ករណីតូច ដែលប្រកែកយកឈ្នះ ឲ្យក្លាយទៅជាធំ នេះបានកើតឡើង កាលពីវេលាម៉ោង ៤ រសៀលថ្ងៃទី៣០ ខែមិនាឆ្នាំ ២០១៥ នៅក្នុងផ្សារដើមគ ស្ថិតក្នុងសង្កាត់ផ្សារដើមគ ខណ្ឌទួលគោក រាជធានីភ្នំពេញ ត្រង់ចំណុចខាងមុខ កន្លែងលក់​ត្រី តាមបណ្តោយផ្លូវ៣៣៦។ ប្រភពព័ត៌មានបានឲ្យដឹងថា មូលហេតុដែលម៉ូតូ បានប៉ះស្រ្តីចំណាស់ម្នាក់ ព្រោះតែម៉ូតូ​ជាប់ហ្គែរ នៅពេលកំពុងជិះ។ ពេលភ្លាមៗ បន្ទាប់ពីមានបញ្ហា បុរសបង្ក បានសុំទោសស្រ្តីចំណាស់ រងគ្រោះ តែស្រ្តីរង​គ្រោះ មិនបានលើកលែងទោសទេ ហើយថែមទាំងហៅកូនរបស់ខ្លូន មកចាប់ទាំងម្ចាស់ និងម៉ូតូទៅខណ្ឌ។

សាក្សីនៅកន្លែងកើតហេតុ ជាអជីវករលក់ត្រី អ្នកស្រី ច្រិប បានប្រាប់ថា គាត់បានឃើញផ្ទាល់ថា បុរសបង្កឈ្មោះ មករា ជិះ ម៉ូតូសង់កូរ៉េ ពណ៍ក្រហមស្លាកលេខ ភ្នំពេញ ១P-៣៧៨០ ពិតជាបានបើកម៉ូតូប៉ះ លោកយាយមែន បណ្តាលឲ្យ​គាត់​ដួល និងមានរបួសត្រង់ដៃ និងជង្គង់ តែភ្លាមៗនោះ ជនបង្ករបានក្រោកឡើង ហើយនិយាយសំពះសុំទោស ទៅលោក​យាយ ដោយធានាចេញថ្លៃ ព្យាបាលរបួសទាំងអស់ ព្រោះខ្លួនគ្មានចេតនា ធ្វើនោះទេ។ សាក្សីបន្តថា ជនរងគ្រោះ គ្មាន​ស្តាប់ហេតុផល សុំទោសរបស់ជនបង្កទេ មានតែនិយាយខ្លាំងៗថា មិនសុខចិត្ត ហើយហៅកូនមក ដើម្បីឃាត់ខ្លួន​ជន​បង្ក។

សម្រាប់ជាជនរងគ្រោះ លោកយាយ ម៉ី សន រស់នៅភូមិក្បាលមាន់ចែ សង្កាត់ផ្សារដើមគ ខណ្ឌទួលគោក បាន​រៀប​រាប់​ថា លោកយាយមិនសុខចិត្តទេ ព្រោះម៉ូតូបានបើកមកបុកគាត់ ដែលកំពុងដើរផ្សារ។ គាត់មិនព្រមទទួលអ្វី ពីជនបង្ក​ទាំង​អស់ លុះត្រាតែសមត្ថកិច្ចមកឃាត់ខ្លួនជនបង្ក ទៅដោះស្រាយតាមច្បាប់ទើបបាន។ បន្ទាប់ពីនិយាយរួច ស្រ្តី​ចំណាស់​ខាងលើ បានហៅកូនប្រុសរបស់ខ្លួន ដែលបានឲ្យដឹងថា ជាមន្រ្តីប៉ូលិសសេដ្ឋកិច្ច មកកន្លែងកើតហេតុ។

យុវជន មករា រស់នៅស្រុកល្វាឯម ខេត្តកណ្តាល ដែលជាជនបង្កខាងលើ បានប្រាប់អ្នកសារព័ត៌មានថា ខ្លួនគ្មាន​ចេតនា​ទេ ដោយសារម៉ូតូដែលកំពុងជិះ ពេលមកដល់កន្លែងកើតហេតុជាប់ហ្គែរ បានជាបុកស្រ្តីចំណាស់ខាងលើ។ យុវជន​បាន​ពន្យល់ថា ពេលឃើញស្រ្តីរងគ្រោះដួលភ្លាម ក៏ចុះទៅជួយលើក បន្ទាប់មកនិយាយសុំទោស តាមដំណើរឿង និងសុំ​សម្រប​សម្រួលគ្នា រួចចេញថ្លៃព្យាបាលជូន ព្រោះមិនចង់ឲ្យមានរឿងកាន់តែធំ តែស្រ្តីរងគ្រោះ មិនព្រមលើកលែងទេ ពេលនោះជនបង្ករបាន ប្រគល់ម៉ូតូឲ្យទៅ អាជ្ញាធរខណ្ឌទួលគោក ធ្វើការដោះស្រាយ តាមចិត្តជនរងគ្រោះ ដែល​មិន​ព្រម​បញ្ចប់។

រហូតមកដល់ថ្ងៃទី០២ ខែមេសា ឆ្នាំ២០១៥នេះ មន្ត្រីចររាចរណ៍ នៅខណ្ឌទួលគោកម្នាក់ បានឲ្យទស្សនាវដ្តី​មនោរម្យ.អាំងហ្វូ​ដឹងថា ករណីនេះ បានបញ្ចប់រួចរាល់ហើយ កាលពីម៉ោង១១ថ្ងៃត្រង់ ថ្ងៃទី០១ ខែមេសា ឆ្នាំ២០១៥ នៅសាលា​ខណ្ឌទួលគោក ដោយកូនប្រុសស្រ្តីរងគ្រោះ និងស្រ្តីរងគ្រោះយល់ព្រមយកថ្លែព្យាបាល ពីជនបង្ក​ចំនួន​៣៥.៤០០០រៀល ដើម្បីបញ្ចប់ជម្លោះ៕