ពលរដ្ឋម្នាក់លោក សឿន ប្រុស រស់នៅភូមិបាលិលេយ្យ២ បានឲ្យទស្សនាវដ្តីមនោរម្យ.អាំងហ្វូដឹងថា ផ្ទះលោក​ខូចឌីហ្សុងទ័រ (Disjoncteur) ភ្លើង បានហៅបុគ្គលិក ក្រុមហ៊ុនខាងលើមកជួសជុល តែអ្នកទាំងនោះ បានយក​ថ្លៃឌីហ្សុងទ័រ ថ្លៃខុសពីលើកមុនៗ ហើយថែមទាំងប្រើពាក្យសម្តីថា បើមិនត ក៏បញ្ឈប់ការប្រើប្រាស់ភ្លើងទៅ។ លោកបន្តទៀតថា បុគ្គលិកទាំងអស់នោះ អាងថា នៅក្រុងប៉ោយប៉ែតគ្មានក្រុមហ៊ុនណា មកប្រកួតប្រជែង​ឡើយ មានតែក្រុមហ៊ុន «អានកូ» របស់លោក កុក អាន មួយនេះប៉ុណ្ណោះ ទើបមិនព្រមបម្រើពលរដ្ឋ តាម​តម្រូវ​ការ។

អ្នកដែលត្រូវបុគ្គលិក ក្រុមហ៊ុនអគ្គិសនីខាងលើ តម្រូវឲ្យបង់ប្រាក់ច្រើនជាងមុន សម្រាប់ថ្លៃឌីហ្សុងទ័រ ថ្មី បាន​ទាក់ទងទៅក្រុមហ៊ុនភ្លាមៗ ហើយត្រូវបានអ្នក នៅក្នុងក្រុមមហ៊ុនបញ្ជាក់ថា ចំពោះឌីហ្សុងទ័រភ្លើងថ្មីមួយ ក្រុមហ៊ុន​លក់តែ១០០បាត ស្មើរនឹង ១២ ១០០រៀល ប៉ុណ្ណោះ ចំនែកឯបុគ្គលិកថ្នាក់ក្រោមវិញ បានលក់​ឲ្យ​លោក ១០០០បាទ ស្មើរនឹង ១២១ ០០០រៀលទៅវិញ។ លោកថា វាមានតម្លៃថ្លៃហួសហេតុពេក ចុះបើផ្ទះខ្លះ ត្រូវ​​ដាក់​​ឌីហ្សុងទ័រ​ពីរបីនោះ នឹងត្រូវចំណាយអស់ច្រើនប៉ុណ្ណាទៅ?

ទស្សនាវដ្តីបានព្យាយាម ទាក់ទងទៅតំណាង ក្រុមហ៊ុនអគ្គិសនី«អានកូ»ខាងលើ ដើម្បីបំភ្លឺពីបញ្ហា​ទាំងអស់​នេះ តែលេខទូរស័ព្ទនោះ គ្មានអ្នកទទួល។ ដោយឡែក លោក ចៅ វាសនា ចៅសង្កាត់រងនៅមូលដ្ឋាន ដែល​កំពុងមានបញ្ហាភ្លើងខាងលើ មិនបានបដិសេធន៍ ពីបញ្ហានេះទេ លោកថា វាជាការពិត ព្រោះគ្រួសារលោក​ផ្ទាល់ ក៏ជួបបញ្ហានេះដែរ កាលពីមុន។

ចៅសង្កាត់រងសង្កាត់ ប៉ោយប៉ែត បានប្រាប់ទស្សនាវដ្តីមនោរម្យ.អាំងហ្វូនៅថ្ងៃទី០៣ ខែកក្កដានេះថា បញ្ហា​នេះ មិនមែនទើបតែកើតមានឡើងនោះទេ វាមានយូរហើយ តែគ្មានអ្នកណាហ៊ានតវ៉ា ព្រោះសុទ្ធតែ​ប្រជា​ពលរដ្ឋ​ទន់​ខ្សោយ។ ម្យ៉ាងទៀត រាល់ការដោះស្រាយ នៅក្នុងមូលដ្ឋាន នៅមានការើសអើងបក្សពួកច្រើន៕