធស្មៅ ខ្ពស់ៗបាត់ស្រមោល ខណៈឯ ល្វាចេក បាន​រួច​ខ្លួន​ពីគ្រោះអាសន្ន ហើយហោះចេញទៅបាត់ដែរ៕