ពីមុនមក ជាច្រើនឆ្នាំ គេតែងឃើញ មានការតុបតែង គូសវាស ទៅលើប្រអប់ស្រោមអនាម័យ ដើម្បីបង្កការទាក់ទាញ ទៅដល់អតិថិជន ឲ្យចង់ទិញស្រោមនោះ ទៅប្រើ ហើយគេមិនដែលឃើញ ការតុបតែងគូសវាសនេះ ត្រូវបានគេអនុវត្តន៍ ទៅលើស្រោមអនាម័យផ្ទាល់នោះទេ។

តែពីថ្ងៃនេះទៅ បងប្អូនស្រីបីនាក់ បានងបង្កឲ្យមានការវិវត្តន៍ថ្មីមួយ ទៅក្នុងពិភពស្រោមអនាម័យ របស់បុរស។ នាង ជូលីយ៉ា (Julia) - លីហ្សា (Lizza) និងនាង ម៉ាណុង (Manon) បានដាក់ចេញមកលក់ នូវស្រោមអនាម័យ ដែល​មាន​បោះ​ពុម្ភ​រូបភាព នៅជាប់ជាមួយ (មើលក្នុងរូបភាព)។ សារជាតិ ឡាតិច ទន់ៗ ដែលយកមកធ្វើស្រោម បានក្លាយជាផ្ទៃលាតមួយ ដែល​អាចធ្វើការបោះពុម្ភពីលើបាន ដោយសារបច្ចេកវិទ្យា ដ៏ពិសេសថ្មី។

ការដាក់ចេញមកលក់ នូវផលិតផលស្រោម ដែលមានរូបភាពពីលើនេះ និងមានយីហោ «Made In Love» មិនសម្រាប់​អតិថិជនទូទៅ ទិញយកមកប្រើនោះទេ។ ផ្ទុយទៅវិញ យីហោស្រោមអនាម័យ របស់បងប្អូនស្រីទាំងបី មានបំណង​លើក​តម្លៃ នៃរូបភាពរបស់ខ្លួន ឲ្យឡើងដល់កម្រិតខ្ពស់បំផុត។ អ្នករចនារូបភាព បួននាក់ ជាអ្នកបង្កើតគំនិត និងភាពសម្បូរបែប ទៅលើរូបភាព នៃផលិតផលថ្មីនេះ។ នាង ជូលីយ៉ា បានថ្លែងឡើងថា៖ «យើងចង់លប់បំបាត់ចោល នូវរូបភាព ដែលឲ្យមក​យើង ត្រឹមតែជាស្រោមអនាម័យធម្មតា»។

ស្រោមអនាម័យនេះ នឹងមិនមានលក់ នៅក្នុងទីផ្សារធម្មតា ឬនៅក្នុងឱសថដ្ឋាននោះឡើយ តែនឹងត្រូវដាក់លក់ តែនៅ​ក្នុង​ហាងរចនាម៉ូដ ហើយនឹងមានតម្លៃ១២អ៊ឺរ៉ូ (ឬ១៤ដុល្លា) សម្រាប់ស្រោមមួយគូ៕