ពលរដ្ឋចំនួនពីរគ្រួសារ ដែលរស់នៅ ភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ កំពុង​ជួបបញ្ហាពិបាក ក្នុងការរស់នៅ ដោយសារគ្មានផ្លូវចូល សម្រាប់លំនៅដ្ឋាន របស់ពួកគេ។ ប្រភពពីអ្នកជិតខាង រស់នៅ​ទី​នោះ បានឲ្យ​ដឹងថា អស់រយៈពេលពីរទៅបីឆ្នាំមកហើយ ដែលអ្នកភូមិនៅទីនោះ មានបញ្ហាលើដីផ្លូវនេះ។ តែគ្មាន​អាជ្ញាធរ​មូលដ្ឋានណា ដោះស្រាយជូនពួកគាត់នោះទេ តែផ្ទុយទៅវិញ បានរកលេសបដិសេធដំណោះស្រាយ មិនចេះ​ចប់​មិនចេះហើយ រហូតដល់មេភូមិនៅទីនោះ បានទទួលស្គាល់ វាស់វែងលក់ផ្ទះ ដែលសង់គ្មានច្បាប់ទម្លាប់ទាំងនោះ ឲ្យ​ទៅ​ម្ចាស់​ក្លឹប​កំសាន្ត និងថែមទាំងបដិសេធ សំណើររបស់គ្រួសារទាំងពីរនេះទៀត។

អ្នកស្រី ពេជ្យ ស្រីអូន ជាម្ចាស់ផ្ទះមួយ ដែលគ្មានផ្លូវចូលនោះ បានឲ្យដឹងថា អ្នករស់នៅក្បែរខាង ពិតជាបានលក់ដី​ផ្ទះ​របស់ខ្លូន ដែលធ្វើលើផ្លូវសាធារណៈចាស់ ទៅឲ្យក្រុមហ៊ុនខ្លឹបហាត់ប្រាណនោះ ហើយនៅសល់តែអ្នកស្រី និងអ្នកភូមិ​មួយគ្រួសារទៀតប៉ុណ្ណោះ ដោយសារដីរបស់ពួកអ្នកស្រី សុទ្ធតែមានជាកម្មសិទ្ធ និងមានផ្ទះធំ ទើបមិនអាចលក់បាន ព្រោះមិនដឹងទៅរស់នៅឯណា។ អ្នកស្រីពន្យល់ថា  អ្នកភូមិបានលក់ដីទាំងនេះ ដោយមានការស្រុះស្រួល ពីមេភូមិ ព្រោះ​សង្ឃឹមថា នឹងមានផ្លូវចេញចូលថ្មី។ តែបន្ទាប់ពីលក់អស់ មិនត្រឹមតែគ្មាន«ផ្លូវ»ទេ ថែមទាំងសង់ផ្ទះថ្មី បម្រុង​បិទ​ផ្លូវ​ចាស់នោះតែម្តង។ រៀងរាល់ពេល ពួកគាត់ទាំងពីរគ្រួសារ ទៅសួរនាំពីបញ្ហាដីផ្លូវចាស់ ដែលបម្រុងបិទនេះ ប្រធាន​ភូមិ​បាននិយាយថា ចាំមើលគម្រោង របស់ក្រុមហ៊ុនសិន។

ម្ចាស់ផ្ទះមួយទៀត អ្នកស្រី អ៊ឹម សំអៀន បានឲ្យដឹងដែរថា គាត់បានដាក់ពាក្យបណ្តឹង ក៍ដូចជាឯកសារ ទៅកាន់ថ្នាក់​មូលដ្ឋាន តែនៅមិនមានចម្លើយសោះ។ មេភូមិ ហាក់មិនអើពើ ព្រោះចង់ឲ្យពួកគាត់លក់ដីនេះ ទៀត អ្នកស្រីបន្តថា តាំង​ពីពេល ដែលលក់ដីជាង១០គ្រួសារមក ម្ចាស់ក្លឹបកំសាន្ត បានសាងសង់ផ្ទះផ្សេងៗ ដែលបម្រើឲ្យ ផលប្រយោជន៍បុគ្គល មិនបានគិត ពីផលប៉ះពាល់ ដល់ពួកគាត់ ដែលគ្មានផ្លូវចេញចូលទេ។ស្របពេលគ្នា នឹងការសាងសង់អគារថ្មីឡើង មិន​ឃើញមានអាជ្ញាធរមូលដ្ឋាន ឬមេភូមិមកធ្វើការទប់ស្កាត់ និងសើរើ រំលឹកពីគម្រោងធ្វើផ្លូវទេ បែរជាសម្ងំស្ងៀម ទោះ​ដឹង​ថា ត្រូវបិទផ្លូវចាស់ ធ្វើជាបន្ទប់ជួល ហើយបើកផ្លូវថ្មី នៅពីមុខហាងនោះក៏ដោយ។ អ្នកស្រីលើកឡើងថា៖ «រុះផ្ទះ​ឈើ​ធ្វើ​ផ្ទះ​ថ្ម ហើយថាមិនបានលក់ដី»។

ដោយឡែក មេភូមិក្បាលស្ពាន១ លោក អៀន សារឿន បានបដិសេធថា លោកមិនបានឃុបឃិត លក់ដី ដូចជាអ្នកភូមិ​បានចោទទេ គឺលោកគ្រាន់តែបានចុះកិច្ចសន្យា លក់ផ្ទះ អ្នករស់នៅអនាធិបតេយ្យប៉ុណ្ណោះ ព្រោះម្ចាស់ក្រុមហ៊ុន បាន​ដាក់លិខិតស្នើ មកអ្នកភូមិ សុំទិញផ្ទះ អ្នករស់នៅគ្មានសណ្តាប់ធ្នាប់ នោះចេញ។ លោកថា បើអ្នកណាលក់បាន ក៏លក់​ទៅ អ្នកណាលក់មិនបាន ក៏គ្មានអ្នកបង្ខំដែរ។

ចំណែកឯរឿង ដែលធ្វើ«ផ្លូវ»ថ្មី ត្រូវបានប្រធានភូមិថ្លែងឲ្យដឹងថា ជាគម្រោងចាស់របស់ក្រុមហ៊ុន ដែលបានដាក់មក ដោយ​មិនប្រាកដថា បានធ្វើនោះទេ។ ប្រធានភូមិ បានតម្លើងសម្លេងខ្លាំងៗថា៖ «ខ្ញុំបានយល់ព្រម ឲ្យលក់ផ្ទះ មិនមែន​ឲ្យលក់ដីទេ»។ មិនតែប៉ុណ្ណោះ លោកបានបដិសេធ មិនបានទទួលឯកសារមួយចំនួន ដែលអ្នកភូមិបាននិយាយថា ដាក់​ពាក្យ​ប្តឹង សុំអន្តរាគមន៍នោះទេ។

ទស្សនាវដ្តី មិនអាចសុំការបំភ្លឺ ពីលោក ចឹក ឆាយ ថៅកែក្លឹបកំសាន្តខាងលើបានទេ ដោយទូរស័ព្ទរបស់លោក មិនអាច​ទាក់ទងបាន។ ចំណែកឯម្ចាស់ផ្ទះទាំងពីរគ្រួសារ បានឆ្លៀតឱកាសនេះ ដើម្បីអំពាវនាវដល់អាជ្ញាធរ ដែលជាប់ពាក់ព័ន្ធ ទាំងក្រុង និងខេត្ត មេត្តា«បើកភ្នែក» ជួយអន្តរាគមន៍ ពីបញ្ហានេះផង៕