តើតារាស្រីខ្មែរណាខ្លះ ដែលហ៊ានអះអាងជាចំហរ ថាខ្លួនអាចដោះសម្លៀកបំពាក់ ចេញពីខ្លួនអស់ ពោលគឺ​ស្រាតននលគោក ១០០% សម្ដែងនៅពីមុនកាម៉េរ៉ា? មកដល់ពេលនេះ គេដូចជារក​មិនទាន់បាន​នៅឡើយ បើទោះជាតារាមួយចំនួន ខិតខំបញ្ចេញភាពស៊ិចស៊ី បង្ហាញលើបង្ខិតក្រោម ឲ្យចេញប្រដាប់ប្រដា ខ្លះៗក៏​ដោយ។ ប៉ុន្តែតារាស្រីមួយរូប នាង កែវ ស្រីនាង ដែលល្បីទាំងឈ្មោះ ថែមទាំងរស់លើគំនរ ទ្រព្យសម្បត្តិ​ហូរ​ហៀរនោះ បានចេញមកប្រកាសថា នាងអាចថត«ស្រាត១០០%»បាន ដោយមិនខ្លាចអ្វីទាំងអស់។

ចុះមានអ្វី ជាល័ក្ខខ័ណ្ឌឬទេ? ពិតជាមាន! ក្នុងកិច្ចសម្ភាស ជាមួយនឹងសារព័ត៌មាន ក្នុងស្រុកមួយ នាង កែវ ស្រីនាង បានបង្ហើបល័ក្ខខណ្ឌថា ឲ្យតែ«បុកលុយដល់» ដោយនាងបានទារតម្លៃខ្លួន ដើម្បីជាថ្នូរទៅនឹង​ការ​ថតស្រាត មានកម្រិតដល់ទៅ ១លានដុល្លា។ តារាសាច់ចាំកូនមួយ ជាមួយស្វាមីជាតិអង់គ្លេស រូបនេះ បាន​ថ្លែងប្រាប់សារព័ត៌មាននោះ ទៀតថា៖ «ដូចខ្ញុំប្រាប់អ៊ីចឹង សំខាន់​សិល្បៈ ខ្ញុំអត់បញ្ហាទេ។ ថតប៉ុនណាក៏​បាន​ដែរ ឱ្យតែស្ថិតក្នុងរង្វង់សិល្បៈ។ និយាយរួម ឱ្យតែបុកលុយដល់ ខ្ញុំអាចថតបាន ឱ្យតែជាលក្ខណៈ​ភាពយន្ត។»

តារាសម្ដែងបានថ្លែងច្បាស់ៗថា៖ «បើឱ្យខ្ញុំថតស្រាត ទាល់តែតម្លៃ១លានដុល្លារ។ បើអ្នកដឹកនាំរឿង ឬក៏ខាង​ផលិតកម្មនោះ ហ៊ានឱ្យតម្លៃខ្លួនខ្ញុំប៉ុណ្ណឹង ខ្ញុំនឹងថតឱ្យភ្លាម។»

កុំយល់សប្ដិ!

ប៉ុន្តែវិថីរបស់នាង កែវ ស្រីនាង ឆ្ពោះទៅដណ្ដើមបានប្រាក់លាននេះ ទំនងជាមានរបាំងមួយយ៉ាងធំ នៅ​ប្រទេស​កម្ពុជា ព្រោះនាង កែវ ស្រីនាង ខ្លួនឯង បានពន្យល់បន្តថា ភាពយន្ដដែលតម្រូវ​ឲ្យនាងស្រាតនោះ ត្រូវ​តែ​មាន​ការ​អនុញ្ញាត ពីក្រសួងវប្បធម៌ និងវិចិត្រសិល្បៈកម្ពុជា ដើម្បីអាចដាក់បញ្ចាំង នៅតាមរោងបាន។ «របាំង»​មួយ​នេះ មានកម្រាស់ប៉ុនភ្នំ និងមានកំពស់ខ្ពស់ស្មើមេឃ ដែលធ្វើឲ្យគេគិតថា តើភាពយន្ដមាន​ឈុត​ឆាក​​ស្រាត​ណាមួយ ដែលអាចទទួលបាន​ការអនុញ្ញាត ពីប្រទេសកម្ពុជា ដែលនៅប្រកាន់ខ្ជាប់យ៉ាងខ្លាំងក្លា នូវ​ទំនៀម​ទម្លាប់​​ប្រពៃណីរបស់ខ្លួន ដើម្បីដាក់បញ្ចាំង នៅលើផ្ទាំងសំពត់សនោះ?

បើអញ្ចឹងទៅវិញទេ គេពិបាកនឹងយល់សប្ដិថា នៅកម្ពុជា នឹងអាចមានការទទួលយក នូវការថតស្រាត ននល​គោកទាំងស្រុង ជាមួយនឹងតម្លៃឈ្នួល ដ៏ខ្ពស់បែបនោះណាស់ ជាពិសេសនៅពេល ដែលផលិតកម្ម​ភាពយន្ដ​នីមួយៗ នៅកម្ពុជា មិនហ៊ានចំណាយ លើសពី១ភាគ១០ នៃប្រាក់មួយលាន ថ្លៃតម្លៃថតរបស់នាង កែវ ស្រីនាង នោះផង។ ភាពយន្ដកម្ពុជាកន្លងមក ឃើញមានតែ ផលិតកម្ម ដែលថតរឿង «ស្បែកគង់» មួយ​ប៉ុណ្ណោះ ដែលបានអួតអាងថា ហ៊ានចាយ​ទុនទាំងអស់ ដល់ទៅជាងកន្លះលានដុល្លា។

សម្ដែងក្នុងភាពយន្ដរឿង «ក្រមុំសៅកែ» ដែលកំពុងចាក់បញ្ចាំង នៅគ្រប់រោងភាពយន្ដសព្វថ្ងៃនេះ នាង កែវ ស្រីនាង បានអះអាងថា នាងនៅតែមានជំនក់ចិត្ត ក្នុងសិល្បៈភាពយន្ដ បើទោះជានាងមានគ្រួសារ និងមាន​ជំនួញ រកប្រាក់បានរាប់ពាន់ម៉ឺន ក្នុងមួយខែៗក៏ដោយ។ បើអញ្ចឹងទេ គេត្រូវរងចាំបន្តិចទៀតទៅមើល ក្រែង​លោ​មានផលិតកម្មបរទេសណាមួយ ចាប់អារម្មណ៍សម្ផស្សដ៏ស្រគត់ស្រគុំ និងទេពកោសល្យសម្ដែង របស់​នាង កែវ ស្រីនាង ហើយអាចអញ្ជើញនាង ទៅថតឈុតឆាកស្រាត ដោះខោអាវទាំងស្រុង ជាថ្នូរទៅនឹង​ថ្លៃ​ឈ្នួលថត ១លានដុល្លា៕