វិនាទី​មុន​ធ្លាក់​យន្ដហោះ 4U9525៖ «បើក​ អា​ទ្វា​ចង្រៃ​យក៍!»

តើការឆ្លើយឆ្លង រវាងអ្នកបើកបរយន្ដហោះ អ៊ែរប៊ូស A320 ដែលបានធ្លាក់ កាលពីថ្ងៃអង្គារសប្ដាហ៍មុន ក្នុងតំបន់ជួរភ្នំអាល់ព៍ (Alpes) ភាគខាងត្បូងប្រទេសបារាំង មានលក្ខណៈបែបណា និងស្ថិតក្នុងសភាពបែបណា? សារព័ត៌មានអាល្លឺម៉ង់មួយ បាន​ដក​ស្រង់​សម្ដី​អ្នក​ទាំងពីរ ដែល​ជជែក​គ្នា នៅមុនយន្ដហោះបុកភ្នំ មកចុះផ្សាយ។
Loading...
  • ដោយ: ដារី អត្ថបទ ៖ ដាវី ([email protected]) - ភ្នំពេញ ថ្ងៃទី ២៩ មិនា ២០១៥
  • កែប្រែចុងក្រោយ: March 30, 2015
  • ប្រធានបទ: គ្រោះអាកាស
  • អត្ថបទ: មានបញ្ហា?
  • មតិ-យោបល់

បន្ទាប់ពីបានទម្លាយ ពីបុគ្គលិកលក្ខណៈ របស់ជំនួយការបើកបរយន្ដហោះ អាយុ២៨ឆ្នាំ យុវជន អេនដ្រៀស លូប៊ីតស៍ (Andreas Lubitz) កាលពីប៉ុន្មានថ្ងៃមុនរួច សារព័ត៌មានអាល្លឺម៉ង់ Bild ដដែល បានលើកយកមកចុះផ្សាយ ក្នុងថ្ងៃ​អាទិត្យ​នេះ នូវការជជែកគ្នាចុងក្រោយ រវាងអ្នកកាន់ចង្កូតយន្ដហោះទាំងពីរ ដែលត្រូវបានថតទុក នៅក្នុងឯកសារសម្លេង នៅ​ក្នុង​ប្រអប់ខ្មៅទីមួយ។ ប្រអប់ខ្មៅនេះ ត្រូវបានរកឃើញភ្លាមៗ បន្ទាប់ពីយន្ដហោះ អ៊ែរប៊ូស A320 របស់ក្រុមហ៊ុន ហ្សែរមេនវីង (Germanwings) ដែលភ្ជាប់ជើងហោះហើរ 4U9525 ពីពីក្រុង បាសឺឡូន (Barcelone) ប្រទេសអេស្ប៉ាញ ឆ្ពោះ​ទៅ​ក្រុង ឌូសែលដ័រ (Düsseldorf) ប្រទេសអាល្លឺម៉ង់ កាលពីថ្ងៃអង្គារ បានហោះទៅបុកភ្នំ បណ្ដាល​ឲ្យ​ស្លាប់​មនុស្ស​១៥០នាក់។

ការទម្លាយ នូវការសន្ទនារនេះ មិនខុសគ្នាប៉ុន្មានឡើយ ពីការប្រកាស របស់រដ្ឋអាជ្ញាបារាំង ដែលបាន​ថ្លែងនៅក្នុង​សន្និសីទ​សារព័ត៌មាន កាលពីថ្ងៃទី២៦ ខែមីនា ជុំវិញការបង្ខាំងខ្លួន របស់ជំនួយការបើកបរវ័យក្មេង នៅក្នុង​បន្ទប់​បើកបរ​តែម្នាក់ឯង បន្ទាប់ពីមេបញ្ជាការរបស់ខ្លួន បានងើបចេញទៅបន្ទប់ទឹក។ ប៉ុន្តែសារព័ត៌មានអាល្លឺម៉ង់ បានសរសេរ​ក្នុង​ពេលនេះ ជាឃ្លាម្ដងមួយៗ យ៉ាងច្បាស់ ជាពិសេសនៅពេលប៉ុន្មាននាទីចុងក្រោយ ដែលបានឡើងកម្ដៅដល់កំពូល។

