អាយុ១៦ឆ្នាំ កាត់បេះដូងរៀបការនឹងម្ចាស់ស្នេហ៍ជិតស្លាប់
- ដោយ: ឈូករ័ត្ន អត្ថបទ៖ ឈូករ័ត្ន ([email protected]) - បារីស ថ្ងៃទី២៨ មិថុនា ២០១៥
- កែប្រែចុងក្រោយ: June 28, 2015
- ប្រធានបទ: ស្នេហាអមតៈ
- អត្ថបទ: មានបញ្ហា?
- មតិ-យោបល់
-
រំភើបក៏រំភើប... តែបើសោកស្ដាយវិញ ក៏សោកសៅណាស់ដែរ។ នៅខណៈពេលដែលដឹងថា សង្សាបណ្ដូលចិត្ត នៅសល់តែប៉ុន្មានថ្ងៃទៀត នឹងធ្វើមរណៈភាពនោះ នាង អេមី ក្រេស្វែល ដែលមានអាយុទើបនឹង១៦ឆ្នាំ (*) បានយល់ព្រម បំពេញបំណងចុងក្រោយ របស់យុវជនកំពូលស្នេហ៍ ដោយបានរៀបការ យកគ្នាជាប្ដីប្រពន្ធ នៅក្នុងមន្ទីរពេទ្យ។ នេះជាសេចក្ដីរាយការណ៍ របស់សាព័ត៌មានអង់គ្លេស «Metro UK» ចេញផ្សាយក្នុងសប្ដាហ៍កន្លងមក។
ធ្លាក់ខ្លួនមានជំងឺមហារីកឈាម (ឈាមសស៊ីឈាមក្រហម) បន្ទាប់ពីបានរងគ្រោះសន្លប់ នៅក្នុងការប្រកួតកីឡាបាល់ទាត់មួយ កាលពីឆ្នាំទៅម៉ិញ យុវជន អូម៉ា អាល់សាអ៊ីខ (Omar Al Shaikh) នៅមានក្ដីសុបិន្ដ តែមួយគត់របស់នាយ នោះគឺបានរៀបការជាមួយនារី ដែលខ្លួនស្រឡាញ់ តាំងពីបានឃើញនាងដំបូង នៅសាលារៀន។ កាលពីខែវិច្ឆិកាកន្លងទៅ ជំងឺរបស់យុវជន អូម៉ា មិនមានអាការៈរើមកវិញទេ ដែលជាឱកាសឲ្យពួកគេទាំងពីរ កាន់តែស្គាល់ចិត្តថ្លើមគ្នា ហើយឪពុកម្ដាយទាំងសងខាង ក៏បានទទួលដឹងឮដែរ។
ប៉ុន្តែអាការៈជំងឺ ដែលមិនរើមកវិញនេះ បានកើតមានសម្រាប់ឲ្យយុវជន បានសប្បាយចិត្តតែមួយរយៈពេលខ្លីប៉ុណ្ណោះ។ ស្ថានភាពសុខភាពរបស់យុវជន បានធ្លាក់ចុះ ឈឺធ្ងន់ជាថ្មីម្ដងទៀត។ ដំណឹងនេះ បាន«សម្លាប់ដួងចិត្ត»យុវតី អេមី។ ជាមួយនឹងបេះដូង ដែលធ្លាក់បែកខ្ចេចខ្ទាំ យុវតីជំទង់បានថ្លែងឡើងថា៖ «ខ្ញុំធ្លាក់ថ្លើមរន្ធត់ណាស់។ ខ្ញុំបានយល់ភ្លាម នៅពេលនោះ ថាខ្ញុំចង់នៅជិតគាត់ សម្រាប់ជីវិតដ៏ជូរចត់នេះ។» ប៉ុន្តែទោះជាមានកម្លាំងចិត្ត ពីនារីម្ចាស់ស្នេហ៍យ៉ាងណាក៏ដោយ ក៏មិនអាចមានអ្វី អាចមកហាមឃាត់ ជំងឺ«មហារីក»ដ៏ខ្លាំងក្លាបានឡើយ។
នៅដើមខែមិថុនានេះ ដំណឹងពីគ្រូពេទ្យ បានចូលមក ផ្ដាច់ព្រលឹងអ្នកទាំងពីរបន្ថែមទៀតថា យុវជន អូម៉ា នៅមានជីវិត តែប៉ុន្មានថ្ងៃទៀតប៉ុណ្ណោះ។
«កាត់បេះដូងជូនបង»
ដើម្បីសម្រេច នូវបំណងចុងក្រោយ យុវជន អូម៉ា បានសុំ អេមី រៀបការទទួលយុវជន ជាស្វាមីពេញច្បាប់។ ជាសំណើរ ដែលនាង អេមី បាន«កាត់បេះដូង»ទទួលយក យ៉ាងពេញចិត្ត។ ជាមួយនឹងការយល់ព្រម ពីឪពុកម្ដាយទាំងសងខាងផង អ្នកទាំងពីរ បានរៀបអាពាហ៍ពិពាហ៍ នៅក្នុងមន្ទីរពេទ្យ ដោយយុវជន អូម៉ា បានបំពាក់ជញ្ជៀនឲ្យនាង អេមី ដើម្បីក្លាយជាស្វាមីភរិយ នៅចំពោះការលួចបង្ហូរទឹកភ្នែក របស់មនុស្សញាតិមិត្តច្រើននាក់។
នៅបីថ្ងៃក្រោយអាពាហ៍ពិពាហ៍នោះ យុវជន អូម៉ា អាលសាអ៊ីខ បានចុះចាញ់ជំងឺមហារីកជាស្ថាពរ ដោយបានទទួលមរណៈភាព នៅក្នុងរង្វង់ទ្រូងភរិយាថ្មីថ្មោង របស់នាយ។
ភរិយាមេមាយទាំងវ័យជំទង់ បានថ្លែងរៀបរាប់ថា៖ «ខ្ញុំបានកាត់បេះដូងជូនគាត់ តាំងពីយូរហើយ។ យើងធ្លាប់បាននិយាយគ្នា ថានឹងរៀបការជាមួយគ្នា មិនថាខ្ញុំឬគាត់ ទើបនឹងមានអាយុ១៦ឆ្នាំនោះឡើយ។ មិនត្រឹមតែប៉ុណ្ណឹង យើងបានគិតស្រឡាញ់គ្នា រហូតដល់ចាស់ ហើយស្លាប់ជាមួយគ្នានោះទៀត។» ប៉ុន្តែយ៉ាងហោចណាស់ អេមី បានបន្សល់ទុកក្នុងជីវិត ដែលនៅសេសសល់របស់នាង នូវអនុស្សាវរីយ៍ដ៏ផ្អែមល្អែមជាច្រើន ជាមួយបុរសកំពូលស្នេហ៍ ជាពិសេសគឺអាពាហ៍ពិពាហ៍នេះតែម្ដង៕
(*) នៅអ៊ឺរ៉ុប អាយុ១៦ឆ្នាំ នៅជាអាយុស្ថិតក្រោម ការគ្រប់គ្រង របស់ឪពុកម្ដាយនៅឡើយ។ អាយុនេះ មិនមានការទទួលខុសត្រូវ នៅចំពោះមុខច្បាប់នោះទេ។ ហើយការរៀបការនៅមុនអាយុ១៨ឆ្នាំ ជារឿងមួយកម្រណាស់។