ការត្រួតពិនិត្យចរាចរណ៍ ដែលមានលក្ខណៈធម្មតាមួយ បានប្រើក្លាយជាការរកឃើញ ដ៏គួរឲ្យតក់ស្លុត កាល​ពី​ដើមខែមិថុនាកន្លងមក នៅក្នុងរដ្ឋវៀជីនី សហរដ្ឋអាមេរិក។ បន្ទាប់ពីបានឃើញ រថយន្ដធុន «Ford Mustang» ដែលការធានារ៉ាប់រង បានហួសកាលកំណត់ទៅហើយនោះ ភ្នាក់ងារនគរបាលចរាចរណ៍មួយរូប បានហៅ​ស្ត្រី​អ្នកបើកបរ អ្នកស្រី តុុនយ៉ា ស្លាតុន (Tonya Slaton) ឲ្យឈប់ ដើម្បីធ្វើការត្រួតពិនិត្យ។

ប៉ុន្តែ... នៅពេលដែលនគរបាល បានស្នើសុំឲ្យអ្នកស្រី បើកឃ្លុបរថយន្ដខាងក្រោយឡើង ដើម្បីកត់​កំណត់​ហេតុ​នោះ ស្រាប់តែរបកគំហើញមួយ បានបង្ហាញឡើង៖ នៅខាងក្នុងឃ្លុប នគរបាលបានឃើញ សាកសពដែល​នៅ​សល់តែឆ្អឹង របស់កូនប្រុសរបស់អ្នកស្រី តុនយ៉ាង ដាក់ខ្ចប់នៅក្នុងស្បោងផ្លាស្ទីក។

ហេតុការណ៍ដែលឈាន ទៅដល់ការរុករក ឃើញសាកសពនេះ ដោយសារតែក្លិនបានហោះចេញមក ធ្វើឲ្យ​ច្រមុះរបស់ភ្នាក់ងារនគរបាល នៅមិនស្រួល។ នេះបើតាមសេចក្ដីរាយការណ៍ របស់សារព័ត៌មានចម្រុះភាសា «Huffington Post»។ សាកសពរបស់យុវជន គិនស៊ី ចាម៉ា ដេវីដ (Quincy Jamar Davis) មាន​លក្ខណៈ​រលួយ​រលះ និងផ្នែកខ្លះ បានក្រៀមអស់ទៅហើយ។ ប៉ុន្តែដោយសារការរំព័ទ្ធ ដោយបង់ស្អិត យ៉ាងជុំ​ជិត​នោះ គេ​ពិបាក​នឹង​មើល​ពីក្រៅ ថានេះជាសាកសព របស់មនុស្សម្នាក់ណាស់។

យុវជនបានបាត់ខ្លួន ក្នុងអំឡុងឆ្នាំ២០០៤ ហើយបើយុវជននៅមានជីវិតនោះ នឹងមានអាយុ២៥ឆ្នាំហើយ បើរាប់​មកដល់ថ្ងៃនេះ។ ហើយរឿងដ៏រន្ធត់ នៃការលាក់សាកសពកូនប្រុស ក្នុងរយៈពេល១១ឆ្នាំនេះ ទើបនឹងត្រូវបាន​ទម្លាយចេញទៀត ដោយអ្នកស្រី តុនយ៉ា ស្លាតុន ខ្លួនឯង ខណៈពេលដែលអ្នកស្រី ត្រូវឡើងសវនាការ​ជំហាន​ដំបូងមួយ នៅតុលាការក្រុង «Hampton» កាលពីសហ្ដហ៍កន្លងមកនេះ។

ក្នុងពេលនេះ អ្នកស្រី តុនយ៉ា ត្រូវបានចោទប្រកាន់ ថាបានលួចលាក់ សាកសពកូនប្រុស របស់អ្នកស្រី។ ប៉ុន្តែ​ដោយសារតែការស៊ើបអង្កេត កំពុងបើកធ្វើលឿន ទៅមុននោះ អ្នកស្រី តុនយ៉ា អាចនឹងត្រូវចោទ​ប្រកាន់​បន្ថែម​ទៀត ថាបានប្រព្រឹត្តិទង្វើ«មនុស្សឃាត» ទៅលើកូនប្រុសអ្នកស្រី។ សវនាការធំ សម្រាប់សម្រេច​ទោស​អ្នកស្រី នឹងត្រូវបើកធ្វើ ក្នុងអំឡុងខែកញ្ញាខាងមុខ៕