វីដេអូទីមួយ៖ នៅក្នុងហាងចាក់​សាក់​មួយកន្លែង ឈ្មោះ RSD 2nd ផ្ទះលេខ២៦ ភូមិ៣ សង្កាត់ទន្លេបាសាក់ ខណ្ឌ​ចំការមន តាមបណ្តោយផ្លូវ ព្រះសីហនុ នៅម៉ោងប្រមាណជិត ៨ យប់ថ្ងៃទី១៣ ខែមេសា ឆ្នាំ២០១៥ ដើមហេតុ​ដំបូង​ឡើយ កើត​ចេញ​ពីការសំលឹង មើលមុខគ្នា ទៅវិញទៅមក ទំនងជាបានប្រើក្រសែរភ្នែក ឌឺដងដាក់គ្នា ពីសំណាក់​យុវជន​ទាំងពីរនាក់។ នេះបើយោង តាមការបញ្ជាក់ពីអាជ្ញាធរ។ នៅក្នុងវីដេអូនេះ គេឃើញយុវជន ទ្រី ដាលុច បានដើរ​ចូល​ទៅ​រក យុវជន ឌួង ឧត្ដមឆវិន ហៅ ឌួង ឆាយ ឬ​អាជ្រូក មុននឹងយុវជនកូនរបស់លោកឧកញ៉ា ឌួង ងៀប ស្ទុះទៅវាយតប់ និង​ទះ​កំភ្លៀង ជាច្រើនដង ទៅលើយុវជន​ កូនប្រុសរបស់លោកឧកញ៉ា ទ្រីភាព។

វីដេអូទីពីរ៖ នៅចំណុចមុខដើមពោធិ៍ ផ្លូវ​សុរាម្រិត សង្កាត់ចតុមុខ ខណ្ឌដូនពេញ យុវជន ឌួង ឧត្ដមឆវិន ហៅ ឌួង ឆាយ ឬអាជ្រូក ត្រូវបានឃាត់ខ្លួន ដោយកំលាំងអាវុធហត្ថ ខណ្ឌដូនពេញ នៅថ្ងៃទី១៣ ខែមេសាដដែល ប៉ុន្មានម៉ោងក្រោយ បន្ទាប់​ពីយុវជននេះ បានជិះ​រថយន្ដ​ ចេញ​កន្លែង​កើតហេតុ។ នៅក្នុងវីដេអូ គេបានស្ដាប់ឮការជេរប្រទេចផ្ដាសារ ពី​សំណាក់​យុវជន ឌួង ឧត្ដមឆវិន ហៅ ឌួង ឆាយ ឬអាជ្រូក ទៅលើកងកម្លាំងមានសមត្ថកិច្ច យ៉ាងចាស់ដៃ។

វីដេអូទីបី៖ នៅក្នុងទីបញ្ជាការដ្ឋាន អាវុធហត្ថរាជធានី នារសៀលថ្ងៃទី១៤ ខែមេសា នៅពេលដែលកងរាជអាវុធហត្ថ ក្រោម​បញ្ជារបស់លោក រ័ត្ន ស្រ៊ាង មេបញ្ជាការរង កងរាជអាវុធហត្ថ លើផ្ទៃប្រទេស នឹងជាមេបញ្ជាការ កងរាជអាវុធហត្ថ រាជធានី​ភ្នំពេញ បានបញ្ជូនយុវជន ឌួង ឧត្ដមឆវិន ហៅ ឌួង ឆាយ ឬ​អាជ្រូក ទៅកាន់តុលាការ។