ការជួយសង្គ្រោះ កំពុងបន្តធ្វើនៅឡើយ នៅក្នុងព្រឹត្តិការណ៍លិចនាវា មួយគ្រឿង ដែលមានដឹកមនុស្ស៤៥៨នាក់ នៅលើ​ទន្លេយ៉ង់សេ។ បើទោះជាស្ថានភាពឧត្តុនិយម មិនមានភាពអំណោយផល ដល់ការជួយសង្គ្រោះ បណ្ដាលមកពីខ្យល់ និង​ភ្លៀងដ៏ខ្លាំងនោះ ក៏ពិតមែន តែនាយករដ្ឋមន្ត្រីចិន លោក លី គេគៀន (Li Keqiang) នៅពេលនេះ បានធ្វើដំណើរ ទៅកាន់​ទីនោះដោយផ្ទាល់ ដើម្បីពិនិត្យមើលស្ថានការណ៍ដោយផ្ទាល់។

នាវា «Eastern Star» ដែលមានប្រវែងបណ្ដោយ ៧៦ម៉ែត្រ បានលិច នៅវេលាម៉ោង ២១ និង២៨នាទី ម៉ោងក្នុងស្រុក។ ទូរទស្សន៍ផ្លូវការចិន «CCTV» បានរាយការណ៍ថា មនុស្សទាំង៤៥៨នាក់នោះ មាន៤០៦ ជាអ្នកដំណើរ ៥នាក់ជាបុគ្គលិក បម្រើការឲ្យក្រុមហ៊ុនទេសចរណ៍ និង៤៧នាក់ទៀត ជាអ្នកបម្រើការលើនាវា។ ទូរទស្សន៍បានបញ្ជាក់ទៀតថា នាវាដែល​អាចទទួលមនុស្សឲ្យជិះ បានរហូតដល់ ៥៣៤នាក់នេះ ជាកម្មសិទ្ធរបស់ក្រុមហ៊ុនមួយ ដែលរៀបចំដំណើរទេសចរណ៍ នៅ​ក្នុង​តំបន់នោះ ដែលសម្បូរទៅដោយទេសភាពដ៏ប្រពៃ។

នាវានេះ បានធ្វើដំណើរភ្ជាប់ក្រុង ណានជីង (Nanjing) និងក្រុង ចុងគីន (Chongqin) ដែលមានចំងាយពីគ្នាប្រមាណជា ១៥០០គីឡូម៉ែត្រ។ ទន្លេយ៉ងសេ ជាទន្លេទី៣ ដែលវែងជាងគេក្នុងពិភពលោក មានប្រវែងទទឹង ក្នុងខេត្ត ហ៊ូបី (Hubei) ប្រមាណជាង១គីឡូម៉ែត្រ ជាមួយនឹងជម្រៅ ច្រើនជាង៣០ម៉ែត្រ។

កាលពីខែមករាកន្លងទៅ  កាណូតសណ្ដោងមួយ បានលិចទៅក្នុងទន្លេងនេះ បង្កឲ្យមានមនុស្សស្លាប់២២នាក់ ក្នុងនោះ ៨នាក់ ជាជនបរទេស៕