វិធី​បញ្ចុះ​បញ្ចូល​របស់​អូស្ត្រាលី ដើម្បី​ឲ្យ​ជន​ភៀស​ខ្លួន​ មក​កម្ពុជា​នៅ​សប្ដាហ៍​ក្រោយ

កិច្ចព្រមព្រៀងនៃការសហការ ក្នុងចំនួនទឹកប្រាក់ ៤០លានដុល្លា រវាងប្រទេសកម្ពុជា និងអូស្ត្រាលី ដែលបានចុះហត្ថាលេខា កាល​ពី​ខែ​កញ្ញា​កន្លង​ទៅ កំពុងចាប់ផ្ដើមអនុវត្តន៍ ចេញជាផ្លែផ្កា៖ ក្រុមជនភៀសខ្លួនទីមយ នឹងត្រូវបញ្ជូនមកកម្ពុជា នៅ​សប្ដាហ៍​ក្រោយ។
Loading...
  • ដោយ: កេសរ កូល អត្ថបទ៖ កេសរកូល ([email protected]) - ភ្នំពេញ ថ្ងៃទី១៧ មេសា ២០១៤
  • កែប្រែចុងក្រោយ: April 18, 2015
  • ប្រធានបទ: អន្តោរប្រវេសន៍
  • អត្ថបទ: មានបញ្ហា?
  • មតិ-យោបល់

ប្រសិនបើ ជនភៀសខ្លួនបានធ្វើចំណាកស្រុក អ្នកទាំងនោះ សុទ្ធតែចង់ស្វែង រកលក្ខខ័ណ្ឌជីវិតដ៏ល្អ នៅប្រទេស​ណា​មួយ ដែលរីកចម្រើន ឬប្រសើរជាប្រទេសកំណើតខ្លួន។ ប៉ុន្តែសម្រាប់ប្រទេសអូស្ត្រាលី ដែលល្បីល្បាញ ខាងការ​គោរព​សិទ្ធិមនុស្ស និងសម្បូរទៅដោយជនភៀសខ្លួន ទៅសុំការជ្រកកោននោះ មិនបានគិតដូច្នោះទេ។ តែផ្ទុយទៅវិញ ប្រទេស​ដែលរីកចម្រើនមួយនេះ បានបញ្ជូនជនភៀសខ្លួនទាំងនោះ ឲ្យមកចាប់ផ្ដើមជីវភាពថ្មី (អ្វីក៏ថ្មី) នៅក្នុងប្រទេសកម្ពុជា ដែល​ល្បីល្បាញ ខាងការរំលោភសិទ្ធិមនុស្ស និងជាប្រទេស ដែលក្រីក្រជាងគេ នៅក្នុងតំបន់។

ហើយដើម្បីបញ្ចុះបញ្ចូល ជនភៀសខ្លួនទាំងនោះ ឲ្យមកតាំងទីលំនៅ«ថ្មី» នៅក្នុងប្រទេសកម្ពុជា ក្រសួងអន្តោរប្រវេសន៍​របស់ប្រទេសអូស្ត្រាលី មានវិធីសាស្ត្រដ៏ពិសេស របស់ខ្លួន។ នេះបើតាមសេចក្ដីរាយការណ៍ របស់បណ្ដាញវិទ្យុ និង​ទូរទស្សន៍ អេប៊ីស៊ី (ABC) របស់ប្រទេសអូស្ត្រាលី ដាកផ្សាយនៅលើគេហទំព័ររបស់ខ្លួន។ នៅក្នុងចំណោមវិធីសាស្ត្រ បញ្ចុះបញ្ចូល ដ៏ពិសេសៗទាំងនោះ មានដូចជា៖ អូស្ត្រាលី នឹងជួយជាថវិការ ទៅលើការស្នាក់នៅ ក្នុងរយៈពេល៦ ទៅ៨​សប្ដាហ៍ ក្នុងរាជធានីភ្នំពេញ ជួយរកការងារឲ្យធ្វើ ជួយបង្រៀនភាសា ជួយចុះឈ្មោះក្នុងសាលារៀន សម្រាប់កូនចៅ និង​ធានារ៉ាប់រងផ្នែកសុខភាពជាដើម។

