«លាលែង (ពីប្រធានសភា) ទៅធ្វើសន្តិសុខសភាទៅ ធ្វើប្រធានអង្គរក្ស ទៅយាមសភា ដើរមើលសន្តិសុខ ហើយ​ឲ្យសន្តិសុខសភា គេមកធ្វើជាប្រធានសភាជំនួសវិញ» នេះជាការថ្លែងចំអក របស់លោក អ៊ុំ សំអាន តំណាង​រាស្ត្រមណ្ឌលសៀមរាប មកពីគណបក្សសង្គ្រោះជាតិ ទៅនឹងការរារាំងមួយ ដែលបានធ្វើឡើង ក្នុង​រយៈពេលចុងក្រោយនេះ ហាមមិនឲ្យក្រុមតំណាងរាស្ត្រ របស់គណបក្សប្រឆាំង (ឬសម្លេងភាគតិច) អាច​ធ្វើ​សន្និសីទ ឬផ្ដល់បទសម្ភាស ទៅឲ្យក្រុមអ្នកសារព័ត៌មាន នៅក្នុងវិមានរដ្ឋសភា។

ការថ្លែងរបស់លោក អ៊ុំ សំអាន បានធ្វើឡើង នៅក្នុងបទសម្ភាសមួយ ជាមួយនឹងទស្សនាវដ្ដីមនោរម្យ.អាំងហ្វូ កាលពីថ្ងៃទី២ ខែកក្កដា មួយថ្ងៃបន្ទាប់ពីរូបលោក ត្រូវបានហាមឃាត់ ដោយលោក ឈាង វុន តំណាង​រាស្ត្រ​មណ្ឌលបាត់ដំបង មកពីគណបក្សប្រជាជនកម្ពុជា (សម្លេងភាគច្រើន កំពុងកាន់អំណាច) មិនឲ្យលោក អ៊ុំ សំអាន ធ្វើបទសម្ភាសទៅឲ្យអ្នកសារព័ត៌មាន នៅក្នុងបរិវេណនៃរដ្ឋសភាជាតិ។

ប៉ុន្តែការហាមឃាត់របស់លោក ឈាង វុន ក្រោមហេតុផល ថាការផ្ដល់បទសម្ភាស ទៅអ្នកសារព័ត៌មាន ដោយ​គ្មានការអនុញ្ញាត ពីប្រធានរដ្ឋសភានោះ មិនមែនត្រូវបានធ្វើ ត្រឹមតែមាត់ជាពាក្យសម្ដីទេ តែលោក ឈាង វុន បានសរសេរ ជាលិខិតលាយលក្ខណ៍អក្សរមួយច្បាប់ រាយការណ៍ទៅប្រធានរដ្ឋសភានោះ ផង​ទៀត។ លោក ឈាង វុន បានហៅការផ្ដល់បទសម្ភាសនោះ ជាទង្វើល្មើសនឹងសារាចរណែនាំ ដែលចេញ​ដោយ​ប្រធាន​រដ្ឋសភា លោក ហេង សំរិន កាលពីថ្ងៃទី១២ ខែកញ្ញា ឆ្នាំ២០១៤ ទាក់ទងនឹងសន្តិសុខរបស់រដ្ឋសភា។

តើការផ្ដល់បទសម្ភាស ទៅឲ្យអ្នកសារព័ត៌មាន ពិតជាប៉ះពាល់ដល់សន្តិសុខ របស់រដ្ឋសភាមែនឬ? ហើយចាំ​បាច់ លោក ហេង សំរិន ឬលោក ឈាង វុន ធ្វើអន្តរាគមន៍ឬ? លោក អ៊ុំ សំអាន បានឆ្លើយថា៖ «បញ្ហាសន្តិសុខ ក្នុងនោះគេមានអគ្គលេខាថិការ ជាអ្នកចាត់ចែងហើយ មិន​មែន​ប្រធាន​សភា ឬលោក ឈាង វុន ទៅចាត់​ចែង​ទេ។ សន្តិសុខនេះ ទាល់តែមានចោប្លន់ ចោរលួច ចុះខ្ញុំជាតំណាង​រាស្រ្ត មិនមែនចោប្លន់ ឬចោរលួចអី?»

