វីដេអូនេះបានបង្កការអស់សំណើច ដល់ទស្សនិកជនគ្រប់ៗគ្នា ដែលបានទស្សនា។ តាមគម្រោង យន្ដហោះ​កំសាន្ដនេះ ត្រូវបានអនុញ្ញាត ឲ្យមានអ្នកដំណើរតែម្នាក់ទេ បន្ថែមពីលើអ្នកបើកបរម្នាក់ ដែលចាំបាច់ត្រូវបញ្ជា​យន្ដហោះនេះ។ ប៉ុន្តែនៅពេលយន្ដហោះ បានហោះឡើងទៅដល់ក្នុងលំហអាកាស ស្រាប់តែអ្នកដំណើរ​ម្នាក់​ទៀត បានបង្ហាញខ្លួនមកដែរ ទោះខ្លួនគ្មាន«សំបុត្រ» សម្រាប់ជើងហោះហើរនេះក៏ដោយ។

ដាក់បង្ហោះកាលពីថ្ងៃអាទិត្យនេះ ដោយសមាជិកម្នាក់ នៃក្លិប «ULM 16-34» ដែលធ្វើអាជីវកម្ម ជាមួយ​យន្ដហោះ​​កំសាន្ដ នៅក្រុង គូរូ (Kourou) ក្នុងដែនដី ហ្គីយ៉ាន (Guyane ទឹកដីបារាំងនៅទ្វីបអាមេរិកខាង​ត្បូង) វីដេអូ​នេះ បានទទួលការចុចចូលមកទស្សនា ប្រមាណជាង១៣លានដងហើយ។ បន្ទាប់ពីបានឃើញ​អតិថិជន ដែល​មិន​មានសំបុត្រ ជិះដោយខុសច្បាប់ នៅក្នុងយន្ដហោះដូច្នេះ អ្នកបើកបរចាំបាច់ ត្រូវបង្ហោះយន្ដហោះ ឲ្យ​ចុះ​មក​ចត​​វិញ ដើម្បី​យកអតិថិជនមួយក្បាលនេះ ឲ្យត្រឡប់មកនៅលើដី។

ប្រធានក្លិប «ULM» លោក ប៊ែរណា ប៉ៃរេប៍ (Bernard Birebent) បានថ្លែងប្រាប់សារព័ត៌មាន​បារាំង​មួយ​ថា៖ «សត្វ​ឆ្មារនេះ បានមករស់នៅក្នុងក្លិប តាំងពីច្រើនឆ្នាំមកហើយ។ វាតែងតែមកដេក នៅលើស្លាប​យន្ដហោះ​ដូច្នេះ។»៕