មកទល់ពេលនេះ នៅមិនទាន់មានឃើញ មានសកម្មភាព ឬការឆ្លើយតបណាមួយ ពីរដ្ឋាភិបាលកម្ពុជា ក៏ដូចជា​ប្រទេសវៀតណាម ក្នុងការ«លុបស្រះ» ឬការ«សាងសង់ប៉ុស្តិ៍យោធា» ដែលបានធ្វើក្នុងទឹកដីកម្ពុជា នៅខេត្ត​រតនគិរីនៅឡើយ។ នេះជាការអះអាង របស់លោក ឆាយ ធី មន្ត្រីឃ្លាំមើលឯករាជ្យ និងជាមន្រ្តីសមាគម​ការពារ​សិទ្ធិមនុស្ស អាដហុក ប្រចាំខេត្តរតនគីរី ទាក់ទងនឹងការជីកស្រះ មកក្នុងតំបន់វិវាតព្រំដែន ដ៏ចម្រូងចម្រាស។

ការថ្លែងរបស់មន្ត្រីខាងលើ បានធ្វើឡើងនៅរសៀល ថ្ងៃទី ២៣ ខែមិថុនានេះ ក្រោយការទន្ទឹងជាច្រើនថ្ងៃ នូវ​ការ​ឆ្លើយតប​ពីសំណាក់ភាគីវៀតណាម ទៅលើកំណត់ទូតចំនួនពីរ របស់កម្ពុជាតាមរយៈ ក្រសួងការបរទេស​របស់​ខ្លួន ដែល​បានធ្វើការតវ៉ា ទៅកាន់ប្រទេសវៀតណាម ទាក់ទងនឹងការជីកស្រះ និងការចាក់គ្រឹះសាងសង់​ប៉ុស្ដ៍​យោធា ក្នុង​តំបន់ព្រំដែនខេត្តរតនគីរី។ លោក ឆាយ ធី បានអះអាងទៀតថា មិនត្រឹមតែនៅព្រំដែន ជាប់ខេត្ត​រតនគីរី​​ប៉ុណ្ណោះ​ទេ តែនៅមានខេត្តកណ្ដាលមួយទៀត ក៏រដ្ឋាភិបាលវៀតណាមកំពុងជីកដី ដើម្បីចាក់គ្រឹះ​សាង​សង់​ប៉ុស្តិ៍​យោធា​មួយ នៅនិយាម WT-06065-07703 ជិតភូមិព្រែកស្បូវ ឃុំសំពៅពូន ស្រុកកោះធំ​នោះ​ដែរ។

កាលពីថ្ងៃទី១២ និងថ្ងៃទី១៤ ខែមិថុនា ឆ្នាំ២០១៥ រដ្ឋាភិបាលកម្ពុជា តាមរយៈក្រសួងការបរទេស បានផ្ញើរ​កំណត់​ទូតចំនួនពីរ ទៅកាន់ប្រទេសវៀតណាម ដោយស្នើសុំអោយភាគីវៀតណាម បញ្ឈប់សកម្មភាព​ជីក​ស្រះ​ទឹក និងជីកដីគ្រឹះសង់ប៉ុស្តិ៍យោធា ចូលមកក្នុងទឹកដីកម្ពុជា មានចម្ងាយចន្លោះ ពី៣១៥ម ទៅ ៥៤៥ម ពីខ្សែ​ព្រំដែន​រវាងប្រទេសទាំងពីរ។ ប៉ុន្តែនៅប៉ុន្មានថ្ងៃក្រោយមកទៀត គឺនៅថ្ងៃទី១៧ ខែមិថុនា ក្រសួងការ​បរទេស​ដដែល បានចេញកំណត់ទូតមួយទៀត ដើម្បីតវ៉ាបញ្ហាព្រំដែន នៅក្នុងស្រុកកោះធំខេត្តកណ្ដាលនេះ។ កំណត់​ទូតថ្មីនោះ ក៏បានស្នើសុំឲ្យប្រទេសវៀតណាម បញ្ឈប់ជាបន្ទាន់ នូវសកម្មទាំងនេះ រហូតដល់មាន ការបោះ​បង្គោល​ហើយជាស្ថាពរដែរ។

