ទីតាំង ដែលក្រុមនគរបាល បានស៊ើបដឹងថា មានអ្នករកស៊ីផ្លូវភេទ បង្កប់នៅបំរើសេវា នៅក្នុងហាងកាហ្វេនោះ នៅផ្ទះលេខ ៥៦ ក្រុមទី០១ ផ្លូវ ២៧៣ ភូមិទួលគោក សង្កាត់ទួលសង្កែរ ខណ្ឌឬស្សីកែវ រាជធានីភ្នំពេញ។ ករណីនេះ សមត្ថកិច្ចបានធ្វើការឃាត់ខ្លូន បានស្រ្តីម្ចាស់ហាងម្នាក់ ឈ្មោះ សុខ ស្រីលក្ខ។ បើតាមភ្នាក់ងារ​នគរបាល បានបញ្ជាក់ថា ស្ត្រីម្ចាស់ហាងនេះ ជាជនជាតិវៀតណាម ដែលរស់នៅក្នុងទីតាំងខាងលើ។

ក្នុងនោះដែរ លោក ហេង សុវណ្ណរ៉ា នាយរងប៉ុស្តិ៍នគរបាលទួលសង្កែរ ទទួលបន្ទុកផ្នែកព្រហ្មទណ្ឌ បានថ្លែង​ប្រាប់ទស្សនាវដ្តីមនោរម្យ.អាំងហ្វូថា លោកបានសហការ ជាមួយកងកម្លាំងប្រឆាំងការជួញដូរ រាជធានីភ្នំពេញ ដែលដឹកនាំដោយព្រះរាអាជ្ញារង គឺ ប៊ុណ្ណារ៉ា អមដោយក្រឡាបញ្ជីលោក ឱក លឹមច័ន្ទលីណា ដែលបានចុះទៅ​ដល់ទីតាំងផ្ទាល់ នៅតាមបណ្តោយផ្លូវ ២៧៣ កាលពីម៉ោង២ រសៀលថ្ងៃទី១៦ ខែមិថុនា ឆ្នាំ២០១៥ ហើយបាន​សម្រេចឃាត់ខ្លូន និងបញ្ជប់នៅម៉ោង៣ រសៀលថ្ងៃដដែល។

លោកបន្តថា វត្ថុតាងដែលក្រុមនគរបាល បានរកឃើញ នៅក្នុងហាងកាហ្វេនោះ មានស្រោមអនាម័យ ទាំង​ប្រើ​ប្រាស់រួច និងមិនទាន់ប្រើប្រាស់មួយចំនូន និង ស្រ្តីបម្រើផ្លូវភេទពីរនាក់ ជាជនជាត់វៀតណាម (មិនចេះនិយាយ​ខ្មែរ) និងសៀវភៅកត់ត្រា អ្នកទទួលសេវាផ្លូវភេទ ៥ក្បាលទៀត។ លោកបញ្ជាក់ថា បច្ចុប្បន្ន អ្នកប្រព្រឹត្តទាំងបី​រូប​នោះ ត្រូវបានបញ្ជូនទៅការិយាល័យជួញដូរមនុស្ស និងអនីតិជនរាជធានីភ្នំពេញ៕