អតីតរាជនីសម្ផស្ស អាយុ២៩ឆ្នាំ នាង ស្លូបូបង់កា តូសីក កំពុងស្ថិត ក្នុងសំណាញ់យុត្តិធម៌ ទាក់ទងនឹង​សំនុំ​រឿងឧក្រិដ្ឋកម្ម ដ៏ធ្ងន់ធ្ងរជាច្រើន។ នាង តូសឺក ដែលបច្ចុប្បន្ន ជាតារាបង្ហាញម៉ូដមួយរូបនោះ ត្រូវបាន​អាជ្ញាធរ​សង្ស័យថា បានចូលរួមនៅក្នុងទង្វើមនុស្សឃាត ទៅលើជនរងគ្រោះប្រាំនាក់។ នេះបើតាមការផ្សាយឲ្យដឹង របស់សារព័ត៌មានអាល្លឺម៉ង់ «Bild» កាលចុងសប្ដាហ៍កន្លងទៅ។

សារព័ត៌មានបានរាយការណ៍ថា អតីតបវរកញ្ញា ឆ្នាំ២០០៥ នៃប្រទេសប៊ូស្នៀ ទើបនឹងត្រូវបានឃាត់ខ្លួន នៅ​ក្នុងប្រទេសក្រូអាស៊ី និងបន្ទាប់មកនឹងត្រូវធ្វើបត្យាប័ន ទៅកាន់ប្រទេសកំណើតរបស់នាង ដើម្បីទទួល​ការ​វិន្និច្ឆ័យ​ទោស។

តារាស្រីមុខស្រស់ សម្ផស្សបាន ត្រូវបានសង្ស័យថា បានប្រព្រឹត្តិឧក្រិដ្ឋកម្ម ជាមួយនឹងមិត្តប្រុស របស់​នាង​ឈ្មោះ ដាកូ អេឡេស (Darko Elez)។ បុរសម្នាក់នេះ ជាមេដឹកនាំដ៏សំខាន់ នៃក្រុមឧក្រិដ្ឋជនមួយ ដែលបាន​ធ្វើសកម្មភាពប្លន់ធនាគារ នៅប្រទេសប៊ូស្នៀ និងបានប្រមូលយកប្រាក់ ប្រមាណជាង ៥,៦លានអ៊ឹរ៉ូ (ជិត៦​លានដុល្លា) ចេញទៅ។ បុរស ដាកូ អេឡេស បានជាប់ធនាគាររួចហើយ ពីបទលួចប្លន់ និងមនុស្សឃាត។

បើតាមសារព័ត៌មានដដែល បានឲ្យដឹងទៀតថា នាង ស្លូបូបង់កា តូសីក មានភាពល្បីល្បាញណាស់ នៅក្នុង​ប្រទេសចំនួនបី នៃទ្វីបអ៊ឺរ៉ុបខាងត្បូង (ក្រិច រ៉ូម៉ានី និងប៊ូស្នៀ) ជាពិសេសបន្ទាប់ពីនាង បានចូលរួមសម្ដែង នៅ​ក្នុងកម្មវិធីទូរទស្សន៍ជាច្រើន នៅក្នុងប្រទេសប៊ូស្នៀ និងប្រទេសស៊ែប៊ី៕

» រូបភាពរបស់នាង តូសីក មួយចំនួន៖