តាមការបញ្ជាក់របស់ ម្ចាស់ហាងភ្នំពេញ ស្ពតក្លឹប បានឲ្យដឹងថា ឡនោះឆេះ មិនមែនមកពីឆ្លងចរន្តអគ្គិសនីទេ គឺបណ្តាល មកពីបុគ្គលិក មិនបានប្រុងប្រយ័ត្ន បិតភ្លើង ពីឡធ្យូងនោះ នៅពេលចប់ម៉ោងការងារ។ ជាពិសេស នៅជុំវិញឡនោះ សុទ្ធតែជាធ្យូងស្ងួត រីឯឡក៏មានកំដៅខ្លាំងនៅជាប់គ្នា ក៏បណ្តាលឲ្យក្លាយ ទៅជារងើកភ្លើង​យ៉ាងឆាប់រហ័ស នៅពេលមានខ្យល់តិចៗ ពេលយប់។ ម្ចាស់ហាងបន្តថា ហេតុនេះហើយ បានជាធ្វើឲ្យរោងឡ ដែលផ្តល់ភ្លើង ទៅបន្ទប់ស្ទិមក្នុងក្លឹប មានបញ្ហាឆេះឡើង ទាំងកណ្តាលយប់។

លោកថា គ្មានបុគ្គលិកណាម្នាក់ មានរបួសនោះទេ ហើយក៏មិនមានប៉ះពាល់ ដល់អ្នកជិតខាង ឬដល់ខាងក្នុង​ក្លឹប​នោះដែរ ដោយសារឡនោះនៅខាងក្រៅ។ ម្យ៉ាងទៀត នៅពេលយប់ គ្មានអ្នកណាចេញមកខាងក្រៅឡើយ បានជាមិនបានចាប់អារម្មណ៍ ពីរឿងទាំងអស់នេះ រហូតដល់មានផ្សែងចេញ ទើបមានការភ្ញាក់ផ្អើល។ អគ្គីភ័យ​នេះ បានចាប់ផ្តើមពី១២ និង៣០នាទីយប់ ថ្ងៃទី០៤ ខែមិថុនា ឆ្នាំ២០១៥ នៅក្នុងសង្កាត់ទួលទំពូង២ ខណ្ឌ​ចំការ​មន រាជធានីភ្នំពេញ ក្នុងនោះបានប្រើ រថយន្ដពន្លត់អគ្គីភ័យមួយគ្រឿង យកមកពន្លត់បានរលត់ជាស្ថាពរ នៅ​បន្ទាប់​ពីភ្លើង បានឆេះប្រមាណជា៣០នាទី។

ហេតុការណ៍ ដែលបណ្តាលមក ពីការធ្វេសប្រហែសនេះ បានកំទេចយកបន្ទប់ ឡ ដុតធ្យូងខាងលើ ដែលឆេះ​ផ្នែកខាងក្នុងទាំងអស់ ស្ទើរគ្មានសល់ និងធ្យូងដែលនៅគរខាងក្រៅ មួយចំនួនទៀត ដែលត្រៀមទុក សម្រាប់​ដុត​នៅពេលក្រោយ។ មន្ត្រីសមត្ថកិច្ច ដែលបានចុះអន្តរាគមន៍នៅទីនោះ បានបញ្ជាក់ថា អគ្គិភ័យនេះ មិនមែន​បណ្តាល មកពីទុស្សេខ្សែរភ្លើងនោះទេ៕