ជនរងគ្រោះ ដែលបានស្លាប់ នៅក្នុងហេតុការណ៍នេះ ឈ្មោះ នូជា ពន្លឺ អាយុជាង៣០ឆ្នាំ មិនទាន់មានគ្រួសារទេ សព្វថ្ងៃជាបុគ្គលិក នៅអគ្គិសនីកម្ពុជា។ ចំនែកឯបុរសម្នាក់ ដែលឡើងទៅជួយមិត្តរួមអាជីព ហើយត្រូវឆក់ខ្លួន​ឯងដែរនោះ ឈ្មោះ រឹម សុវណ្ណារ៉ា ជាអ្នកធ្វើការជាមួយគ្នា នៅក្នុងគោលដៅ តាមបណ្តោយផ្លូវជាតិលេខ៦ ក្នុង​សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ។

ប្រធានក្រុមការងារ ដែលធ្វើការតបណ្ដាញ នៅតំបន់នោះ លោក ហៀង ស័ក្កសិទ្ធ បានប្រាប់ទស្សនាវដ្តី​មនោរម្យ.អាំងហ្វូ ឲ្យដឹងថា ដំបូងជនរងគ្រោះ មិនទាន់មានគ្រោះថ្នាក់ដល់ជីវិតទេ ព្រោះអ្នកឡើងទៅជួយនោះ បានសង្គ្រោះមកដល់ដីហើយ តែពេលប៉ុន្មាននាទីក្រោយមក គាត់បានស្លាប់ ពេលបញ្ជូនទៅ មិនទាន់ដល់​មន្ទីរពេទ្យផង។ លោកបានបន្តថា អ្នកដែលឡើងទៅជួយជនរងគ្រោះ ក៏មានគ្រោះថ្នាក់ដែរ តែគ្រាន់តែសន្លប់ មិនបាត់បង់ជីវិតទេ នៅក្នុងនោះ ក្រុមរបស់លោក មានគ្នា០៤នាក់ ទាំងរូបលោកផ្ទាល់។ បច្ចុប្បន្នអ្នករងគ្រោះ កំពុងសម្រាក នៅមន្ទីពេទ្យឯកជនមួយ ឈ្មោះ សម្ភពជោគជ័យ។

ចំនែកឯសាកសពជនរងគ្រោះ ត្រូវបានបញ្ជូនបន្ត ទៅវត្តទួលសង្កែរ ដើម្បីរង់ចាំក្រុមគ្រួសារ មកទទួលយក ទៅ​ធ្វើបុណ្យតាមប្រពៃណី។ សាច់ញាតិសពម្នាក់បានឲ្យដឹងថា ជនរងគ្រោះសព្វថ្ងៃ ស្នាក់នៅភូមិផ្សារតូច សង្កាត់​ទួលសង្កែរ ខណ្ឌឬស្សីកែវ រាជធានីភ្នំពេញ។ យ៉ាងណាក៏ដោយ សាច់ញាតិរូបនេះ មិនបានបញ្ជាក់ថា ខាង​អគ្គិសនី​កម្ពុជា នឹងផ្តល់ជាជំនួយ ប៉ុន្មានទៅកាន់បុគ្គលិក ដែលជាជនរងគ្រោះ ដល់ជីវិតនៅពេលធ្វើការ​នោះ​ទេ។ បុរសជាសាត់ញាតិ បានបញ្ជាក់ថា លោកកំពុងតែទៅទទួលសព នៅវត្តទទួលសង្កែរ៕