បេក្ខជនដែលបង្កការភ្ញាក់ផ្អើល ព្រោះមានសំម្លេងដូចទៅ នឹងលោក ឆាយ វីរៈយុទ្ធ នោះឈ្មោះ សំរិទ្ធ ជាបេក្ខជន​ដែលបានប្រឡង នៅក្នុងកម្មវិធីប្រកួតប្រជែងសំឡេងមួយ របស់ស្ថានីយ៍ទូរទស្សន៍អាស៊ីអាគ្នេយ៍ កាលពីពេល​ថ្មីៗ​នេះ។ បទចម្រៀង មានចំណងជើងថា «មានជាតិក្រោយ មិនប្រាកដថាបានស្គាល់គ្នា» ដែលត្រូវបាន​គេ​ស្គាល់​ថា មានសំនៀងដើម ជាសំនៀងរបស់លោក ឆាយ វីរៈយុទ្ធ នោះ  ត្រូវបានបេក្ខជន សំរិទ្ធ លើកយក​មក​ច្រៀង ហើយទាំងការបញ្ចេញសំឡេង និងរូបរាងកាយវិការ ធ្វើឲ្យអ្នកទស្សនាភ្ញាក់ផ្អើលជាខ្លាំង។

អ្នកគាំទ្រខ្លះបានលើកឡើងថា៖ «បើមិនបានឃើញមុខ ច្បាស់ជាគិតថា លោកឆាយ វីរៈយុទ្ធមិនខាន»។ អ្នក​គាំទ្រ​បានបន្ថែមថា៖ «សម្លេង ឆាយ វីរៈយុទ្ធ ទី២» ខណៈប្រិយមិត្តផ្សេងទៀត បានលើកសរសើរថា ច្រៀងបាន​ល្អ ស្ទើរតែដូចម្ចាស់ដើម ១០០%ទៅហើយ មិននឹកស្មានសោះ។ ការគាំទ្រទាំងនេះ មានទាំងនៅលើឆាក និង​នៅ​តាមបណ្តាញសង្គម ព្រោះមានប្រិយមិត្តមួយចំនួន មិនជឿថា នេះជាសំឡេង របស់បេក្ខជនប្រឡងទេ ថាជា​សំឡេង​ចម្រៀង ដែលគេចាក់ឲ្យដើរតួជាដើម។

តែបើតាមការបញ្ជាក់របស់យុវជន វិចិត្រ ដែលជាអ្នកគាំទ្រ បេក្ខជនខាងលើ បានលើកឡើងថា លោកបាន​ទៅ​ទស្សនា​ផ្ទាល់ នៅស្ថានីយ៍ទូរទស្សន៍អាស៊ីអាគ្នេយ៍ វាជាកាពិត ជាសម្លេងរបស់លោក សំរិទ្ធ ពិតប្រាកដមែន។ អ្នក​គាំទ្ររូបនេះ បានឲ្យដឹងថា ដំបូងគ្នានអ្នកណាស្មានថា ច្រៀងបានពិរោះដូចនេះទេ តែពេលបានលឺមួយឃ្លា​ដំបូង ហ៊ោស្ទើរបែកឆាក បន្ទាប់មកស្ងាត់ចាំស្តាប់បន្ត។

វីដេអូខាងក្រោមនេះ ដែលត្រូវបានបង្ហោះ នៅក្រោយពីកម្មវិធីប្រកួតប្រជែង លើបណ្ដាញសង្គម និងលើយូធូប​នោះ បានទទួលនូវអ្នកចូលទៅទស្សនាយ៉ាងច្រើន។ ទស្សនិកជនម្នាក់ បាននិយាយថា ពិតជាកម្រមែន ពីមុន​មាន​អ្នកសំឡេងស្អក ដូចលោក ខេម ពេលនេះមានបេក្ខជន មានសំឡេងដូចលោក ឆាយ វីរៈយុទ្ធ ទៀតពិត​ជា​ប្រសើរមែន។ ចង់ដឹងច្បាស់ថា ការលើកឡើង របស់អ្នកទស្សនាផ្ទាល់ និងអ្នកទស្សនាវីដេអូ ត្រឹមត្រូវឬ យ៉ាង​ណា ហើយសំឡេងនោះវា ដូចគ្នា និងខុសគ្នាដល់កម្រិតណា សូមទស្សនាវីដេអូពេញខាងក្រោម៕