ស្ត្រីអតីតបុគ្គលិក នៅក្នុងធនាគារមួយរូប អ្នកស្រី Nur Shila Kanan អាយុ៣៤ឆ្នាំ ត្រូវបានផ្តន្ទាទោស ឲ្យជាប់ពន្ធនាគារ ៦ឆ្នាំ  បន្ទាប់ពីតុលាការបានរកឃើញ ពីបទធ្វើការផ្ទេរមរតក ដោយខុសច្បាប់ នូវទឹកប្រាក់ ប្រមាណជា ៧៧ ៥៣០ រីនជិត (ប្រហែលជា ២២ ០០០ដុល្លា ឬ១៩ ៣០០អ៊ឺរ៉ូ) ចេញពីគណនីធនាគារ របស់ជនរងគ្រោះ ដែលបានបាត់ខ្លួន ទៅជាមួយ​នឹង​យន្ដហោះ ប៊ូអ៊ីង (Boeing 777) របស់ក្រុមហ៊ុនម៉ាឡេស៊ីអ៊ែរឡាញ កាលពីជាងមួយឆ្នាំមុន។

នៅក្រោយការប្រកាសសាលក្រម ចៅក្រម  Norsharidah Awang បានថ្លែងទៅកាន់អ្នកស្រី ជាជនជាប់ចោទថា៖ «ខ្ញុំសង្ឃឹម​ថា អ្នកស្រីនឹងគិតគូរឡើងវិញ ហើយអ្នកស្រីនឹងយក ការផ្ដន្ទាទោសនេះ ជាមេរៀនមួយ»។

រីឯស្វាមីរបស់អ្នកស្រី Nur Shila Kanan ដែលមានអាយុ៣៤ឆ្នាំ ដូចគ្នាដែរនេះ ក៏ត្រូវបានតុលាការផ្តន្ទាទោស ឲ្យជាប់​ពន្ធនាគារ ៤ឆ្នាំ ពីបទបានលួចដកប្រាប់ ៧ ៦៥០រីនជិត (ប្រហែលជា ២ ២០០ដុល្លា ឬ១ ៩០០អ៊ឺរ៉ូ ចេញពីគណនីធនាគារ របស់ជនរងគ្រោះម្នាក់ទៀត។

ទង្វើខុសច្បាប់ គ្មានគុណធម៌ របស់ប្ដីប្រពន្ធទាំងពីរនាក់ ត្រូវបានអ្នកស៊ើបអង្កេត រកឃើញថាបានប្រព្រឹត្តិ រវាងពីថ្ងៃ ១៤ ខែឧសភា និងថ្ងៃទី៨ ខែកក្កដា ឆ្នាំទៅម៉ិញ ពោលនៅប៉ុន្មានខែ ក្រោយពីយន្ដហោះ MH370 ដែលភ្ជាប់ជើងហោះហើរ ពី​រដ្ឋធានីកូឡាឡំពួរ ប្រទេសម៉ាឡេស៊ី ឆ្ពោះ​ទៅ​កាន់រដ្ឋធានី ប៉េកាំង ប្រទេសចិន កាលពីព្រឹកព្រហាមថ្ងៃទី៨ ខែមិនា បានបាត់​ខ្លួនយ៉ាងអាថ៌កំបាំង ជាមួយនឹងនឹងអ្នក​ដំណើរ ២៣៩នាក់។ សូមបញ្ជាក់ដែរថា មកទល់នឹងពេលនេះ ការរុករក​យន្ដហោះ​នេះ នៅក្នុងមហាសមុទ្រឥណ្ឌាខាងត្បូង នៅមិនទាន់ឃើញ ជាលទ្ធផលអ្វីនៅឡើយ៕