អ្វីដែលជាការកត់សំគាល់ នៅក្នុងកំណត់ទូតចុះថ្ងៃទី១៧ ខែមិថុនានោះ មានឃ្លាមួយបានសរសេរថា៖ «នៅក្នុង​កំណត់​ទូតរបស់ក្រសួង លេខ១៣១៨ កបទ.សអ/កស៊៤ ចុះថ្ងៃទី០៨ មិថុនា ២០១៥ រាជរដ្ឋាភិបាលកម្ពុជា បាន​ស្នើ​សុំឲ្យរដ្ឋាភិបាល នៃសាធារណរដ្ឋសង្គមនិយមវៀតណាម បញ្ឈប់ការជីកដីធ្វើគ្រឹះ សម្រាប់ការសាង​សង់​​ប៉ុស្ដ៍​យោធា នៅត្រង់ចំណុចនិយាមការ WT-06065-07703 (...)»។ ឃ្លានេះ ដូចជាបានបង្ហាញអះអាង ពីអ្វីដែល​រដ្ឋាភិបាលកម្ពុជា បានទម្លាយនៅក្នុងលិខិតមួយ ផ្ញើរទៅប្រធានរដ្ឋសភាលោក ហេង សំរិន ថាក្រសួង​ការបរទេស ធ្លាប់បានផ្ញើរកំណត់ទូត ចំនួន៨ រួចហើយ ទៅកាន់ប្រទេសវៀតណាម មុនកំណត់ទូតចុះថ្ងៃទី១២ និងទី១៤ ខែមិថុនា ឆ្នាំ២០១៥។

លិខិតផ្ញើរទៅប្រធានរដ្ឋសភា ដែលមានចុះហត្ថលេខារបស់លោក ហោ ណាំហុង ក្នុងថ្ងៃទី១៦ ខែមិថុនា បាន​សរសេរថា៖ «សូមគោរពជូនសម្តេច មហាពញាចក្រី នូវច្បាប់ថតចម្លង នូវកំណត់ទូតថ្មីៗនេះ របស់ក្រសួង​ការបរទេស សហប្រតិបត្តិការអន្តរជាតិ និងស្ថានទូតកម្ពុជា ប្រចាំទីក្រុងហាណូយ អំពីការរំលោភបំពាន លើ​ទឹកដី​កម្ពុជា នៅតំបន់ផ្សេងៗ (…) ចាប់ពីឆ្នាំ២០១៣ ដល់២០១៥ ចំនួនប្រាំបីច្បាប់ ក្រៅពីកំណត់ទូតថ្ងៃទី១២ និង១៤ ខែមិថុនា ឆ្នាំ២០១៥»។

បើយោងតាមកំណត់ទូតទាំងបីចុងក្រោយ ដែលផ្សាយជាសាធារណៈនេះ និងលិខិតលោក ហោ ណាំហុង ផ្ញើរ​ទៅលោក ហេង សំរិន ខាងលើនេះ ធ្វើឲ្យគេយល់ថា នៅក្នុងខែមិថុនានេះ ប្រទេសកម្ពុជា បានផ្ញើកំណត់ទូត​តវ៉ា ទៅកាន់ប្រទេសវៀតណាម ចំនួន៤ច្បាប់។

សំនួរនៅពេលនេះសួរថា តើនៅក្នុងចំណោមកំណត់ទូតទាំងអស់ របស់កម្ពុជា ផ្ញើរទៅប្រទេសវៀតណាម មាន​កំណតទូតណាខ្លះ ដែលត្រូវបានប្រទេសវៀតណាមខ្វាយខ្វល់? ហើយថា តើប្រទេសវៀតណាម ត្រូវ​ពេល​វេលា​ប៉ុន្មាន ដើម្បីឆ្លើយតប និងធ្វើប្រតិកម្ម មកប្រទេសកម្ពុជាវិញ? មកទល់ពេលនេះ ទស្សនាវដ្តីនៅមិន​អាចសុំ​ការ​បក​ស្រាយ ពីអ្នកនាំពាក្យក្រសួងការបរទេសកម្ពុជា លោក ជុំ សន្ទរី និងពីមន្ត្រីស្ថានទូតវៀតណាម ប្រចាំ​នៅ​កម្ពុជា​​បាន​នៅឡើយ៕

» សូមបង្ហាញជូន នូវកំណត់ទូតថ្មីៗចំនួនបី ដូចខាងក្រោម (ចុចដើម្បីពង្រីកអាន)៖