នៅក្នុងរយៈពេល២០នាទីដំបូង មេបញ្ជាការបើកបរ បានថ្លែងទៅយុវជន អេនដ្រៀស លូប៊ីតស៍ ដែលជាជំនួយការ​បើកបរ​របស់ខ្លួនថា លោកមិនមានពេល ទៅបន្ទប់ទឹកទេ នៅពេលចូលមកក្នុងយន្ដហោះ។ បន្តិចក្រោយមក មេ​បញ្ជា​ការ​រូបនោះ បានស្នើទៅ អេនដ្រៀស លូប៊ីតស៍ ឲ្យត្រៀមបំរុងការចុះចត នៅព្រលានយន្ដហោះក្រុង ឌូសែលដ័រ ឲ្យហើយ។ គេ​បាន​ស្ដាប់​ឮចម្លើយ របស់យុវជនអាយុ២៨ឆ្នាំ តបមកមេបញ្ជាការ យ៉ាងសោះកក្រោះ ដូច្នេះថា «ខ្ញុំក៏សង្ឃឹមអញ្ចឹង» ឬ​«យើងចាំមើល នៅពេលនោះ»។ ប៉ុន្មាននាទីបន្ទាប់មក លោកមេបញ្ជាការបើកបរ បានងើបចេញពីបន្ទប់បើកបរ ដើម្បី​ទៅ​ដោះ​ស្រាយ​បញ្ហាផ្ទាល់ខ្លួន នៅក្នុងបន្ទប់ទឹក ដោយទុកឲ្យ អេនដ្រៀស លូប៊ីតស៍ នៅកាន់ចង្កូតយន្ដហោះ តែ​ម្នាក់​ឯង។

មួយសន្ទុះក្រោយ ស្នូរសម្លេងគោះទ្វាខ្លាំងៗ បានលាន់ឭឡើង ដូចជាមាននរណាម្នាក់ ព្យាយាមចូលមកក្នុង​បន្ទប់​បើកបរ។ មិនខុសទេ មេបញ្ជាការបើកបរយន្ដហោះ ដឹងថាយន្ដហោះ កំពុងសំយ៉ុងក្បាលចុះហើយ ទើបលោកបាន​ត្រឡប់​មកវិញភ្លាម ដើម្បីព្យាយាមគ្រប់គ្រងស្ថានការណ៍ឡើងវិញ។ ប៉ុន្តែទ្វាបន្ទប់បើកបរយន្ដហោះ ត្រូវបានជំនួយ​ការ​របស់លោកខ្ទាស់ជាប់។ ជាលើកដំបូង គេឮសម្លេងរបស់លោកអង្វរ ពីក្រៅបន្ទប់មកថា៖ «ឱ... ព្រះជាម្ចាស់... សូម​មេត្តា​បើកទ្វា!» ប៉ុន្តែក្រោយពីប្រើភាសានេះ មិនទទួលបានលទ្ធផល លោកមេបញ្ជាការតម្លើងសម្លេងថា៖ «បើក អាទ្វាចង្រៃយក៍ នេះមើល៍!!!»។

ទីបំផុត នៅម៉ោង១០និង៤០នាទីព្រឹក យន្ដហោះអ៊ែរប៊ូស A320 បានហោះទៅបុកជញ្ជាំងភ្នំ ក្នុងល្បឿន៧០០គីឡូម៉ែត្រ ក្នុងមួយម៉ោង សម្លាប់មនុស្សទាំង១៥០នាក់ នៅក្នុងយន្ដហោះភ្លាមៗ។ ក្នុងល្បឿនដ៏លឿនបែបនេះ បញ្ជាក់យ៉ាង​ច្បាស់​ពីទំហំគ្រោះថ្នាក់ ដូចគេបានឃើញ នៅលើកន្លែងកើតហេតុ ដែលយន្ដហោះទាំងមូល បានប្រែក្លាយជាបំណែកតូចៗ ខ្ទាត​ទៅក្នុងបរិវេណ ច្រើនរយម៉ែត្រ និងបើសូម្បីប្រអប់ខ្មៅទីពីរ គេរកមិនទាន់ឃើញ នៅឡើយផង។ អ្វីដែលគេបាន​ស្ដាប់ឭ ក្នុងវិនាទីចុងក្រោយ ពីប្រអប់ខ្មៅទីមួយ គឺសម្លេងស្រែករបស់អ្នកដំណើរ ដែលបានស្ងាត់បាត់ឈឹងភ្លាម ក្នុង​ពេល​តែមួយ​ពព្រិច​ភ្នែក៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...