សម្លេង ដែលត្រូវបានថតជាប់ នៅក្នុងប្រអប់ខ្មៅទីមួយ ចេញពីបន្ទប់បើកបរយន្ដហោះ បានបង្ហាញប្រាប់ អ្នកស៊ើប​អង្កេត​បារាំង ថា ក្នុងរយៈពេល២០នាទីដំបូង ការបញ្ជាយន្ដហោះ បានប្រព្រឹត្តិទៅដូចធម្មតា។ ប៉ុន្តែនៅ១០នាទី​ចុង​ក្រោយ បន្ទាប់ពីមេបញ្ជាការ បើកបរយន្ដហោះ បានចេញពីបន្ទប់បើកបរ ដើម្បីទៅដោះទុក្ខសត្វនោះ ជំនួយការបើកបរ បាន​ដាក់​គន្លឹះ​ទ្វា​បន្ទប់​បើកបរនោះ ហើយបានបញ្ជាយន្ដហោះ ឲ្យហោះចុះក្រោម រហូតមកបុក ជាមួយនឹងជញ្ជាំងភ្នំ។

នៅថ្ងៃទី២៤ ខែមីនា ឆ្នាំ២០១៥នេះ យន្ដហោះ របស់​ក្រុមហ៊ុន ហ្សែរមេនវីង (Germanwings) ដែលធ្វើអាជីវកម្មថោកថ្លៃ និងជាផ្នែកមួយ របស់ក្រុមហ៊ុនអាកាសចរណ៍ លូថានស្សា (Lufthansa) ក្រុមហ៊ុនដ៏ធំមួយទៀត របស់អាល្លឺម៉ង់ បាន​ជួប​គ្រោះថ្នាក់ធ្លាក់ បន្ទាប់ពីបានហោះភ្ជាប់ ជើងហោះហើរលេខ 4U9525 ពីក្រុង បាសឺឡូន (Barcelone) ប្រទេសអេស្ប៉ាញ ឆ្ពោះទៅ ក្រុង ឌូសែលដ័រ (Düsseldorf) ប្រទេសអាល្លឺម៉ង់ ជាមួយ​នឹងអ្នក​ដំណើរ ១៤៤នាក់ ព្រមទាំងបុគ្គលិកបម្រើ​លើ​យន្ដហោះ ៦នាក់។

អ្នកបើកបរយន្ដហោះ វ័យក្មេង...

រដ្ឋអាជ្ញាបារាំង លោក ប្រ៊ីស្ស រ៉ូបាំង (Brice Robin) ដែលទទួលបន្ទុកស៊ើបអង្កេត ករណីធ្លាក់យន្ដហោះនេះ បានថ្លែង​ឡើងថា៖ «ការបកស្រាយ ដែលមាននៅថ្ងៃនេះ (...) បង្ហាញយ៉ាងច្បាស់ថា ជំនួយការបើកបរយន្ដហោះ ជាមួយនឹង​បំណងច្បាស់លាស់ បានបដិសេធ មិនព្រមបើកទ្វា បន្ទប់បើកបរយន្ដហោះទេ»។ បន្ទាប់មក បុរសនេះ បានចុចប៊ូតុង ដែលធ្វើឲ្យបាត់លំនឹងយន្ដហោះ។ គេមិនដឹងថា តើទង្វើនេះ មានមូលហេតុអ្វី ឲ្យច្បាស់លាសនោះទេ ប៉ុន្តែទង្វើនេះ បានបង្ហាញថា ជំនួយការបើកបរ មានបំណងបំផ្លាញ យន្ដហោះ។

លោករដ្ឋអាជ្ញា បានបន្តទៀតថា ២០នាទីដំបូង ដែលបានស្ដាប់ឮ នៅក្នុងការថតសម្លេងនោះ មានលក្ខណៈធម្មតា ប៉ុន្តែ​ការតានតឹង ដូចបានផ្លាស់ប្ដូរ នៅពេលដែលមេបញ្ជាការយន្ដហោះ បានរំលឹកពីបទបញ្ជា ដែលយន្ដហោះ ត្រូវ​ធ្វើការ​ចុះ​ចត នៅក្រុងឌូសែលដ័រ។ ជំនួយការបើកបរ បានឆ្លើយមក មេបញ្ជាការវិញ ដោយពាក្យ យ៉ាង«សោះអង្គើយ»។

«យើងបានស្ដាប់ឮថា មេបញ្ជាការបានសុំឲ្យជំនួយការរបស់ខ្លួន បញ្ជាយន្ដហោះ រួចយើងបានស្ដាប់ឮ សម្លេងរំកិល​របស់​កៅអី និងសម្លេងទ្វាបិទ ដែលធ្វើឲ្យគេគិតថា មេបញ្ជាការទំនងជា ចូលបន្ទប់ទឹក។ បន្ទាប់ពីនោះមក យើងបាន​ឮ​ជំនួយការបើកបរ បានចុចប៊ូតុង flight monitoring system ដើម្បីទម្លាក់យន្ដហោះ ឲ្យហោះចុះក្រោម។»

