ដីកា​ចម្លែក៖ ​ត្រូវ​បង្ហាញ​ខ្លួន​ក្នុង​ថ្ងៃ​ខែ​ណា លោក​តំណាង​អយ្យការ?

តើជារឿងចៃដន្យ ឬជាចេតនា របស់តំណាងអយ្យការ សាលាដំបូងខេត្ត បន្ទាយមានជ័យ ដែលបានចេញដីកាកោះ មានទាំងហត្ថលេខា និងត្រា តែគ្មានចុះ ថ្ងៃខែចេញដីកា និងគ្មានកំណត់ ពីពេលវេលាដែលត្រូវចូលខ្លួន នៃជនដែលត្រូវកោះនោះ។
Loading...
  • ដោយ: អ៊ុម វ៉ារី អត្ថបទ និងយកការណ៍៖ អ៊ុម វ៉ារី ([email protected]) -ភ្នំពេញថ្ងៃទី២៧ មីនា ២០១៥
  • កែប្រែចុងក្រោយ: March 28, 2015
  • ប្រធានបទ: យុត្តិធម៌
  • អត្ថបទ: មានបញ្ហា?
  • មតិ-យោបល់

ពលរដ្ឋមួយរូប ក្នុងខេត្តបន្ទាយមានជ័យ ត្រូវបានតុលាការកម្ពុជា ចេញដីកាកោះឲ្យចូលខ្លូន មក​បង្ហាញ​ខ្លួន ចំពោះ​មុខ​តុលាការ ក្នុងឆ្នាំ២០១៥នេះ តែមិនបានកំណត់នូវថ្ងៃ ឬខែ ដែលត្រូវមកបង្ហាញនោះឡើយ។ តំណាងអយ្យការ អម​សាលា​ដំបូងខេត្ត បន្ទាយមានជ័យ លោក ផាន់ វណ្ណរ័ត្ន ចេញដីកាកោះ កោះហៅដើមចោទ លោក អ៊ឹម ផល្លែន ឲ្យមក​បង្ហាញ​ខ្លួន ចំពោះមុខតំណាងអយ្យការ ដើម្បីចូលបំភ្លឺក្នុងរឿងប្តឹងសុំអនុវត្តន៍សាលក្រម។

ក្នុងដីកាដដែលនេះ ក្រៅពីគ្មានចុះថ្ងៃ ខែ ក្នុងឆ្នាំ២០១៥ ដែលមានហត្ថលេខាតំណាងអយ្យការ លោក ផាន់ វណ្ណរ័ត្ន បាន​បង្គាប់បញ្ជាឲ្យ អាជ្ញាធរនគរបាលមូលដ្ឋាន ក្នុងភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយ​មាន​​ជ័យ ប្រគល់ដីការនេះ ទៅកាន់សាម៉ីខ្លួន ដែលបានប្តឹងសុំ ឲ្យចូលខ្លួនបំភ្លឺ នាវេលាម៉ោង ៨ និង៣០នាទីព្រឹក ក្នុង​សំណុំ​​រឿង​​លេខ១៣ ចុះថ្ងៃទី២៣ ខែកុម្ភៈ ឆ្នាំ២០១៥ តែមិនបានបញ្ជាក់ថា ត្រូវទៅបង្ហាញខ្លួន នៅក្នុងថ្ងៃណា និងខែ​ណា​​ឡើយ។ ហើយ​ដីកាកោះមួយសន្លឹកនេះ បានចូលមកដល់សាលាក្រុង ប៉ោយប៉ែត ក្នុងថ្ងៃទី២០ ខែមីនា ឆ្នាំ២០១៥ នាវេលាម៉ោង២ និង១០ នាទីរសៀល។

ដោយសារតែហេតុនេះ និងតាមបញ្ជារបស់ អភិបាលក្រុងប៉ោយប៉ែតផង ទើបក្នុងថ្ងៃទី២៦ ខែមីនានេះ លោក រដ្ឋ សុខា នាយក​រដ្ឋបាល​សាលា​ក្រុង​ប៉ោយប៉ែត បានចេញសេចក្តីជូនដំណឹង មួយសន្លឹក ទៅកាន់តំណាងអយ្យការ អមសាលា​ដំបូង​ខេត្ត បន្ទាយមានជ័យ ថា៖ «ដីកាកោះ ឲ្យឈ្មោះ អ៊ឹម ផល្លែន (ដើមចោទ) ទីតាំងសព្វថ្ងៃនៅភូមិសាមគ្គីមានជ័យ សង្កាត់​ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ គ្មានថ្ងៃខែចេញដីកា និងគ្មានថ្ងៃខែកំណត់ ឲ្យសាមីខ្លួន​ចូល​ទៅ​បំភ្លឺ ធ្វើ​ឲ្យ​អាជ្ញាធរក្រុង សង្កាត់ មិនអាចប្រគល់ដីការកោះនេះ ឲ្យទៅឈ្មោះ អ៊ឹម ផល្លែន បានឡើយ។»

