នាយនគរបាលប្រចាំខេត្ត អ៊ូដុង តានី លោក សានថាន អ៊ីតារ៉ាចាក់ (Sansthan Intarajak) បានថ្លែងប្រាប់ទីភ្នាក់ងារ សារព័ត៌មានបារាំង អាអេហ្វប៉េ (AFP) ឲ្យដឹងថា៖ «ព្រះសង្ឃ អង្គនោះ បានរើរុះបានក្បាលសព ចំនួនប្រាំ ក្នុង​នោះមាន​ក្បាលមួយ ជារបស់បងប្រុស និងមួយទៀត ជារបស់បងស្រី ព្រមទាំងក្បាលសពមួយ របស់ក្មេងស្រីអាយុ៨ឆ្នាំ និង​មួយ​ទៀត របស់ក្មេងប្រុស អាយុ៦ឆ្នាំ ដែលសុទ្ធតែស្លាប់ ដោយលង់ទឹក»។ ព្រះសង្ស និងអ្នករួមគំនិតផ្សេងទៀត បានគាស់​កកាយ​ផ្នូរចំនួនពីរទៀត នៅមិនឆ្ងាយប៉ុន្មាន ពីទីរួមខេត្ត កាលពីថ្ងៃអាទិត្យនេះ។

ក្នុងពេលនេះ ព្រះសង្ឃត្រូវបានសង្ស័យ និងដាក់ទៅក្នុង ការស៊ើបអង្កេត របស់អាជ្ញាធរ ពីបទ«លួច បំផ្លិចបំផ្លាញ​ឆ្អឹង​សាក​សព និងបំពានលើសាកសព»។ ប្រសិនបើតុលាការថៃ រកឃើញថាព្រះសង្ឃ មានកំហុសមែននោះ ព្រះអង្គ​នឹង​អាច​ជាប់ពន្ធនាគារ រហូតដល់៥ឆ្នាំ។

បើតាមមន្ត្រីទទួលខុសត្រូវ របស់នគរបាលដដែល បានថ្លែងឲ្យដឹងទៀតថា ព្រះសង្ឃបានបដិសេធ ពីការចោទ​ប្រកាន់​នេះ ហើយបានមានសង្ឃដីការពន្យល់ថា ព្រះអង្គបាននិមន្តចូល ទៅកាន់តំបន់ផ្នូរខ្មោចទាំងយប់ ដើម្បីនិយាយ​ជាមួយ​«ព្រលឹង» ដើម្បីទទួលបាន«លេខឆ្នោត»។

ពិធី«អាបធ្មប់» ឬ«ស្ដោះផ្លុំ» ដែលតែងត្រូវបានធ្វើឡើង ដោយព្រះសង្ឃក្នុងប្រទេសថៃនោះ ជារឿងដ៏មានប្រជាប្រិយ នៅ​ក្នុងប្រទេស ដែលកាន់សាសនាព្រះពុទ្ធ មួយនេះ ជាពិសេសនៅក្នុងតំបន់ជនបទ។ មិនសូវខុសពីប្រទេស​កម្ពុជា​ប៉ុន្មាន​ទេ នៅប្រទេសថៃ សាសនាព្រះពុទ្ធ ត្រូវបានដាក់បញ្ចូលលាយឡំ ជាមួយនឹងជំនឿអរូបិយ ឬអភូតហេតុផ្សេងទៀត ហើយ​ប្រជាជន​ថៃដ៏​ច្រើនលើសលប់ បានគិតថា អំពើ«អាបធ្មប់» និងការប្រារព្ធ ពិធីសាសនាផ្សេងទៀត នឹងនាំមកនូវសំណាង បង្កើត​ភាព​ចម្រុង​ចម្រើន ហើយបញ្ឈៀសនូវអពមង្គលទាំងឡាយ៕