លិខិតរំលឹក ឬបង្គាប់ ដែលបានចេញ ចេះតែចេញ តែការអនុវត្តន៍ គ្មានលទ្ធផល ហើយក៏គ្មានប្រសិទ្ធភាពអ្វីដែរ បើ​ក្រសួង​​សារធារណៈការ និងដឹកជញ្ជូន នៅតែមិនមានវិធានការ ច្បាស់លាស់នោះ។ នេះជាថ្លែងរបស់លោក ព្រាប កុល នាយកប្រតិបត្តិ អង្គការតម្លាភាពកម្ពុជា តបទៅនឹងសារលិខិតមួយ របស់ក្រសួង សារធារណៈការ និងដឹកជញ្ជូន ដែល​បានផ្ញើរទៅ ប្រធានមន្ទីរសារធារណៈការ និងដឹកជញ្ជូន នៅតាមរាជធានី-ខេត្តនានា ទាក់ទងនឹងការលុបបំបាត់ ការដាក់​ប៉ុស្ដិ៍​​ជញ្ជីង​ថ្លឹង បែបអនាធិបតេយ្យ នៅតាមដងផ្លូវជាតិនានា ក្នុងប្រទេសកម្ពុជា។

លិខិតមួយច្បាប់ ចុះថ្ងៃទី ២៧ ខែមិនា ឆ្នាំ២០១៥ និងមានហត្ថលេខា របស់រដ្ឋលេខាក្រសួង លោក លឹម ស៊ីដេនីន បាន​សរសេររំលឹក ទៅដល់ប្រធានមន្ទីរ ប្រចាំរាជធានី ខេត្តថា ដើម្បីធានាបាននូវ របៀបរៀបរយក្នុងសង្គមល្អ មន្ទីរ​សាធារណៈការ និងដឹកជញ្ជូនរាជធានី-ខេត្ត ត្រូវចេញដាក់ នូវវិធានការម៉ឹងម៉ាត់ ក្នុងការលុបបំបាត់ឲ្យអស់ ការដាក់​ប៉ុស្ដ៍​អនាធិបតេយ្យ ក្រោមរូបភាពត្រួតពិនិត្យ ការដឹកជញ្ជូនលើសទម្ងន់កំណត់។

នៅក្នុងលិខិតនោះ ក្រសួងខ្លួនឯងបានទទួលស្គាល់ដែរថា រាល់សេចក្ដីសម្រេច នាពេលកន្លងមករបស់ក្រសួង ក្នុងការ​លុបបំបាត់ ការដាក់ប៉ុស្ដិ៍ជញ្ជីងថ្លឹង បែបអាណាធិបតេយ្យ តែងត្រូវបាន«ផ្គើន» ដោយមន្ត្រីក្រោមបង្គាប់មួយចំនួន។

សាកសួរតាមទូរស័ព្ទ​ ដោយទស្សនាវដ្ដីមនោរម្យ.អាំងហ្វូ ទាក់ទងនឹងលិខិតខាងលើ លោក ព្រាប កុល បានពន្យល់ថា ក្រសួងសាធារណៈការ និងដឹកជញ្ជូន គួរចេញវិធានការ ឲ្យបានច្បាស់លាស់ជាងនេះ ធ្វើយ៉ាងណាដាក់ទោស ទៅលើ​ជនដែលប្រព្រឹត្តល្មើស ពីសេចក្តីសម្រេចរបស់ខ្លួន និងចាប់ប៉ុស្ត៍ជញ្ជីងថ្លឹង បែបអនាធិបតេយ្យទាំងនោះ យកទៅ​ដាក់​ទោសតាមច្បាប់ ជាពិសេសត្រូវធ្វើការផ្សព្វផ្សាយ ឲ្យពលរដ្ឋទូទៅបានឃើញ ជាសារធារណៈ។

មេដឹកនាំអង្គការតម្លាភាពកម្ពុជា បានផ្ដល់ជាយោបល់ថា ក្រសួងគួរសហការ ជាមួយប្រជាពលរដ្ឋ ឲ្យបានជិតស្និត ដើម្បី​ផ្តល់ជាដំណឹង ឬរាយការណ៍ជាបន្ទាន់ ទៅឲ្យមន្ត្រីដែលជាប់ពាក់ព័ន្ធចុះអន្តរាគមន៍។ លោកថា មានតែប្រជាពលរដ្ឋទេ ដែល​ដឹង​ពីបញ្ហាច្បាស់ជាងគេ ព្រោះពួកគាត់បានជួប និងបានចំណាយច្រើន ទៅលើទង្វើអនាធិបតេយ្យទាំងនេះ គ្រាន់​តែពេលខ្លះ ពួកគាត់មិនហ៊ាននិយាយ ដោយបារម្ភពីសុវត្តិភាពផ្ទាល់ខ្លួន។

សូមបញ្ជាក់ដែរថា លិខិតខាងលើនេះ បានធ្វើឡើងតែប៉ុន្មានថ្ងៃ បន្ទាប់ពីមានហេតុការណ៍បាញ់បោះ ធ្វើទារុណកម្ម ជាន់ក ចងស្លាបសេក ទៅលើពលរដ្ឋដឹកស្រូវ ពីសំណាក់ មន្ត្រីកងរាជអាវុធហត្ថ ខេត្តត្បូងឃ្មុំ កាលពីយប់ ថ្ងៃទី១៩ ខែមីនា ឆ្នាំ២០១៥កន្លងមក។ ហេតុការណ៍នោះ បានកើតឡើង នៅត្រង់ចំណុច គីឡូម៉ែត្រលេខ៨៩ តាមបណ្ដោយ ផ្លូវជាតិលេខ១១ ក្នុងស្រុកអូរាំងឪ ខេត្ដត្បូងឃ្មុំ បន្ទាប់ពីពលរដ្ឋដឹកស្រូវទាំងនោះ បានគេច មិនចូលរថយន្ដរបស់ពួកគេ ទៅឲ្យ​ក្រុមមន្ត្រីទាំងនោះ ថ្លឹង។

ទាក់ទងនឹងករណី មានការចូលរួមពីមន្ត្រីកងរាជអាវុធហត្ថនេះ លោក សៅ សុខា មេបញ្ជាការកងរាជ​អាវុធហត្ថ​លើ​ផ្ទៃ​ប្រទេស បានសម្រេចបង្កើត «គណកម្មការចំពោះកិច្ច»មួយ ដើម្បីស៊ើបអង្កេត ពីហេតុការណ៍នេះ ហើយបានសន្យាថា ជនប្រព្រឹត្តិល្មើស នឹងទទួលទោស។ រីឯលិខិតខាងលើ របស់រដ្ឋលេខាធិការ លោក លឹម ស៊ីដេនីន ក៏បានបញ្ជាក់ ទៅ​មន្ត្រី​ក្រោម​ឱវាទដែរថា ក្នុងករណីដែលជនបង្ក នៅហួសពីដែនសមត្ថកិច្ច មន្ទីរត្រូវរាយការណ៍ ជូនអាជ្ញាធរមានសមត្ថកិច្ច ឲ្យ​ជួយ​​អន្តរាគមន៍៕