តំណាងរាស្ត្រមណ្ឌលសៀមរាប បានពន្យល់ទៀតថា៖ «ការចេញសារាចរ របស់គាត់ (ប្រធានរដ្ឋសភា) ក៏​ខុស​ផងដែរ។ ក្នុងរដ្ឋធម្មនុញ្ញ ប្រធានសភាគ្មានសិទ្ធិចេញសារាចរទេ។ គាត់យល់ច្រឡំ ស្មានគាត់ហ្នឹង​ដូច​រដ្ឋាភិបាល សភាគេមិនដែលមានចេញទេ។ ចឹងគាត់ចេញហ្នឹង មិនបានមើលរដ្ឋធម្មនុញ្ញ មិនបានមើលបទ​បញ្ជា​ផ្ទៃក្នុង (រដ្ឋសភា)។»

លោកថា ប្រធានសភា ក៏ដូចជាប្រធានគណកម្មការ មាននាទីសម្រាប់តែដឹកនាំ អង្គប្រជុំតែប៉ុណ្ណោះ មិនមាន​សិទ្ធិមកចាត់ចែង ឬមកដេញតំណាងរាស្រ្តដូចគ្នាទេ។ លោកបានថ្លែងទៀតថា៖ «គ្មានតួនាទីឯណាទៅ ហាម​ឃាត់តំណាងរាស្រ្ត ដែលចង់ធ្វើសន្និសីទការសែត ឬនិយាយទៅកាន់អ្នកការសែតអីទេ (ក្នុងរដ្ឋសភា)។ (...) ព្រោះរដ្ឋធម្មនុញ្ញ បានចែងពីសិទ្ធិអ្នកតំណាងរាស្រ្ត។»

លោក អ៊ុំ សំអាន បានអះអាងថា៖ «និយាយឲ្យចំ ប្រធានសភា មានសិទ្ធិ និងឋានៈស្មើខ្ញុំដែរតើ។ មានឋានៈ​អីដែលធំជាងខ្ញុំនោះ គ្រាន់តែគេឲ្យទៅដឹកនាំសភា... ឬសម្របសម្រួលអង្គប្រជុំប៉ុណ្ណោះ។ សម្ដេច ហេង សំរិន និងខ្ញុំតំណាងរាស្រ្ត ដូចគ្នាហ្នឹងឯង ឋានៈស្មើគ្នា។ (...) សភាហ្នឹងជាសភាជាតិ មិនមែនជាសភារបស់សម្ដេច ហេង សំរិន ទេ មិនមែនជាសភា របស់លោក ឈាង វុន សភារបស់គណបក្រប្រជាជនកម្ពុជាទេ។ ដូច្នេះ​តំណាង​រាស្រ្ត ១២៣រូបហ្នឹង អាចប្រើប្រាស់សភា ជួបជាមួយអ្នកការសែត ឬប្រជាពលរដ្ឋ។»

ទស្សនាវដ្តីមនោរម្យ.អាំងហ្វូ មិនអាចសុំការបញ្ជាក់ពីលោក ហេង សំរិន ឬពីមន្ត្រីទទួលបន្ទុកខុទ្ទកាល័យ របស់​លោក បាននៅឡើយ នាព្រឹកនេះ។ ទស្សនាវដ្ដីនឹងព្យាយាម ស្វែងរកការបកស្រាយ ពីភាគីប្រធានរដ្ឋសភា ហើយ​នឹងធ្វើការចុះផ្សាយ តាមក្រោយ។ សូមរំលឹកដែរថា កាលពីពេលថ្មីៗនេះ លោក ហេង សំរិន ប្រធាន​រដ្ឋសភា​កម្ពុជា ធ្លាប់បានចារ ជាសំណេរផ្ទាល់ដៃមួយ បដិសេធក្រុមតំណាងរាស្ត្រ មកពីគណបក្ស​សង្គ្រោះ​ជាតិ មិនឲ្យធ្វើសន្និសីទការសែត នៅនឹងវិមានរដ្ឋសភា ទាក់ទងនឹងករណីព្រំដែនកម្ពុជា-វៀតណាមទេ។ ចំណារ​នោះ បានសរសេរថា៖ «រដ្ឋសភាពុំបានចេញ លិខិតបេសកកម្មឲ្យឯកឧត្តម ចុះធ្វើកិច្ចការនេះទេ។ ដូច្នេះ​ខ្ញុំមិនអនុញ្ញាត ឲ្យធ្វើសន្និសីទ​កាសែត នៅវិមានរដ្ឋសភាទេ។»៕