កម្ពុជា កំពុងត្រៀមនាំ«ស្បែកក្រពើ» ចេញទៅបារាំង
- ដោយ: កេសរ កូល អត្ថបទ៖ កេសរកូល ([email protected]) - ភ្នំពេញ ថ្ងៃទី០១ ឧសភា ២០១៥
- កែប្រែចុងក្រោយ: May 01, 2015
- ប្រធានបទ: ពាណិជ្ជកម្ម
- អត្ថបទ: មានបញ្ហា?
- មតិ-យោបល់
-
ប្រទេសកម្ពុជា គ្រោងនឹងនាំចេញស្បែកក្រពើ ចេញទៅកាន់ប្រទេសបារាំង ចាប់ពីខែឧសភានេះទៅ ដើម្បីបំពេញតម្រូវការ ដែលកាន់តែមានច្រើនឡើង នៅក្នុងបណ្ដាប្រទេសនានា ក្នុងទ្វីបអ៊ឺរ៉ុប។ នេះបើតាមសេចក្ដីរាយការណ៍ របស់ប្រព័ន្ធផ្សព្វផ្សាយក្នុងស្រុក ដោយបានស្រង់សម្ដី អ្នកទទួលខុសត្រូវសមាគម អ្នកចិញ្ចឹមក្រពើ មកបញ្ជាក់។
អនុប្រធានសមាគម អភិវឌ្ឍន៍ការចិញ្ចឹមក្រពើកម្ពុជា លោក សេន រិទ្ធិ ដែលមានកសិដ្ឋានចិញ្ចឹមក្រពើ ប្រមាណជិត១០ ០០០ ក្បាល នៅក្នុងខេត្តសៀមរាប បានថ្លែងឡើងថា ស្បែកក្រពើ ១០០០ ស្បែកនឹងត្រូវបានគេនាំចេញ ទៅប្រទេសបារាំង នៅខែក្រោយ។ ស្រង់សម្ដីសារព័ត៌មាន ភ្នំពេញប៉ុស្ដ៍ លោក សេន រិទ្ធិ បានបញ្ជាក់ថា ប្រទេសកម្ពុជាទទួលបានការពេញចិត្ត ពីអ្នកទិញអន្តរជាតិ ដោយសារតែ គុណភាពរបស់ស្បែកក្រពើ និងការអភិរក្សដ៏រឹងមាំ របស់សត្វក្រពើព្រៃ ខណៈដែលកសិដ្ឋានចិញ្ចឹមសត្វក្រពើបានកើនឡើង នៅក្នុងរយៈពេលពីរបី ឆ្នាំកន្លងមកនេះ។
អ្នកជំនាញខាងចិញ្ចឹមក្រពើរូបនេះ បានថ្លែងឲ្យដឹងថា៖ «ពួកគេមានចំណាប់អារម្មណ៍ ក្នុងការទិញស្បែកក្រពើ ពីពួកយើង ដោយសារ តែស្បែកក្រពើរបស់យើង មានភាពទន់ជាងគេ ហើយប្រទេសកម្ពុជា មានចំនួនសត្វក្រពើព្រៃ ក្នុងចំនួនច្រើនបំផុត ក្នុងចំណោមប្រទេសជាច្រើន នៅក្នុងតំបន់ ដែលឆ្លុះបញ្ចាំងថា យើងបានធ្វើការងារបានល្អ នៅក្នុងការការពារសត្វក្រពើព្រៃ»។
អ្នកចិញ្ចឹមក្រពើ អាចលក់កូនក្រពើ ចាប់ពីអាយុ ៣ខែ ដល់ ១២ខែ ក្នុងតម្លៃពី ១២ ដល់ ១៤ដុល្លារអាមេរិក ក្នុងមួយក្បាល ខណៈដែលស្បែកក្រពើ ដែលមានអាយុ ៣ឆ្នាំ អាចត្រូវគេលក់ក្នុងតម្លៃ ៨០ដុល្លារអាមេរិក ក្នុងមួយក្បាល។
អនុប្រធានសមាគមចិញ្ចឹមក្រពើ សៀមរាបអង្គរ លោក អ៊ុង វិសាល បានបង្ហាញពីក្តីសង្ឃឹម អំពីទីផ្សារអនាគត នៅពេលស្បែកក្រពើកម្ពុជា ថានឹងទទួលបាន ការចាប់អារម្មណ៍ពីអ្នកទិញអន្តរជាតិ។ ប៉ុន្តែលោកថ្លែងថា កសិករចិញ្ចឹមសត្វក្រពើកម្ពុជា នៅតែប្រឈមនឹងបញ្ហា ក្នុងការចាប់យកទីផ្សារក្រពើ ដែលមានតម្លៃខ្ពស់ ដោយសារកង្វះដើមទុន និងបច្ចេកទេសក្នុងការចិញ្ចឹម។
លោកបញ្ជាក់ថា៖ «នៅពេលនេះ អ្នកទិញមកពី EU កំពុងស្វែងរកស្បែកក្រពើកម្រិត C តែមួយប៉ុណ្ណោះ ក្នុងចំណោមស្ដង់ដាររបស់ខ្លួន មិនពិបាកសម្រេចបាននោះទេ។ ពួកគេផ្ដល់តម្លៃជាង១០០ដុល្លារអាមេរិក ក្នុងមួយក្បាលសម្រាប់ កម្រិត C។ បើស្បែកក្រពើរបស់យើង អាចត្រូវបានចាត់ក្នុងកម្រិត B យើងទទួលបាន២០ភាគរយបន្ថែម និងសម្រាប់កម្រិត A យើងទទួលបានជាង៥០ភាគរយ»។
កសិដ្ឋានចិញ្ចឹមក្រពើ ប្រមាណជា ៣៥៧ ត្រូវបានចុះបញ្ជី នៅក្រសួងកសិកម្ម រុក្ខាប្រមាញ់ និងនេសាទ។ កូនក្រពើប្រហែល៥០ ០០០ក្បាល ត្រូវបាននាំចេញ កាលពីឆ្នាំ២០១៣ ខណៈការនាំចេញកូនក្រពើ ដើម្បីលក់ស្បែក នៅពេលសត្វក្រពើធំ ត្រូវបានរដ្ឋាភិបាលកម្ពុជាជំរុញ តាំងពីឆ្នាំ ២០០១៥។ នេះបើតាមសារព័ត៌មាន ភ្នំពេញប៉ុស្ដ៍ ដដែល។ សារព័ត៌មាន បានស្រង់សម្ដីប្រធានផ្នែកអភិវឌ្ឍន៍ក្រពើ នៃអគ្គនាយកដ្ឋានរដ្ឋបាលជលផល លោក ហេង សុវណ្ណារ៉ា មកបញ្ជាក់ទៀតថា ដំណើរការនាំចេញពីកម្ពុជា ត្រូវមានអាជ្ញាប័ណ្ណអនុញ្ញាត ជាលក្ខណៈអន្តរជាតិ ស្តីពីប្រភេទសត្វព្រៃនិង រុក្ខជាតិដែលជិតផុតពូជ (CITES) ដែលជាកិច្ចព្រមព្រៀងអន្តរជាតិមួយ រវាងរដ្ឋាភិបាល និងរដ្ឋាភិបាល៕