ជំនួយការបើកបរយន្ដហោះនោះ ដែលមានអាយុ២៨ឆ្នាំ ទើបនឹងត្រូវបានក្រុមហ៊ុន ហ្សែរមេនវីង ទទួលឲ្យចូលធ្វើការ កាលពីប៉ុន្មានខែមុន ហើយទើបនឹងមានបទពិសោធន៍ ក្នុងការហោះហើរ តែប៉ុន្មានរយម៉ោងប៉ុណ្ណោះ។

«ការចុចប៊ូតុង flight monitoring system អាចធ្វើបាន លុះត្រាតែមានបំណុងចុច (មិនអាចមានលក្ខណៈ ជាស្វ័យ​ប្រវត្តិ​ឡើយ)» លោក រ៉ូបាំង បានពន្យល់ទៀតថា នៅក្នុងរយៈពេល នៃការបង្ហោះយន្ដហោះ ឲ្យធ្លាក់នេះ គេបានស្ដាប់់​សម្លេង​ដក​ដង្ហើម របស់ជំនួយការបើកបរ ដែលហាក់ដូចជាគ្មានរឿងអ្វីកើតឡើង និងបញ្ជាក់ថា ជំនួយការរូបនេះ នៅមាន​ស្មារតី​នៅ​ឡើយ រហូតដល់យន្ដហោះ ជល់ជាមួយជញ្ជាំងភ្នំ។

គ្មានសញ្ញាប្រកាសអាសន្ន...

នៅក្នុងរយៈពេលនោះ គេបានស្ដាប់ឮមេបញ្ជាការ បានត្រឡប់មកវិញ ហើយបានហៅគោះទ្វាជាច្រើនដង ដើម្បីសុំចូល​ទៅ​ក្នុងបន្ទប់បើកបរវិញ ប៉ុន្តែបន្ទប់បើកបរនោះ ត្រូវបានបិទជិត យ៉ាងរឹងមាំជាទីបំផុត (ជាទ្វាការពារ ការរំលោភ​បំពាន​ផ្សេងៗ)។ ក្នុងពេលទន្ទឹមគ្នា ផ្នែកត្រួតពិនិត្យផ្លូវអាកាស របស់ប្រទេសបារាំង ក៏បានសង្កេតឃើញ មានភាពមិនប្រក្រតី​ដែរ ហើយ​ព្យាយាមទាក់ទងមកយន្ដហោះ តែគ្មានចម្លើយអ្វីឡើយ។ មិនត្រឹមតែប៉ុណ្ណឹង រហូតលុះត្រាយន្ដហោះ បាន​បុក​ជាមួយជញ្ជាំងភ្នំ គេមិនបានទទួលសញ្ញាអាសន្ន ពីបន្ទប់បើកបរយន្ដហោះទេ ហើយជំនួយការបើកបរវ័យក្មេង បាន​ស្ងាត់​មាត់​រហូត ក្នុងពេលបង្ហោះទម្លាក់យន្ដហោះ។

បើតាមលោករដ្ឋអាជ្ញា បានឲ្យដឹងថា អ្នកដំណើរទាំងអស់ មិនបានដឹងខ្លួនជាមុន ពីការបង្ហោះទម្លាក់ខ្លួន របស់យន្ដហោះ​នោះទេ។ ពួកគេមិនដឹង រហូតដល់វិនាទីចុងក្រោយ។ នៅក្នុងការថតសម្លេងរបស់ប្រអប់ខ្មៅ គេបានស្ដាប់ឮសម្លេង​ស្រែក​​ចុង​ក្រោយ មុននឹងស្ងាត់ឈឹងក្នុងពេលបន្ទាប់មក ដែលបញ្ជាក់ថា មរណភាពរបស់អ្នកដំណើរ មានកើត​ឡើង​ភ្លាមៗ។

អ្នកស៊ើបអង្កេតបារាំង និងអាល្លឺម៉ង់ បានធ្វើការសាកសួរ ទៅលើមនុស្សមួយចំនួន ដែលជាក្រុមគ្រួសារ និងស្ថិត​នៅ​ជុំវិញ យុវជនជាជំនួយការបើកបរយន្ដហោះ ហើយចម្លើយដែលគេទទួលមកវិញ បានឲ្យដឹងថា យុវជន​ជាតិ​អាល្លឺម៉ង់​ម្នាក់នេះ មានឫកពារធម្មតា និងមិនមានហេតុភេទអ្វីចម្លែក នៅមុនគ្រោះថ្នាក់ទេ។ នៅល្ងាចថ្ងៃព្រហស្បត្តិ៍នេះ ការចូល​ឆែកឆេរ​ក្នុងគេហដ្ឋាន ចំនួនពីរកន្លែង របស់យុវជនជំនួយការ បើកបរយន្ដហោះ ត្រូវបានធ្វើ ដោយកងកម្លាំង នគរបាល​អាល្លឺម៉ង់។ ក្នុងចំណោមគេហដ្ឋានទាំងពីរ គេហដ្ឋានមួយកន្លែង ស្ថិតក្នុងក្រុង ឌូសែលដ័រ ដែលយន្ដហោះត្រូវទៅចុះចត។

សូមបញ្ជាក់ជូនថា ប្រអប់ខ្មៅទីពីរ នៅមិនទាន់ត្រូវបាន គេរកឃើញនៅឡើយ មកទល់នឹងម៉ោងនេះ៕