បើតាមលទ្ធផលនៃការស៊ើបអង្កេត ភ្លាមៗដំបូង ដែលបានធ្វើនៅនឹងកន្លែង បានឲ្យដឹងថា ជនសង្ស័យម្នាក់ ឬ​ច្រើននាក់ ដែលស្ថិតនៅក្នុងរថយន្ដមួយ បានបើកបុកចូល ទៅក្នុងរោងចក្រ។ ប្រភពមួយទៀត បាន​រាយ​ការណ៍​ដែរថា ការផ្ទុះមួយដ៏ខ្លាំង បានកើតឡើង នៅពេលនោះ។

ប្រភពបានការនោះ បានឲ្យដឹងទៀតថា សាកសពមនុស្សម្នាក់ ត្រូវបានរកឃើញស្លាប់ ដោយដាច់ក នៅ​ក្បែរ​នឹងរោងចក្រ។ ប៉ុន្តែគេមិនដឹងច្បាស់ថា តើសាកសពនេះ ត្រូវបានសម្លាប់នៅនឹងកន្លែង ឬត្រូវបានដឹកពី​ទីណា​មួយ ហើយយកមកទម្លាក់ចោលនៅទីនេះទេ។ ទង់របស់ក្រុមអង្គការ រដ្ឋអ៊ីស្លាមមួយ ក៏ត្រូវបានរកឃើញ នៅ​នឹងកន្លែងនោះដែរ។

បើតាមប្រភពមួយទៀត បានឲ្យដឹងថា ជនសង្ស័យម្នាក់ ក្នុងចំណោមជនសង្ស័យដទៃទៀត បានចូលទៅក្នុង​រោងចក្រ «Air Products» ដោយមានទង់ របស់អង្គការរដ្ឋអ៊ីស្លាម នៅនឹងដៃ ហើយបានបានបំផ្ទុះធុងហ្គាស ជាច្រើន។ បើ​តាមប្រភពទាំងនេះ បានអះអាងថា ការវាយប្រហារទៅលើរោងចក្រ បានកើតឡើង នៅ​វេលា​ម៉ោង ១០ព្រឹក ម៉ោងក្នុងប្រទេសបារាំង (ប្រមាណជាម៉ោង៣រសៀល ម៉ោងនៅប្រទេសកម្ពុជា)។

រដ្ឋមន្ត្រីមហាផ្ទៃរបស់បារាំង លោក ប៊ែរណា កាស្ន័វ (Bernard Cazeneuve) ដែលបានចុះទៅតំបន់ក្បែរ​ខាង​នោះ កាលពីព្រឹកថ្ងៃសុក្រនេះ នឹងត្រូវបានចុះមកផ្ទាល់កន្លែង ដើម្បីពិនិត្យស្ថានការណ៍។ មុននេះបន្តិច ប្រធានាធិបតី​បារាំង លោក ហ្វ្រង់ស័រ ហូឡង់ ក៏បានថ្លែង នៅក្នុងសុន្ទរកថាដោយខ្លីមួយ ពីរាជធានី ប្រ៊ុយស៊ែល ប្រទេស​ប៊ែលហ្សិក ថា៖ «ការវាយប្រហារនេះ មានសភាពជាភេវរកម្ម»។ លោកប្រធានាធិបតី បានអះអាងទៅ​ពលរដ្ឋ​បារាំង​ថា គ្រប់វិធានការចាំបាច់ជាច្រើន ត្រូវបានដាក់ឲ្យប្រើប្រាស់ភ្លាមៗ ដើម្បីបញ្ជៀសនូវ​ហេតុការណ៍​អាក្រក់​ផ្សេងទៀត។ ក្រុមប្រឹក្សាការពារជាតិ ក៏នឹងត្រូវកោះប្រជុំជាបន្ទាន់ នៅរសៀលម៉ោង ១៥ និង៣០នាទី នេះ​ដែរ នាវិមានប្រធានាធិបតី។

បើតាមលោកប្រធានាធិបតី បានថ្លែងថា ជនសង្ស័យម្នាក់ត្រូវបានចាប់ខ្លួន និងកំណត់បានពីអត្តសញ្ញាណ។ លោក ហូឡង់ បានប្រកាសទៀតថា ការវាយប្រហារនេះ បានបង្កឲ្យមានមនុស្សម្នាក់ស្លាប់ និង​ពីរនាក់​ទៀត​រង​របួស៕

» វីដេអូបង្ហាញពីខាងក្រៅរោងចក្រ បន្ទាប់ពីកើតហេតុ៖