សារព័ត៌មានអង់គ្លេស «Daily Mail » បានផ្សាយឲ្យដឹង កាលពីសប្ដាហ៍មុនថា អតិថិជនមួយរូប បានឃើញបុគ្គលិក នៃភោជនីយដ្ឋាននេះ សម្លាប់ឆ្កែមួយក្បាល មុននឹងយកសាច់វា ទៅឆាប្រឡាក់គ្រឿង ជាមួយមី និងបន្ទាប់​មក​ បាន​ដាក់​ឲ្យ​អតិថិជន​ផ្សេងទៀត ទទួលទាន។ ម្ហូបនោះ មានឈ្មោះថា «chow mein» ដែលជាម្ហូបពិសេស របស់ជនជាតិចិន កង់តុង។ ស្ថិត​ក្នុងសភាពតក់ស្លុតជាខ្លាំង អតិថិជនរូបនោះ បានរត់ទៅរាយការណ៍ ប្រាប់នគរបាលភ្លាម។

នៅនឹងកន្លែង អាជ្ញាធរក៏បានសម្ដែង ការភ្ញាក់ផ្អើលដូចគ្នា ដោយពួកគេប្រទះឃើញ សត្វឆ្កែជាច្រើនក្បាល ដាក់ជាប់​នៅ​ក្នុង​ទ្រុង ហើយមានសាកសព សត្វឆ្កែមួយ ត្រូវបានកាត់ជាកំណាត់ៗ ដាក់ទៅក្នុងធុងសម្រាម។

ភោជនីយដ្ឋានចិនប្រាំទៀត ត្រូវបានបិទទ្វា

ម្ចាស់ភោជនីយដ្ឋាន លោក យូ យូឈូ (Yu Yu Chou) បានទទួលស្គាល់ថា បានសម្លាប់ឆ្កែ តែបានអះអាងថា នោះ​សម្រាប់​តែ ដើម្បីការស៊ីចុកផ្ទាល់ខ្លួនប៉ុណ្ណោះ។ លោកបានបដិសេធដាច់អហង្កា ថាបានចំអិនសាច់ឆ្កែ ទៅឲ្យអតិថិជន​បរិភោភ។

ទោះយ៉ាងណាក៏ដោយ នគរបាលបានឃាត់ខ្លួនមនុស្សប្រាំនាក់ ដែលមានទាំងលោក យូ នេះម្នាក់ផង។ ដោយឡែក ភោជនីយដ្ឋានចិន ចំនួនប្រាំផ្សេងទៀត នៅក្នុងក្រុង ទីជ័អាណា ត្រូវបានបង្ខំឲ្យបិទទ្វា ដើម្បីទុកឲ្យអាជ្ញាធរ ធ្វើការ​ស៊ើប​អង្កេត៕