កម្មកររោងចក្រ អ៊ីហ្គាមេន ដាស់រឿង អាត់ ធន់ កេងប្រាក់ជាង ១០ម៉ឺនដុល្លា
- ដោយ: ក. វិច្ចនី អត្ថបទ និងយកការណ៍៖ ក. វិច្ចនី ([email protected]) - ភ្នំពេញ ថ្ងៃទី ២៥ មីនា ២០១៥
- កែប្រែចុងក្រោយ: March 25, 2015
- ប្រធានបទ: ពុករលួយ
- អត្ថបទ: មានបញ្ហា?
- មតិ-យោបល់
-
សំនុំរឿងក្ដីក្ដាំង ករណីកឹបកេងប្រាក់រំលឹក រវាងកម្មកររោងចក្រ អ៊ីហ្គាមេន និងលោក អាត់ ធន់ ប្រធានសម្ព័ន្ធសហជីព ប្រជាធិបតេយ្យកម្មករកាត់ដេរកម្ពុជា ហៅ ស៊ីខាវដូ (C.CAWDU) ដូចជាបានកម្រើកខ្លួន មកវិញ នៅក្នុងប៉ុន្មានថ្ងៃនេះ។ សំណុំរឿងនេះ ស្ថិតនៅក្នុងដៃចៅក្រមស៊ើបសួរ នៃសាលាដំបូងរាជធានីភ្នំពេញ នៅឡើយ និងមិនទាន់ដឹងថា តើតុលាការនឹងចាត់ការ យ៉ាងដូចម្ដេចនៅឡើយ។
រីឯក្រុមកម្មករ ដែលជាដើមបណ្ដឹងវិញ បានដាក់លិខិត១ច្បាប់ ដាក់ជូន ទៅប្រធានសាលាដំបូងរាជធានីភ្នំពេញ កាលពីថ្ងៃ ទី ១៧ ខែមីនាកន្លងមក ដើម្បីស្នើសុំឲ្យចាត់ការ តាមនិតិវិធី លើសំណុំរឿងរបស់ពួកគេ។ មិនត្រឹមតែប៉ុណ្ណឹង នៅព្រឹកថ្ងៃទី២៥ ខែមីនា ឆ្នាំ២០១៥នេះ ក្រុមកម្មករជាង ២០នាក់ ទាំងនោះ បានប្រមូលគ្នា ទៅកាន់ទូរទស្សន៍ប៉ុស្តិ៍ហង្សមាស ដើម្បីសុំឲ្យជួយ ផ្សព្វផ្សាយព័ត៌មាននេះ ទៅសាធារណៈជនបានដឹងបន្ថែមទៀត។
ពាក្យបណ្ដឹង របស់ក្រុមកម្មករទាំងនោះ ត្រូវបានដាក់ចូល ទៅសាលាដំបូងរាជធានីភ្នំពេញ កាលពីថ្ងៃទី៣ ខែមិនា ឆ្នាំ២០១៤ កន្លងទៅ ដោយបានចោទ ថ្នាក់ដឹកនាំសម្ព័ន្ធសហជីព ប្រជាធិបតេយ្យកម្មករ កាត់ដេរកម្ពុជា ថាបានកិបកេងប្រាក់រំលឹក របស់កម្មករ បន្ទាប់ពីមានការចរចា រវាងសហជីព និងនិយោជក ឲ្យក្រុមហ៊ុនយល់ព្រម ទទួលកម្មករ៦១នាក់ អោយចូលធ្វើការវិញ និងបើកប្រាក់រំលឹក ពីថ្ងៃបញ្ឈប់ រហូតដល់ថ្ងៃចូលធ្វើការវិញ។
» សូមអានអត្ថបទដែលទាក់ទងឡើងវិញ ដោយចុចនៅលើទីនេះ។
