រួមរ័ក្សភិសម័យ ដោយប្រើស្រោមអនាម័យ នៅថ្ងៃនេះ ជាមធ្យោបាយតែមួយគត់ ក្នុងការការពារ កុំឲ្យជំងឺចម្លងសង្គម អាច​ត្រូវបានឆ្លង រវាងពីដៃគូមួយ ទៅមួយទៀតបាន។ ប៉ុន្តែអ្នកប្រើប្រាស់មួយចំនួន ពិបាកក្នុងការទ្រាំទ្រស្រោម ដែល​មាន​លក្ខណៈ​មិនដូចធម្មជាតិ និងខ្លះទៀត បានសោកស្ដាយថា បើអត់ស្រោមអនាម័យ គឺមិនបាន។

ដំណឹងល្អមួយ បានមកដល់ហើយ។ អ្នកវិទ្យាសាស្ត្រ នៃសកលវិទ្យាល័យ Wollongong នៃប្រទេសអូស្ត្រាលី កំពុង​ធ្វើ​ការ​សិក្សា ពិសោធន៍ ទៅលើស្រោមអនាម័យ «ជំនាន់ថ្មី»មួយ ដែលមានសភាពប្រសើរ ជាងមុនច្រើន។

ក្រុមអ្នកស្រាវជ្រាវទាំងនោះ ចង់ធ្វើការផ្លាស់ប្ដូរ ស្រោមអនាម័យសព្វថ្ងៃ ដែលមានលក្ខណៈ ដូចជ័រកៅស៊ូ ជាមួយ​នឹង​វត្ថុ​ធាតុដើម មួយបែបផ្សេង ដែលមានលក្ខណៈ ជា«ស្បែកមនុស្សទីពីរ»។ ការសាកល្បង កំពុងប្រព្រឹត្តិទៅ នៅក្នុងមន្ទីរ​ពិសោធន៍ នៃសកលវិទ្យាល័យ Swinburne ក្នុងក្រុងមែលប៊ន (ប្រទេសអូស្ត្រាលី)

អ្នកស្រាវជ្រាវមួយរូប បានថ្លែងពន្យល់ ពីការដាក់ឲ្យសាកល្បង នូវស្រោមនេះ ដើម្បីត្រួតពិនិត្យមើល ពីសកម្មភាព​របស់​ខួរក្បាល ថានឹងពិតជាមានឥទ្ធិពល ខ្លាំងជាស្រោមអនាម័យមុនៗ ដល់កម្រិតណា។ អ្នកស្រាវជ្រាវ បានអះអាងថា៖ «បើ​ស្រោមអនាម័យ កាន់តែផ្ដល់ នូវភាពសុខដុមរម្យនា ច្រើនកាលណា មនុស្សនឹងកាន់ តែចង់ប្រើវាកាលនោះ។ ហើយ​យើង​ក៏​សង្ឃឹម​ទៀតថា ស្រោមថ្មីនេះ នឹងជាបង្អាក់ទាំងស្រុង នូវជំងឺចម្លងសង្គមទាំងឡាយ។»៕

» វីដេអូ ស្ដីពីស្រោមអនាម័យជំនាន់ថ្មី កំពុងត្រូវបានពិសោធន៍៖