នាវិមានរដ្ឋសភា ក្នុងថ្ងៃទី២៦ ខែឧសភានេះ ក្នុងសិក្ខាសាលាស្តីពី«ការស្វែងយល់ពីច្បាប់ និងការអនុវត្តច្បាប់ ស្តីពីការ​ប្រឆាំង អំពើពុករលួយ» លោក ជិន យឿន អគ្គលេខាធិការរង នៃព្រឹទ្ធិសភា បានលើកជាសំនួរមួយ ពាក់ព័ន្ធដល់​មន្រ្តី​របស់​អង្គភាព ប្រឆាំងអំពើពុករលួយផ្ទាល់ ដែលមានទំនាក់ទំនង ជិតស្និតនឹងថ្នាក់ដឹកនាំកំពូល នៃរដ្ឋាភិបាល​កម្ពុជា។ សំនួរ​នេះ បានដុតកម្ដៅលោក ឱម យិនទៀង ប្រធានអង្គភាព ប្រឆាំងអំពើពុករលួយ ឲ្យឆេះឡើង។

លោក ឱម យឹនទៀង ប្រធានអង្គភាព ប្រឆាំងអំពើពុករលួយកម្ពុជា បានប្រតិកម្មភ្លាមៗថា បើចង់ដឹងថា អង្គភាពប្រឆាំង អំពើ​ពុករលួយឯករាជ្យ ឬមិនឯករាជ្យ ត្រូវមើលលើច្បាប់។ តើការអនុវត្តសព្វថ្ងៃ ខុសច្បាប់ត្រង់ណា? ខុសមាត្រាណា?

លោក យិនទៀង បានបញ្ជាក់ថា៖ «នេះមិនមែនជាច្បាប់បុគ្គល របស់ឯកឧត្តមថា អ្នកនោះជិតស្និតថ្នាក់ដឹកនាំ ធ្វើម៉ិច​ឯករាជ្យ? អាហ្នឹងច្បាប់ របស់ឯកឧត្តមផ្ទាល់ខ្លួនតើ! មានច្បាប់អង្គការសហប្រជាជាតិ និយាយអ៊ីចឹងណា? អត់មានទេ! មិន​មានរើសអើងទេ លើបញ្ហាហ្នឹង។»

លោកបានសួរបញ្ចាក់ថា៖ «ស្អីទៅអ្នកធំ? អ្នកពាក់ផ្កាយបី មិនធំទេឬ? អ្នកតែងតាំង ដោយព្រះរាជក្រិត្យ មិនធំទេ? តែខ្ញុំ​អាចចាប់បាន។» លោកប្រធានអង្គភាព បានទាមទារ ឲ្យលោក ជិន យឿន ដាក់ករណីអ្នកធំណាម្នាក់ ឲ្យជាក់ស្តែងមក​លោក លោកនឹងធ្វើ នឹងចាប់ឲ្យមើល បើលោកមិនហានធ្វើទេ ចាំនិយាយរឿងនេះ។

លោកបានបញ្ជាក់ដូច្នេះថា៖ «យើងខ្ញុំធ្វើ ក្រែងធ្វើតាមច្បាប់! ឬធ្វើតាមមាត់បុគ្គល? ឯករាជ្យមិនឯករាជ្យ ផ្អែកលើច្បាប់។ (...) ឯករាជ្យ ឬមិនឯករាជ្យ កុំមកសួរយើងខ្ញុំ លើបញ្ហាហ្នឹង។ (...) បើឯកឧត្តមគ្រាន់តែសើរៗ មើលមេឃ មើលផ្កាយទេ ថា​ចង់​​ភ្លៀង ឬមិនចង់ភ្លៀង ឲ្យយើងខ្ញុំធ្វើតាម គ្មានមាត្រាណា ដែលអាចធ្វើបានទេ។»

តែយ៉ាងណាក៏ដោយ ក៏លោកបានទទួលស្គាល់ថា ប្រសិនបើក្រុមការងាររបស់លោក មិនបានធ្វើតាមច្បាប់នោះ មិនត្រឹម​តែ«គ្មាន»ឯករាជ្យនោះទេ ថែមទាំងមានបទល្មើសថែមទៀត៕

» សូមទស្សនាការជជែកដេញដោយគ្នានេះ ដូចខាងក្រោម៖