កម្មកររោងចក្រ អ៊ីហ្គាមេន មួយរូប លោក ចាន់ ពៅ បាននិយាយថា ក្រុមលោកបានទទួលប្រាក់ ពីលោកបានទទួលទឹកប្រាក់ ពីប្រធានសហជីពរួចរាល់ហើយ ប៉ុន្តែក្រុមកម្មករ បានទៅស្រាវជ្រាវរកឯកសារ ដើម្បីចង់ដឹងពីចំនួនទឹកប្រាក់ ដែលរោងចក្ររបស់ខ្លួន បានផ្តល់ឲ្យប្រធានសហជីពនោះម្តងទៀត ស្រាប់តែបានរកឃើញ ទឹកប្រាក់សរុប មានចំនួន ២២ម៉ឺនដុល្លា។ លោក ចាន់ ពៅ ថា រីឯក្រុមហ៊ុន អ៊ីហ្គាមេន បានបង្ហាញឯកសារ ដែលរួមមាន ទាំងវិក័យបត្រ ចេញពីធនាគារផងនោះ មានសាច់ប្រាក់សរុបចំនួន ២៤ ម៉ឺនដុល្លា ដែលបានដាក់ឲ្យលោក អាត់ ធន់ សំរាប់បើកឲ្យកម្មករ ជាប្រាក់រំលឹក។ ហើយចំនួនទឹកប្រាក់នេះ វាលើសពីចំនួន ដែលក្រុមកម្មករ បានរកឃើញជាង ២២ម៉ឺនដុល្លា ដូច្នេះប្រាក់ ដែលលោក អាត់ ធន់ បានកឹបកេងពីកម្មករនោះមិនតិចជាង ១០ម៉ឺនដុល្លានោះទេ។
លោក ចាន់ ពៅ បាននិយាយទៀតថា នៅពេលដែលក្រុមលោក បាននាំគ្នាទៅសុំបើកប្រាក់បន្ថែម ពីលោក អាត់ ធន់ ស្រាប់តែបានទទួលសម្ដី ពីលោក អាត់ ធន់ មកវិញថា លោកមិនមានប្រាក់បើកឲ្យទេ ហើយ«ទៅប្តឹងឯណាក៏ទៅទៅ»។
ជុំវិញការចោទប្រកាន់នេះ លោក អាត់ ធន់ បានថ្លែងបដិសេធ ក្នុងកិច្ចសម្ភាស ជាមួយទស្សនាវដ្ដីមនោរម្យ.អាំងហ្វូ នៅថ្ងៃទី២០ ខែកុម្ភៈ ឆ្នាំ២០១៤នេះកន្លងទៅ ថា ក្រុមលោកមិនបានប្រព្រឹត្តិ ការកិបកេងនេះទេ។ លោកបានថ្លែងថា «ពួកយើងស្អាតស្អំណាស់ ពួកយើងដាច់ខាតហើយ មិនប្រព្រឹត្តិអំពើពុករលួយនោះទេ
សូមរំលឹកដែរថា តុលាការ បានកោះហៅលោក អាត់ ធន់ ដែលជាប្រធាន និងថ្នាក់ដឹកនាំមួយចំនួនទៀត របស់សហជីព ស៊ីខាវឌូ ឲ្យចូលខ្លួនទៅបំភ្លឺរួចហើយ ពីករណីនេះ កាលពីថ្ងៃទី២ ខែមេសា ឆ្នាំ២០១៤ កន្លងទៅ។ នៅពេលចេញពីតុលាការមកវិញ លោក អាត់ ធន់ បានថ្លែងទៅកាន់ក្រុមអ្នកសារព័ត៌មានថា ការចោទប្រកាន់របស់កម្មករនេះ វាគ្រាន់តែជាចេតនាចង់បង្ខូចកេរ្តិ៍ឈ្មោះតែប៉ុណ្នឹងទេ និងចង់បំបែកបំបាក់ផ្ទៃក្នុងរបស់សហជីព ស៊ីខាវឌូ ដោយមាន«អ្នកនៅពីក្រោយខ្នង»
» សូមអានអត្ថបទដែលទាក់ទងនេះឡើងវិញ ដោយចុចនៅលើទីនេះ៕