«លំអៀងខ្លាំងណាស់ ឲ្យរៀបតែខាងនេះ ខាងនោះមិនឲ្យរៀបផង» ទាំងនេះជាសម្តី របស់មន្រ្តីកងរាជអវុធហត្ថ លើផ្ទៃ​ប្រទេស​ម្នាក់ ឈ្មោះ អ៊ឹម សារ៉េត រស់នៅសង្កាត់ផ្សារដើមគ ខណ្ឌទួលគោករាជធានីភ្នំពេញ ដែលត្រូវបានក្រុមការងារ​សណ្តាប់​ធ្នាប់ ខណ្ឌទួលគោក ចាប់ខ្លួនកាលពីថ្ងៃទី២៧ ខែកុម្ភៈ ឆ្នាំ២០១៥ វេលាម៉ោង៨ និង២០នាទីព្រឹក។ នេះជា​ហេតុការណ៍​ថ្មីមួយទៀត បង្កឲ្យមានការរអៀសចិត្ត ជាមួយអាជ្ញាធរមូលដ្ឋាន ក្រោមបញ្ជារបស់លោក ប៉ាង លីដា អភិបាល​រង​ខណ្ឌទួលគោក សម្រាប់ក្រសែភ្នែកអាជីវករជាច្រើន នៅក្នុងផ្សារដើមគ។

លោក អ៊ឹម សារ៉េត មន្ត្រីកងរាជអាវុធហត្ថ ដែលជាស្វាមីអាជីវកមួយរូប នៅផ្សារដើមគនោះ បានឲ្យទស្សនាវដ្តី​មនោរម្យ.អាំងហ្វូ​ដឹង នៅថ្ងៃទី០៥ ខែមិនានេះថា នៅព្រឹកនោះ គេបានចាប់លោកដាក់ឡាន បញ្ជូនទៅខណ្ឌ និងបន្ទាប់មក បានដោះ​លែង​វិញ កាលពីពេលថ្មីៗនេះ។ លោកថា គាត់ជាអ្នកធ្វើការដែរ តែលំអៀងស្តាប់តែម្ខាង យកផលប្រយោជន៍​ឲ្យ​ម្ខាង ហើយ​ម្ខាង​ទៀតចាំតែទទួលកំហុស ហើយការចាប់លោកទៅនោះ ជាបំណងដែលចង់ឲ្យលោករង នូវភាពអាម៉ាស​មួយ។

លោកថ្លែងឡើងថា អ្នកដែលគ្មានរបៀបរបប សណ្ដាប់ធ្នាប់ មានទូទាំងផ្សារ ហេតុអ្វីមិនចាប់ខ្លូនផង ហេតុអ្វីបានជាចាប់ តែរូបលោកទៅវិញ? លោកបញ្ជាក់ថា លោកធ្លាប់មានតួនាទីមួយសមរម្យ នៅក្នុងសង្គមដែរ តែលោក​អភិបាល​រង​ខណ្ឌ បានបញ្ជាកូនចៅ ឲ្យធ្វើទង្វើបែបនេះ ទាំងមិនបាននិយាយគ្នា ឲ្យច្បាស់លាស់។

យ៉ាងណាក៏ដោយ លោក អ៊ឹម សារ៉េត មិនបានដាក់ពាក្យបណ្តឹងណាមួយ ប្រឆាំងក្រុមមន្ត្រីអាជ្ញាធរមូលដ្ឋានទាំងនោះទេ ដោយសារតែលោកត្រូវបានដោះលែងហើយ។ តែ​អ្វី​ដែលសំខាន់ នៅអង្គភាពរបស់លោក នៅមិនទាន់ទទួល​បានការ​បក​ស្រាយ ឲ្យបានច្បាស់លាស់នៅឡើយ។

បន្ទាប់ពីមានរឿងរ៉ាវចាប់ខ្លូននោះ លោក កាន់ វុទ្ធី ជាអតីតមេបញ្ជាការ របស់លោក អ៊ឹម សារ៉េត បានឲ្យដឹងថា លោក​សួរ​នាំរឿងនេះ ជាមួយអភិបាលរងខណ្ឌ តែលោក ប៉ាង លីដា ហាក់ធ្វើមិនដឹងមិនឮ ពីបញ្ហាទាំងនេះ​ទេ ដោយគ្រាន់​តែ​ឆ្លើយ​តបថា មកពីលោក អ៊ឹម សារ៉េត តមាត់ជាមួយអ្នករៀបចំសណ្តាប់ធ្នាប់ ហើយមិនព្រមប្រគល់ថវិកាមួយចំនួន ឲ្យអ្នក​រៀប​ចំ។ តែលោក កាន់ វុទ្ធី បានបញ្ជាក់ថា បញ្ហាថវិកា ត្រូវបានប្រគល់គ្រប់ចំនួន ទៅអ្នករៀបចំផ្សារ គឺក្នុងមួយខែ​ ៥០ ០០០​រៀល ខណៈបញ្ហាសំខាន់ បណ្ដាលមកពីភាពអយុត្តិធម៌ រវាងអ្នកលក់ដូរនៅជិតគ្នា ដែលអភិបាលរងខណ្ឌបានអនុវត្តន៍។

មិនអាចទាក់ទង លោក ប៉ាង លីដា អភិបាលរងខណ្ឌទួលគោក ដើម្បីសុំប្រតិកម្ម ទៅលើការលើកឡើងខាងលើបានទេ នៅពេលភ្លាមៗនេះ៕