ការិយាល័យព័ត៌មាន នៃស្ថានីយ៍ទូរទស្សន៍ស៊ីអិនស៊ី (CNC) បានបង្ហាញការសោកស្តាយ ដោយមិនបាន​ទទួលការឆ្លើយបំភ្លឺតប ពីសំណាក់អគ្គនាយកដ្ឋានពន្ធដារ នៃក្រសួងសេដ្ឋកិច្ចនិងហិរញ្ញវត្ថុ ក្រៅតែពីលិខិត ដែល​សរសេររិះគន់ទៅវិញ។ ក្នុងលិខិតចុះថ្ងៃទី២៦ ខែមិថុនា របស់ស្ថានីយ៍ទូរទស្សន៍ស៊ីអិនស៊ី (CNC)នេះ បានបញ្ជាក់ឆ្លើយតប ទៅនឹងការរិះគន់ របស់អគ្គនាយកដ្ឋានពន្ធដារ តាមរយៈសេចក្តីប្រកាសព័ត៌មានមួយ ចុះថ្ងៃទី២៦ ខែមិថុនា ឆ្នាំ២០១៥ដដែល ដែលបានលើកឡើងថា ទូរទស្សន៍ស៊ីអិនស៊ី ផ្សាយព័ត៌មាន​បំផ្លើស​ខុសពីការពិត ដោយគ្មានមូលដ្ឋានច្បាស់លាស់ និងត្រឹមត្រូវ។

សូមរំលឹកថាកាលពីថ្ងៃទី២៥ ខែមិថុនា ឆ្នាំ២០១៥ ស្ថានីយ៍ទូរទស្សន៍ស៊ីអិនស៊ី បានចាក់ផ្សាយ និង​បង្ហាញ​នូវ​ការបែកធ្លាយ នៃអំពើពុករលួយជាប្រព័ន្ធ នៅក្នុងអគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ រួម​ទាំងបានផ្សាយ នូវអង្គការលេខ ដែលមានរូបថតភ្ជាប់ផង។

តបនឹងការចាក់ផ្សាយនោះ អគ្គនាយកដ្ឋានពន្ធដារ នៃក្រសួងសេដ្ឋកិច្ចនិងហិរញ្ញវត្ថុ បានធ្វើការបដិសេធ​ទាំងស្រុង ដោយហៅព័ត៌មាននេះ ថាមានការភូតភរ កុហក និងនិយាយលើស ពីការពិតជាដើម។ តាម​សេចក្តីប្រកាសព័ត៌មានមួយ ដែលចេញផ្សាយ ដោយស្ថាប័នប្រមូលចំណូលដ៏ធំ របស់រដ្ឋមួយនេះ បាន​សរសេរថា  អគ្គនាយកដ្ឋានពន្ធដារ បានធ្វើការចោទប្រកាន់ ទៅលើស្ថានីទូរទស្សន៍នេះថា មានចេតនា បង្កាច់ និងបង្ខូចកិត្តិយស ដល់អគ្គនាយកដ្ឋានពន្ធដារ នៃក្រសួងសេដ្ឋកិច្ចនិងហិរញ្ញវត្ថុ ដោយយោងត្រឹម​តែ​អង្គការ​លេខ មានរូបថតមួយ (ច្បាប់) ដែលអតីតបុគ្គលិក (មន្ត្រីអគ្គនាយកដ្ឋានពន្ធដារឆ្នាំ២០១៣ ) «វិកលចរិត» ម្នាក់​បានរៀបចំឡើងប៉ុណ្ណោះ។

តបនឹងការលើកឡើងនេះ ការិយាល័យព័ត៌មាន នៃស្ថានីយ៍ទូរទស្សន៍ស៊ីអិនស៊ី បានសរសេរក្នុងចំណុច​ចុង​ក្រោយ លើសេចក្តីបំភ្លឺរបស់ខ្លួន ចុះថ្ងៃទី២៦ ខែមិថុនាថា «នៅចំណុច ដែលអគ្គនាយកពន្ធដារលើកឡើង​ថា បុគ្គលិកដែលផ្តល់ព័ត៌មានមកឲ្យ ទូរទស្សន៍ CNC មានរោគវិកលចរិតនោះ គឺ ទូរទស្សន៍ CNC គ្មាន​ឯកទេស​ត្រួតពិនិត្យ លើរោគវិកលចរិក (បុគ្គលិកដែលផ្តល់ព័ត៌មាន) មុនពេលចុះផ្សាយនោះទេ ហើយជាទម្លាប់​និង​សីលធម៌ ទូរទស្សន៍ CNC មិនដែលសួរប្រភពព័ត៌មានរបស់ខ្លួនថា មានរោគវិកលចរិតយ៉ាងណានោះ​ឡើយ។»

ទស្សនាវដ្តីមនោរម្យ.អាំងហ្វូមិនអាចស្វែងរក ការបញ្ជាក់បន្ថែម ពីអគ្គនាយកដ្ឋានពន្ធដារ និងអ្នកគ្រប់​គ្រង​ការិយាល័យព័ត៌មាន នៃស្ថានីយ៍ទូរទស្សន៍ស៊ីអិនស៊ី(CNC) បានទេ ក្នុងថ្ងៃសៅរ៍ ទី២៧ ខែមិថុនានេះ។

សូមអានខ្លឹមសារលំអិតទាំងស្រុង នៃការថ្លៃងសរដាក់គ្នា រវាងការិយាល័យព័ត៌មាន នៃស្ថានីយ៍​ទូរទស្សន៍​ស៊ីអិនស៊ី និងអគ្គនាយកដ្ឋានពន្ធដារ នៃក្រសួងសេដ្ឋកិច្ចនិងហិរញ្ញវត្ថុ ដូចខាងក្រោម៖

---------------------------------------