លោក ស៊ីមុន ម័រ (Simon Moore) ជាតិអង់គ្លេស មានជម្ងឺដ៏កម្រមួយ ដែលហៅថាភាសាអង់គ្លេស ជា «Treacher Collins»។ ដោយ​សារ​តែជម្ងឺនេះ បានធ្វើឲ្យបុរស ដែលមានអាយុ៣០ឆ្នាំរូប ក្លាយជាមនុស្សថ្លង់ និងមានទម្រង់មុខ ប្ដូរ​ពី​ធម្មតា ហើយ​ការ​ប្ដូរ​ទម្រង់​មុខ​ មិនបញ្ឈប់ត្រឹមនេះទេ តែវាកាន់តែវិវត្តន៍ ទៅមុខទៀត។

ចំណែកឯភរិយា របស់លោក ស៊ីមុន វិញ អ្នកស្រី វិចឃី (Vicky) បានធ្លាក់ខ្លួន មានផ្ទៃពោះ ដោយការបន្សាំមេជីវិតចូលគ្នា  ហើយពួកគេទាំងពីរនាក់ បានសម្រេចចិត្តទុកកូននេះ។ នៅក្នុងអំឡុងពេល មានផ្ទៃពោះនោះ ការវិភាគ​ផ្នែកវេជ្ជសាស្ត្រ​ទាំង​ឡាយ ក៏បានបង្ហាញប្រាប់ដែរថា ទារកដែលកើតចេញមក នឹងមានស្ថានភាព ដូចឪពុករបស់វាដូច្នេះដែរ។

ចំណេរកាលក្រោយមក ស្វាមីភរិយាទាំងពីរ បង្កើតបានកូនស្រីមួយ ហើយបានដាក់ឈ្មោះថា អាលីស (Alice)។ កុមារី អាលីស មានមុខបាក់ធ្លាក់ (សូមមើលរូបថតខាងលើ) និងមានបញ្ហា ក្នុងការទទួលទានអាហារ។ ដោយសារតែហេតុនេះ ទើប​មនុស្ស​ជា​ច្រើន បានយល់ថា លោក ស៊ីមុន មិនគួរបង្កើតកូនមកទេ បើបង្កើតគ្នាឲ្យវេទនា រងទុក្ខនឹងជម្ងឺបែបនេះ។

ប៉ុន្តែលោក ស៊ីមុន បានរៀបរាប់ប្រាប់សារព័ត៌មាន នៅចក្រភពអង់គ្លេសថា៖ «ខ្ញុំមិនដែលចង់ ឲ្យកូនស្រីខ្ញុំ កើតរឿង​បែប​នេះទេ»។ លោកបានបានបន្តទៀតថា៖ «ប៉ុន្តែយើងដឹងថា អាលីស នឹងមានមនុស្ស ដែលនៅជុំវិញនាង ស្រឡាញ់នាង ដូចអ្វីដែលនាងចង់មាន និងចង់ឃើញ។ អាលីស បានធ្វើឲ្យជីវិតខ្ញុំផ្លាស់ប្ដូរ។ នាងកូនស្រីសម្លាញ់ចិត្ត ហើយខ្ញុំ​និយាយ​ជា​មួយនាងថា នាងស្អាតណាស់។»

តាមពិតទៅ សិទ្ធិនៃការបង្កើតកូន មិនមានច្បាប់ នៅក្នុងប្រទេសបស្ចឹមលោកណាមួយ ធ្វើការហាមឃាត់នោះទេ គ្រាន់​តែ​គូស្វាមីភរិយាទាំងពីរ មិនយល់ឲ្យច្បាស់ ថាតើកូនរបស់ពួកគេ ដែលកើតចេញមក នឹងរកផលប៉ះពាល់ដល់​កម្រិតណា។ អ្នកស្រី វិចឃី បានថ្លែងស្រង់សម្ដីគ្រូពេទ្យ មកបញ្ជាក់ថា៖ «កូនស្រីខ្ញុំ អាចមានបញ្ហាបន្តិចបន្តួច ឬបើមិន​អញ្ចឹងទេ នាង​អាច​នឹងគ្មានមុខសោះតែម្ដង។ ប៉ុន្តែក្រុមគ្រូពេទ្យ បានគាំទ្រពួកយើង ក្នុងការបង្កើតកូននេះ។»។ អ្នកស្រីនៅ​តែ​សម្ដែង​ការ​ជឿ​ជាក់ ទៅ​លើ​កូនស្រីថា បើទោះជាស្វាមីអ្នកស្រីមានជម្ងឺ ប៉ុន្តែកូនស្រីរបស់អ្នកស្រី នៅតែអស្ចារ្យអញ្ចឹង។

នៅក្នុងសង្កាត់ ដែលអ្នកទាំងបីរស់នៅ អ្នកផងទាំងឡាយ បានសម្ដែងការខ្វាយខ្វល់ របស់ពួកគេ និងបានបន្ទាសលោក ស៊ីមុន និងអ្នកស្រី វិចឃី ដែលបានបង្កើត អាលីស មកលើផែនដីនេះ។ អ្នកស្រី វិចឃី បានថ្លែងឡើងថា៖ «អ្នកជិតខាង​យើង ថាពួកយើងនេះសាហាវណាស ដែលបានធ្វើឲ្យ អាលីស ចាប់កំណើតមក។ តែ អាលីស ជាទេពធីតារបស់​ពួក​យើង ៗអត់មានសោកស្ដាយអ្វី សូម្បីបន្តិចឡើយ។»៕