ភាពមន្ទិលសង្ស័យ ទៅលើច្បាប់ស្ដីពី សមាគម អង្គការក្រៅរដ្ឋាភិបាល នឹងលែងមានតទៅទៀតហើយ បន្ទាប់ពី​លោក​នាយក​រដ្ឋមន្រ្តីកម្ពុជា បានធ្វើការក្រើនរំលឹកជាថ្មីថា កម្ពុជាចាំបាច់ណាស់ កម្ពុជាត្រូវមានច្បាប់គ្រប់គ្រង មួយជាក់លាក់។

ថ្លែងក្នុងពិធីសម្ពោធ ដាក់ឲ្យប្រើប្រាស់ ផ្លូវជាតិលេខ៤១ កាលពីថ្ងៃទី២ ខែមិថុនា ឆ្នាំ២០១៥នេះ លោក ហ៊ុន សែន បាន​លើកឡើងថា សេចក្តីព្រាងច្បាប់ស្តីពី សមាគម និងអង្គការក្រៅរដ្ឋាភិបាល នឹងត្រូវគណៈរដ្ឋមន្ត្រី ធ្វើការអនុម័ត នា​ពេល​ខាងមុខនេះ ហើយបន្ទាប់មក នឹងបញ្ជូនទៅកាន់រដ្ឋសភា។ លោកបានលើកឡើងថា សេចក្តីព្រាងច្បាប់នេះ មានការ​ពិគ្រោះ​យោបល់ច្រើនមកហើយ រួមទាំងការទទួលយក នូវធាតុថ្មីៗ ដែលបានស្នើសុំ បញ្ចូលក្នុងច្បាប់នេះ។

លោកបានបង្ហាញថា មូលហេតុ ដែលនាំឲ្យមានការបង្កើតច្បាប់ សមាគម និងអង្គការក្រៅរដ្ឋាភិបាលនេះ ព្រោះលោក ចង់ឲ្យមានការទ្រទ្រង់ និងលើកទឹកចិត្ត សកម្មភាពរបស់សមាគម និងអង្គការក្រៅរដ្ឋាភិបាល ដែលនឹងប្រព្រឹត្តទៅ ស្រប​តាមច្បាប់ធានា។ លោកថា ភាពចាំបាច់នៃការធ្វើច្បាប់នេះ ព្រោះមានអង្គការ ក្រៅរដ្ឋាភិបាល មួយចំនួន អស់ពីឲ្យលុយ​ទៅ​ពលរដ្ឋខ្ចី ឥឡូវមានអង្គការក្រៅរដ្ឋាភិបាល មួយចំនួនទៀត បែរជា ទៅយកលុយពីពលរដ្ឋវិញ។

លោក ហ៊ុន សែន បានស្នើឲ្យ សមាគម និងអង្គការក្រៅរដ្ឋាភិបាលទាំងអស់ កុំមានការព្រួយបារម្ភពីច្បាប់នេះ ដែល​មាន​តួនាទីសំខាន់ ក្នុងការការពារ នូវសិទ្ធិបុគ្គលគ្រប់រូបនោះ។ លោកបានថ្លែងឡើងថា៖ «ច្បាប់នេះ នឹងបើកទូលាយ​សកម្មភាព ឲ្យអ្នកទៅតាមផ្លូវច្បាប់មួយ។ ការធានា ទៅតាមផ្លូវច្បាប់មួយ បានសេចក្តីថា ធ្វើអ្វីក៏ដោយ មានច្បាប់​គ្រប់​គ្រង។ ហើយ​ច្បាប់នេះ រដ្ឋធម្មនុញ្ញតម្រូវក្នុងមាត្រាទី៤២ ចែងថា ប្រជាពលរដ្ឋខ្មែរ មានសិទ្ធិបង្កើតសមាគម និងបក្ស​នយោបាយ។ សិទ្ធិនេះ ត្រូវកំណត់ស្តីពី ការគ្រប់គ្រងអង្គការក្រៅរដ្ឋាភិបាល និងសមាគម ដោយច្បាប់។ យើងបាន​ធ្វើ​ច្បាប់ ស្តី​ពី​បក្ស​នយោបាយ​រួច​ហើយ តែមិនទាន់បានធ្វើច្បាប់ ស្តីពី ការបង្កើតសមាគម និងបក្សនយោបាយ។»៕