ទស្សនាវដ្តីមនោរម្យ.អាំងហ្វូ មិនអាចសុំការបញ្ជាក់ ពីតំណាងអយ្យការ អមសាលាខេត្តបន្ទាយមានជ័យ លោក ផាន់ វណ្ណរ័ត្ន ក្នុងករណីខាងលើបានឡើយ ដោយទូរស័ព្ទរបស់លោក មិនអាចភ្ជាប់ទំនាក់ទំនងបាន។

មន្រ្តីនៃសាលាដំបូងរាជធានីភ្នំពេញម្នាក់ ដែលសុំមិនបង្ហាញឈ្មោះ បានបញ្ជាក់ថា ដីកាភាគច្រើន ស្ទើរគ្រប់តុលាការ ចៅក្រម ឬព្រះរាជអាជ្ញាទាំងអស់ ត្រូវបានក្រឡាបញ្ជី កាន់រឿងនីមួយៗ ស្នើឲ្យចៅក្រម ឬព្រះរាជអាជ្ញា ចុះហត្ថលេខា​ទុកមុន ព្រោះពេលខ្លះចៅក្រម ទាំងនោះរវល់ណាស់ រកតែពេលចុះហត្ថលេខាមិនបានទេ។ មន្ត្រីរូបនោះ បានថ្លែង​ឲ្យ​ដឹង​ថា៖ «ឲ្យចៅក្រមចុះ​ហត្ថលេខា លើដីកាមួយចំនួន ដែលយើងដឹងថា វាត្រូវប្រើប្រាស់។ បន្ទាប់មក យើងគ្រាន់តែយក​ដីការ​នោះ​សរសេរ​មូលហេតុ និងកម្មវត្ថុរឿង និងវាយត្រាជាការចប់។ ពេលខ្លះ ក៏ភ្លេចដាក់ថ្ងៃខែដែរ។ បើមន្រ្តីតុលាការ​យកទៅផ្ទាល់ បើគ្មានថ្ងៃខែ សាមីខ្លួនគេខលមកសួរ ហើយប្រាប់គេទៅ។»

ប្រធានផ្នែកសិទ្ធិមនុស្ស នៃសមាគមការពារសិទ្ធិមនុស្ស និងអភិវឌ្ឈន៍នៅកម្ពុជា ហៅកាត់ថា អាដហុក លោក នី ចរិយា បានបញ្ជាក់ប្រាប់ទស្សនាវដ្តីថា ដីការនេះ មិនពេញលេញតាមលក្ខណៈច្បាប់ឡើយ។ ទាំងអ្នកនាំដីកា និងអ្នកទទួល​ដីកា មានសិទ្ធិគ្រប់គ្រាន់ ក្នុងការបដិសេធដីការនេះ តាមផ្លូវច្បាប់។ លោក ចរិយា មិនបានវាយតម្លៃ ពីការភ្លេចភ្លាំង មិន​បញ្ជាក់​ពីពេលវេលា ក្នុងដីកាខាងលើរបស់តុលាការ ថាជាចេតនា ឬជាការបៃដន្យឡើយ។ តែលោកគ្រាន់តែ បាន​ពន្យល់​ថា៖ «នោះ ជាការខុសនីតិវិធី។ ព្រោះច្បាប់បានកំណត់រួចហើយថា ដីកាត្រូវតែសរសេរឲ្យច្បាស់ ពីពេលវេលា ពីទីកន្លែង និងអ្វីៗទាំងអស់ ដែលមានក្នុងដីកា។ ដីកាថាច្រឡំ ក៏ថាបាន តែដាច់ខាតវាមិនអាចច្រឡំ ព្រោះដីកានោះ សរសេរ​តែមួយសន្លឹក មិនអាចឲ្យរំលងទេ ព្រោះជាក្រិត្យក្រមរបស់ច្បាប់។ (...) ជាដីកាមួយនេះ ជាដីការំលោភលើ​នីតិវិធី។ (...) អ្នកធ្វើខុសនីតិធីច្បាប់ ត្រូវទទួលខុសត្រូវ ចំពោះមុខច្បាប់។»

នេះជាដីកាកោះ និងសេចក្តីជូនដំណឹងរបស់សាលាក្រុងប៉ោយប៉ែត ដែលទស្សនាវដ្តីទើបទទួលបាន៖

(ចុចលើរូប ដើម្បីពង្រីកអាន)

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...