ក្រសួងអន្តោរប្រវេស របស់កោះអូស្ត្រាលី បានអះអាងថា ជនភៀសខ្លួន ដែលយល់ព្រមមករស់នៅ កម្ពុជា នឹងទទួល​បានប្រាក់សុទ្ធ ដោយផ្ទាល់ដៃបន្ថែមទៀត។ ការបញ្ចុះបញ្ចូល មិននៅត្រឹមប៉ុណ្នឹងទេ តែអាជ្ញាធរអូស្ត្រាលី បាន​អួតអាង​ជំនួសកម្ពុជាបន្តថា ការរស់នៅក្នុងប្រទេសកម្ពុជា មានតម្លៃជាងនៅលើកោះ ណូរូ (Nauru) ហើយជនភៀសខ្លួន អាច​នឹង​ស្នើសុំសញ្ជាតិកម្ពុជាបាន បន្ទាប់ពីពួកគេរស់នៅ ក្នុងប្រទេសនេះ បាន៧ឆ្នាំ។

នៅពេលចុះហត្ថលេខា ជាមួយរដ្ឋមន្ត្រីមហាផ្ទៃកម្ពុជា កាលពីអំឡុងខែកញ្ញា ឆ្នាំ២០១៤ រដ្ឋមន្ត្រីក្រសួង​អន្តោរ​ប្រវេសន៍​អូស្ត្រាលី លោក ស្កុត ម៉ូរីសុន (Scott Morrison) បានថ្លែងសរសើរកម្ពុជា ថា៖ «ជាប្រទេសមួយ ដែលកំពុងដើរទៅមុខ។ ជាប្រទេសមួយ ដែលកំពុងវិវត្តន៍យ៉ាងខ្លាំង។»

ជនភៀសខ្លួនមួយរូប បានថ្លែងប្រាប់សារព័ត៌មាន «The Guardian» ថា៖ «ពួកគេបានធ្វើការស្រាវជ្រាវ ពី"កម្ពុជា" នៅ​លើ​ហ្គូហ្គ័ល (Google) ពួកគេបានរកឃើញថា កម្ពុជា មិនមែនជាប្រទេសរីកចម្រើនទេ ហើយមានគ្រោះថ្នាក់ទៀត។ រឿង​នេះ ធ្វើឲ្យពួកគេព្រួយបារម្ភណាស់។»

ក្រុមសកម្មជនក្រៅរដ្ឋាភិបាល ដែលធ្វើការងារ ខាងផ្នែកមនុស្សធម៌ និងសិទ្ធិមនុស្ស បានធ្វើការរំលឹកថា ប្រាក់បៀវត្សន៍​ក្នុងស្រុក ជាទូទៅនៅកម្ពុជា ស្ថិតនៅក្រោម១០០ដុល្លា នៅឡើយ ហើយ៤០% នៃកុមារដែលមានអាយុក្រោម៥ឆ្នាំ មាន​បញ្ហាកង្វះចំណីអាហារ សឹងតែជាប្រចាំ។ ក្រុមសកម្មជនទាំងនោះ បានធ្វើការបរិហារប្រទេសកម្ពុជាទៀតថា បើសូម្បី​ប្រជានកម្ពុជាខ្លួនឯង បានរងគ្រោះយ៉ាងធ្ងន់ធ្ងរ ពីការបណ្ដេញចេញ ពីលំនៅដ្ឋាន ដីធ្លីរបស់ពួកគេ ហើយអាជ្ញាធរ​មិន​បាន​ធ្វើការងារ ដើម្បីការពារជនរងគ្រោះទាំងនោះផង បើអញ្ចឹងទេ តើកម្ពុជាមានសមត្ថភាពឯណា នឹងអាចទទួល​ជន​ភៀស​ខ្លួន ពីបរទេសយ៉ាងច្រើន ឲ្យមករស់នៅលើនៅទឹកដីរបស់ខ្លួននោះ?

សូមបញ្ជាក់ដែរថា កិច្ចព្រមព្រៀងរវាងកម្ពុជា និងអូស្ត្រាលីនេះ ត្រូវបានថ្កោលទោសយ៉ាងខ្លាំងក្លា ដោយអង្គការ​សហ​ប្រជាជាតិ។ ស្នងការជាន់ខ្ពស់មួយរូប ទទួលបន្ទុកខាងសិទ្ធមនុស្ស របស់អង្គការពិភពលោកមួយនេះ បានថ្លែង​សង្កត់​ធ្ងន់ថា៖ «ការស្នើសុំជ្រកកោន ត្រូវតែទទួលបាននូវកិច្ចការពារ ពីប្រទេសដែលជនភៀសខ្លួនទាំងនោះ បានទៅដល់»៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...