អគ្គីភ័យឆាបឆេះ បានបង្ករការភ្ញាក់ផ្អើល កាលពីវេលាម៉ោង៦ និង៣០នាទីព្រឹក ថ្ងៃទី០៨ ខែឧសភា ឆ្នាំ២០១៥ នៅក្នុង​បន្ទប់​ពិសោធ លេខ២០១ នៃសាកលវិទ្យាល័យ វិទ្យាសាស្ត្រសុខាភិបាល ហៅសាលាពេទ្យ ដែលមានទីតាំង នៅក្នុងក្រុមទី៩៥ ភូមិទី៦ សង្កាត់ស្រះចក ខណ្ឌដូនពេញ រាជធានីភ្នំពេញ។ អគ្គីភ័យនេះ បានឆាបឆក់យកជីវិត គ្រូបង្រៀនម្នាក់ ផ្នែកTP ភ្លាមៗ នៅពេលកើតហេតុ។

ប្រភពព័ត៌មាន ពីកន្លែងកើតហេតុផ្ទាល់ បានឲ្យដឹងថា ជនរងគ្រោះដែលបានស្លាប់ ឈ្មោះ ហ៊ុយ សៀក អាយុ​៣៤ឆ្នាំ សព្វ​ថ្ងៃជាគ្រូបង្រៀន ផ្នែកអនុវត្តន៍ផ្ទាល់ នៅក្នុងបន្ទប់ពិសោធ។ ប្រភពបន្តថា សាកសពអង្គុយស្លាប់ ដោយគ្មានសម្លៀកបំពាក់ នៅជាប់ខ្លួន នៅលើកៅអីក្នុង​ភ្នក់​ភ្លើង ដែលស្ថិតនៅជាន់ទីបី។ ករណីអគ្គីភ័យនេះ បានផ្ទុះបណ្តាលឲ្យខូចខាត ពីបន្ទប់​ពិសោធ​២០១ ដល់បន្ទប់២០៣ ខណៈសាកសព របស់ជនរងគ្រោះ ស្ថិតនៅបន្ទប់២០១។

តាមការឲ្យដឹង ពីមិតភក្កិស្និតស្នាលម្នាក់ របស់សាកសពលោក សយ សាវរី បានរៀបរាប់ថា សាកសពពិតជា នៅមាន​ចំណុច​សង្ស័យច្រើន បើទោះជាពេទ្យជំនាញ និងអ្នកធ្វើកោសល្យវិច័យ មិនទាន់បានរកឃើញ ពីមូលហេតុ នៃការ​ផ្ទុះ​ច្បាស់​លាស់ក៏ដោយ។  លោកបញ្ជាក់ថា មិត្តភក្កិរបស់លោក មិនអាចធ្វើអត្តឃាតនោះទេ ព្រោះនៅជិតសាកសព គ្មាន​វត្ថុ​តាង​ណាមួយ ដែលបញ្ជាក់ថា សពសម្លាប់ខ្លូនឯងទេ។ ម្យ៉ាងទៀត ចំណុចដែលគ្រប់គ្នាសង្ស័យ គឺសាកសពគ្មាន​សម្លៀក​បំពាក់ ហើយនៅលើកៅអីធ្វើការទៀត។

មិត្តភក្តិជនរងគ្រោះរូបនេះ បានបញ្ជាក់ទៀតថា លោកផ្ទាល់ បានសង្ស័យពីការឆ្លងចរន្តអគ្គិសនី ទើបបណ្តាលឲ្យផ្ទុះ រហូត​ដល់៣បន្ទប់បែបនេះ ដោយសារ នៅក្នុងបន្ទប់នោះ មានផ្ទុកអាល់កុល ប្រមាណ១២០លិត្រ ដូច្នេះភាគរយ នៃការឆាបឆេះ​បង្កឲ្យមានអគ្គិភ័យ មានកម្រិតខ្ពស់។

យ៉ាងណាក៏ដោយ គេនៅមិនទាន់បង្ហាញ ពីមូលហេតុ នៃការឆេះពិតប្រាកដនោះទេ។ រីឯសាកសពវិញ បន្ទាប់ពីធ្វើ​កោសល្យ​វិច័យរួច ត្រូវបានបញ្ជូនទៅឲ្យក្រុមគ្រួសារ ក្នុងខេត្តកំពង់សោម ដើម្បីធ្វើបុណ្យតាមប្រពៃណី។ ក្នុងហេតុការណ៍ គ្រោះ​អគ្គីភ័យ​ដ៏អាថកំបាំងនេះ ត្រូវបានក្រុមមន្ត្រីជំនាញ ពន្លត់អគ្គីភ័យ ធ្វើការពន្លត់បានសម្រេច ដោយប្រើប្រាស់ឡានទឹក ចំនួន​ពីរ គ្រឿង និង​បំពង់បាញ់ទឹក ២០ខ្សែរ ដើម្បីភ្ជាប់ទៅដល់គោលដៅ៕

» វីដេអូ ចាប់រូបភាព នៅក្រោយព្រឹត្តិការណ៍ (រូបភាពអាចប៉ះពាល់អារម្មណ៍)៖