ព្រោះភាពស្ងៀមស្ងាត់ របស់មន្រ្តីជំនាញ និងមន្រ្តីមានសមត្ថកិច្ច ក្នុងការតាមចាប់ និងស្វែងរកចាប់ខ្លួនលោក ឈូក បណ្ឌិត តាមដីការរបស់តុលាការនោះ នៅថ្ងៃនេះ លោក គឹម គុណវឌ្ឍន៍ អគ្គនាយកទូរទស្សន៍ជាតិ របស់ប្រទេសកម្ពុជា ដែលជាអ្នក មកពីខេត្តស្វាយរៀងដែរនោះ បានបង្ហើរសំណេរយ៉ាងខ្លី លើគណនីហ្វេសប៊ុក របស់លោកថា៖ «ជាកូន​អ្នក​ស្វាយរៀងម្នាក់ ខ្ញុំសូម លោក បណ្ឌិត ក្លាហាននឹងមកសារភាព ទទួលខុសតាមច្បាប់ទៅ»។

អគ្គនាយក ទូរទស្សន៍ជាតិកម្ពុជារូបនេះ បានបង្ហាញនូវទស្សនៈផ្ទាល់ ជូនដល់លោក ឈូក បណ្ឌិត ដែលកំពុងពួន​សង្ងំ​លាក់ខ្លួន ដូចសត្វ«ពង្រូ» ដែលបាត់តែមុខ តែខ្លួននៅកណ្តាលវាល យ៉ាងដូច្នេះថា «លោកមិនអាចរស់នៅ ដោយទុកឲ្យ​កិត្តិយសគ្រួសារ កិត្តិយសអ្នកស្រុក-អ្នកភូមិ បាត់បង់នោះទេ។ វាជាសេចក្តីថ្លៃថ្នូរ ក្នុងនាមជាមនុស្ស  (...) ដែលជាអតីត​មន្រ្តីម្នាក់។»

យ៉ាងណា ចំពោះការលើកឡើងខាងលើ របស់លោក គឹម គុណវឌ្ឍន៏ ជាចេតនា ចង់ឲ្យអ្នកទោសក្រៅឃុំរូបនេះ ហ៊ាន​ប្រឈមមុខ ជាមួយនឹងកំហុសរបស់ខ្លួន ដែលមាន និងហ៊ានតវ៉ានូវអ្វី ដែលខ្លួនលោកយល់ថា អយុត្តិធម៌ នៅចំពោះមុខ​ច្បាប់ ចំពើមុខតុលាការ។ ឯការគេចវេស មិនមែនជាការបញ្ចប់ នូវការទទួលខុសត្រូវរបស់ខ្លួន ចំពោះមុខច្បាប់ឡើយ។

តាមការលើកឡើងរបស់លោក គឹម គុណវឌ្ឍន៏ ខាងលើនេះ បង្កឲ្យមានការគាំទ្រជាច្រើន ពីអ្នកលេងបណ្តាញសង្គម។ អ្នកទាំងនោះ បានបង្ហាញនូវទស្សនៈផ្សេងៗគ្នា ជុំវិញការគេចខ្លួន របស់លោក ឈូក បណ្ឌិត នេះ។

មតិមួយបានលើកឡើងថា៖ «សម័យនេះហើយ ហេតុអីនៅមិនអាចអនុវត្តបាន ចំពោះចាស់ទំនើង។ (…) ក្នុងនាមថ្នាក់​ដឹកនាំ គួរហ៊ាទទួលខុសត្រូវ ចំពោះមុខច្បាប់ អាចចូលតាមទ្វាមុខ ចេញតាមទ្វាក្រោយបាន កុំភ័យអី។ ថ្ងៃមុនគេបាញ់​៣៣គ្រាប់ គេចូលសារភាព ឥឡូវបាត់ព័ត៌មានឈឹង! ឃើញ(ឬ)ទេ?»

«ត្រីមួយកន្រ្តក បើស្អុយមួយ គឺស្អុយទាំងអស់។ បើព្រោៈតែមនុស្សម្នាក់នេះ សំខាន់ជាងបក្សនោះ សូមទុកឲ្យបក្សចុះ​ខ្សោយ បន្តទៀតចុះ។ ចង់ស្ទួចត្រីឆ្តោ មិនហ៊ានចំណាយត្រីប្រទួក ខាតមួយ ចំណេញរាប់សែន។»

យ៉ាងណា បណ្តាអ្នកលេងបណ្តាញសង្គម បានលើកឡើងថា បើទោះបីជាលោក ឈូក បណ្ឌិត គេចទៅដល់ក្រហែង​ណា​ក៏ដោយ ប្រទេសមានច្បាប់ គង់មានថ្ងៃដែលលោកវិលវិញ។ ហើយច្បាប់នឹងបន្តកំណត់ទោស របស់លោក​ឡើង​វិញ មិន«ស៊ីដាច់»នោះទេ។ មតិនោះសរសេរថា៖ «កុកអាចភ្លេចជុង តែជុងមិនដែលភ្លេចកុកឡើយ»។

សូមរំលឹកថា មកទល់ថ្ងៃនេះ លោក ឈូក បណ្ឌិត កំពុងរស់នៅក្រៅសំណាញ់ច្បាប់ និងស្ពាយងារជាអ្នកទោស ទៅ​ជា​មួយទាំងទម្ងន់។ លោក ឈូក បណ្ឌិត អតីតអភិបាលក្រុងបាវិត ជាប់ចោទ ពីបទប៉ុនប៉ងសម្លាប់មនុស្ស មិនបានសម្រេច កាលពីថ្ងៃទី២០ ខែកុម្ភៈ ឆ្នាំ២០១២។ ប៉ុន្តែមកទល់នឹងពេលនេះ ជនល្មើស ឈូក បណ្ឌិត ដែលតុលាការប្រកាស ឲ្យ​មាន​​ទោសរូបនេះ នៅកំពុងមានសេរីភាព ក្រៅឃុំឃាំងនៅឡើយ៕